ಬಾನಲ್ಲಿ ಗ್ರಹಗಣತಿ

ಇದು ಉಪಗ್ರಹ, ಗನನ ನೌಕೆಗಳ ಯುಗ, ಬಾಹ್ಯಾಕಾಶ ಸಂಶೋಧನೆ ವಿಜ್ಞಾನಿಗಳ ತೀರದ ದಾಹ, ವಿಶ್ವದ ವಿಸ್ತಾರವೆಷ್ಟು? ಬಾನಂಗಳಕ್ಕೆ ಕೊನೆ - ಮೊದಲು ಇದೆಯೆ? ಜ್ಯೋತಿರ್ವರ್ಷಗಳಷ್ಟು ದೂರದಲ್ಲಿ ಮಿಂಚುವ ನಕ್ಷತ್ರಗಳ ಗುಟ್ಟೇನು? ಇವೇ ಮುಂತಾದ ಪ್ರಶ್ನೆಗಳ ಸರಮಾಲೆ ಧರಿಸಿ ವಿಜ್ಞಾನಿಗಳು ಕಾರ್ಯಪ್ರವೃತ್ತರಾಗಿದ್ದಾರೆ. ಬಾನಿನ ವಿಸ್ತಾರದಂತೆ ತಮ್ಮ ಅರಿವೂ ವಿಸ್ತಾರಗೊಂಡಾಗ, ನಮ್ಮ ಸೂರ್ಯನಿಗಿಂತಲೂ ಹೆಚ್ಚು ಪ್ರಕಾಶಮಾನವಾದ ಲೆಕ್ಕವಿಲ್ಲದಷ್ಟು ನಕ್ಷತ್ರಗಳಿದ್ದು ಅವುಗಳನ್ನು ಸುತ್ತುವ ಗ್ರಹಗಳಿವೆಯೆಂದು, ಅಂಥ ಗ್ಯಾಲಕ್ಸಿಗಳು ಲಕ್ಷಾಂತರ ಜ್ಯೋತಿರ್ವರ್ಷ ದೂರದಲ್ಲಿವೆ ಎಂದು ತಿಳಿದದ್ದೇ ತಡ - ಒಂದರ ಹಿಂದೊಂದು ಬಾನ ನೌಕೆಗಳು ಅತ್ಯಾಧುನಿಕ ತಂತ್ರಜ್ಞಾನವನ್ನು ಅಳವಡಿಸಿಕೊಂಡು ಆಕಾಶವನ್ನು ಭೇದಿಸಿ ಸಾಗಿದವು. ನಿರಾಸೆ ಎಂಬ ಪದ ವಿಜ್ಞಾನಿಗಳ ಭಂಡಾರದಲ್ಲೇ ಇಲ್ಲ. ನಮ್ಮ ಸೌರವ್ಯೂಹದಾಚೆ ಪಯಣಿಸಲು ಸಿದ್ದವಾಗಿರುವ, ವಿಶ್ವದ ರಹಸ್ಯ ಭೇದಿಸಲು ಹೊರಟಿರುವ ಸಾಹಸಯಾನಗಳ ಕಥೆ ಈ ಕೃತಿಯಲ್ಲಿ ರೋಚಕ ಅಂಶಗಳೊಂದಿಗೆ ನಿರೂಪಿಸಲಾಗಿದೆ. ಸಿರಿಟ್, ಅಪಾರ್ಚುನಿಟಿ, ನ್ಯೂಹಾರಿಝಾನ್, ಫೀನಿಕ್ಸ್, ಡಾನ್, ವಾಯೇಜರ್ ಜುನೊ - ಮುಂತಾಗಿ ಅರ್ಥಪೂರ್ಣ ಹೆಸರಿನೊಂದಿಗೆ ಬಾನಂಗಳಕ್ಕೆ ಧುಮುಕಿದ ಗಗನ ನೌಕೆಗಳ ಬಗ್ಗೆ ತಿಳಿದುಕೊಂಡು ರೋಮಾಂಚಿತರಾಗುವುದೇ ಒಂದು ರೋಚಕ ಅನುಭವ. ವಿಜ್ಞಾನ ಲೋಕದ ಸಂಶೋಧನೆಗಳ ಮಹಾಪೂರವಿದು.

- ಇಂದಿರಾಕುಮಾರಿ ಯಶವಂತಪುರ, ಬೆಂಗಳೂರು-೫೬೦ ೦೧೮

ಕೃಪೆ: ಹೊಸತು 2018 ಜನೆವರಿ