ಕುವೆಂಪು ಜನ್ಮಶತಮಾನೋತ್ಸವದ ನೆವದಲ್ಲಿ ಹಿರಿಯ ಸಾಹಿತಿ ಜಿ ಟಿ ನಾರಾಯಣರಾವ್ ಅವರು ರಸರ್ಷಿಗೆ ಅರ್ಪಿಸಿದ ನುಡಿ ನಮನ ಈ ಕೃತಿ.
ಲೇಖಕರೇ ವಿವರಿಸಿರುವಂತೆ ಇದರಲ್ಲಿ ಮೂರು ವಿಭಾಗಗಳಿದ್ದು ಮೊದಲನೇ ಭಾಗವು ಜಿಟಿನಾ ಅವರು ಕುವೆಂಪು ಮೋಡಿಗೆ ತುತ್ತಾದ ಬಗೆಯನ್ನು ಒಳಗೊಂಡಿದೆ. ಅದರಲ್ಲಿ ದೇಜಗೌ ಲೇಖಕರನ್ನು ’ಕುವೆಂಪು ವೃತ್ತಿಗೆ’ ಹಚ್ಚಿದ ವಿವರವೂ ಇದೆ.
ವಿಜ್ಞಾನ ಲೇಖಕರೂ ಆದ ರಾವ್ ಅವರು ಕುವೆಂಪು ಅವರ ವಿಜ್ಞಾನ ವಾಙ್ಮಯತೆ ಹಾಗೂ ವೈಜ್ಞಾನಿಕ ಮನೋಧರ್ಮವನ್ನು ಎರಡು ಮತ್ತು ಮೂರನೇ ವಿಭಾಗದಲ್ಲಿ ಚರ್ಚಿಸಿದ್ದಾರೆ. ಕನ್ನಡ ಸಾಂಸ್ಕೃತಿಕ ಲೋಕದ ಮೇರು ವ್ಯಕ್ತಿತ್ವವನ್ನು ವಿಜ್ಞಾನದಂತಹ ಭಿನ್ನ ದೃಷ್ಟಿಯಿಂದ ನೋಡವ ಯತ್ನದಿಂದಾಗಿಯೇ ಕೃತಿ ಗಮನ ಸೆಳೆಯುತ್ತದೆ.
ಜಿ.ಟಿ.ನಾರಾಯಣ ರಾವ್ ಅವರು ಪುತ್ತೂರಿನ ಸಮೀಪದ ಮರಿಕೆ ಗ್ರಾಮದಲ್ಲಿ 30-01-1926ರಂದು ಜನಿಸಿದರು. ಮದ್ರಾಸ್ ವಿಶ್ವವಿದ್ಯಾಲಯದಿಂದ ಗಣಿತದಲ್ಲಿ ಎಂ.ಎ. ಪದವಿ ಪಡೆದಿರುವ ಇವರು ಎನ್.ಸಿ.ಸಿ. ಅಧಿಕಾರಿಯಾಗಿಯೂ ಕರ್ತವ್ಯ ನಿರ್ವಹಿಸಿದ್ದಾರೆ. ಕರ್ನಾಟಕ ಸಂಗೀತ ಹಾಗೂ ಕನ್ನಡ ಅಭಿಜಾತ ವಾಙ್ಙಯ ಕುರಿತು ಅಪಾರ ಆಸಕ್ತಿ ಹೊಂದಿದ್ದಾರೆ, ಸರಕಾರಿ ಕಾಲೇಜುಗಳಲ್ಲಿ ಅಧ್ಯಾಪನ ಮತ್ತೆ ಮೈಸೂರು ವಿಶ್ವವಿದ್ಯಾಲಯದ ಕನ್ನಡ ವಿಶ್ವಕೋಶದ ವಿಜ್ಞಾನ ಸಂಪಾದಕರಾಗಿಯೂ ಕಾರ್ಯ ನಿರ್ವಹಿಸಿದ್ದಾರೆ. ನೊಬೆಲ್ ಪ್ರಶಸ್ತಿ ಪುರಸ್ಕೃತರಾದ ಸಿ.ವಿ. ರಾಮನ್‌ರನ್ನು ಬೆಂಗಳೂರಿನಲ್ಲಿಯೂ, ಎಸ್. ಚಂದ್ರಶೇಖರ್‌ರನ್ನು ಚಿಕಾಗೋದಲ್ಲಿಯೂ ಭೇಟಿಮಾಡಿ ವೈಜ್ಞಾನಿಕ ಜೀವನ ಚರಿತ್ರೆಗಳನ್ನು ಬರೆದಿದ್ದಾರೆ. ಕನ್ನಡಕ್ಕೆ ವಿಪುಲ ಸ್ವತಂತ್ರ ವೈಜ್ಞಾನಿಕ ಕೃತಿಗಳನ್ನೂ, ಕೆಲವು ...
READ MOREಹೊಸತು - ಎಪ್ರಿಲ್‌ -2005
ಕುವೆಂಪು ಕಳೆದ ಶತಮಾನದ ಧೀಮಂತ ವ್ಯಕ್ತಿತ್ವದ ಮಹಾಕವಿ ಎಂದು ಪ್ರಸಿದ್ಧರಾಗಿದ್ದಾರೆ. ಅವರಿಂದ ನೇರ ಅಥವಾ ಪರೋಕ್ಷ ಪ್ರಭಾವಿತರಾಗದ ವ್ಯಕ್ತಿಗಳೇ ಬಹಳ ವಿರಳವೆನ್ನಬಹುದು. ಪ್ರಜ್ವಲ ವೈಚಾರಿಕ ನಿಲುವನ್ನು ಹಾಗೂ ಅಷ್ಟೇ ಕನ್ನಡ ಪ್ರೇಮವನ್ನು ಬಾಳಿನುದ್ದಕ್ಕೂ ಅಳವಡಿಸಿ ತಮ್ಮ ಸಾಹಿತ್ಯದ ಮೂಲಕ ಕನ್ನಡ ಸೇವೆಗೈದು ಕರ್ನಾಟಕದಾದ್ಯಂತ ಪ್ರಜೆಯಿಂದ ಪ್ರಭುವಿನ ತನಕ ಎಲ್ಲರ ಮನಸೂರೆಗೊಂಡಿದ್ದಾರೆ. ಇಂಥ ಮೇರು ಪ್ರತಿಭೆಯಿಂದ ಆಕರ್ಷಿಸಲ್ಪಟ್ಟು ಬಾಲ್ಯದಿಂದಲೇ ಅದು ಹೇಗೋ ಕುವೆಂಪು ವ್ಯಕ್ತಿತ್ವದ ಅಗೋಚರ ಸೆಳೆತಕ್ಕೆ ಸಿಕ್ಕಿದ ಖಗೋಳ ಗಣಿತ ವಿಜ್ಞಾನ ಲೇಖಕ ಶ್ರೀ ಜಿ. ಟಿ. ನಾರಾಯಣರಾವ್ ತುಂಬ ಸೊಗಸಾಗಿ ಕುವೆಂಪು ಅವರನ್ನು ಪರಿಚಯಿಸಿದ್ದಾರೆ. ಈ ಇಬ್ಬರು ಮಹನೀಯರ ನಡುವಿನ ಭೌತಿಕ ವಾಸ್ತವಾಂಶಗಳ ಬಗ್ಗೆ ಚರ್ಚೆ ಮತ್ತು 'ರಾಮಾಯಣ ದರ್ಶನಂ' ಕೃತಿಯಲ್ಲಿನ ವೈಜ್ಞಾನಿಕ ಅಂಶಗಳಲ್ಲಿನ ವಿವರಣೆ ಅತ್ಯಂತ ಮನೋಜ್ಞವಾಗಿ ಮೂಡಿದೆ.
Concept & Creation 
©2024 Book Brahma Private Limited.
