ಶ್ರೀಮಾರುತೇಶ್ವರ ಮಹಿಮೆ

ಸಾವಿರಾರು ವರ್ಷಗಳ ಭವ್ಯವಾದ ಇತಿಹಾಸ ಹೊಂದಿರುವ ಕರ್ನಾಟಕ ರಾಮಾಯಣ ಮಹಾಭಾರತಗಳ ಕಾಲದಿಂದಲೂ ಋಷಿಮುನಿಗಳ, ಸಂತ-ಮಹಾಂತರ, ಅಸಂಖ್ಯಾತ ಸಾಧಕರನ್ನು ತನ್ನೊಡಲಲ್ಲಿ ಘೋಷಿಸಿ ಬೆಳಸಿಕೊಂಡು ಬಂದ ಪುಣ್ಯಭೂಮಿ, ವಿಜಯನಗರದ ಅರಸರ ಕಾಲಾವಧಿಯಲ್ಲಿ ವೈಭವದಿಂದ ಮೆರೆದ ಹಂಪೆಯ ಅಂಜನಾದ್ರಿ ಬೆಟ್ಟದಲ್ಲಿ ಪ್ರಾಣ ದೇವರು, ಶಕ್ತಿವಂತ ಆಂಜನೇಯನು ಜನಿಸಿದನೆಂಬ ಪ್ರತೀತಿ ಇದೆ. ಈತನಿಗೆ ಹನುಮಂತ, ವಾನರ, ಪವನಸುತ, ಮಾರುತಿ, ಶ್ರೀರಾಮ ಭಕ್ತ ಹೀಗೆ ಹತ್ತು ಹಲವು ಹೆಸರುಗಳಿಂದ ಭಾರತದ ಉದ್ದಗಲಕ್ಕೂ ಕರೆಯುವರಲ್ಲದೇ, ಅಸಂಖ್ಯಾತ ಮಾರುತಿ ದೇವಾಲಯಗಳನ್ನು ನಿರ್ಮಿಸಿ ಆರಾಧಿಸುತ್ತಿರುವುದು ಹನುಮಂತನ ಘನವಾದ ಮಹಿಮೆಗೆ ಸಾಕ್ಷಿ. ಇಂತಹ ಮಹಾಮಹಿಮನು, ಭಕ್ತಿ-ಶಕ್ತಿಯ ಪ್ರತಿರೂಪನಾಗಿರುವ ಹನುಮಂತನ ದೇವಾಲಯಗಳಿಲ್ಲದ ಊರುಗಳೇ ಇಲ್ಲ. ಬಾಗಲಕೋಟ ಜಿಲ್ಲೆಯ ಹುನಗುಂದ ತಾಲೂಕು ಇದಕ್ಕೆ ಹೊರತಾಗಿಲ್ಲ. ಇಲ್ಲಿಗೆ ಸಮೀಪದ ತಿಮ್ಮಾಪೂರ ಗ್ರಾಮದ “ಮಾರುತೇಶ್ವರ ದೇವಾಲಯ” ಮತ್ತು “ಬಸವೇಶ್ವರ ದೇವಾಲಯಗಳೆರಡೂ ಜೋಡಿಯಾಗಿರುವುದು ವಿಶೇಷ. ಅದರಲ್ಲೂ ಉತ್ತರಿ ಮಳೆಯ ಜಾತ್ರೆಯ ಸಂದರ್ಭದಲ್ಲಿ ಪಲ್ಲಕ್ಕಿ ಉತ್ಸವ, ಹತಾರ ಕಾಯಿ ಒಡೆಯುವುದು, ಕಾರ್ಯಗಳಿಂದಾಗಿ ಜಾತಿ ಮತಗಳೆನ್ನದೇ ಅಪಾರ ಭಕ್ತರು ಶ್ರದ್ಧಾ-ಭಕ್ತಿಯಿಂದ ನಡೆದುಕೊಳ್ಳುತ್ತಾರೆ. ಹೀಗೆ ತನ್ನದೇ ಆದ ಸ್ಥಳ ಮಹಿಮೆಯ ವಿಶೇಷತೆಯುಳ್ಳ ಮಾರುತಿ ದೇವಾಲಯದ ಬಗ್ಗೆ ಯುವ ಬರಹಗಾರ ಜಗದೀಶ ಹದ್ದಿಯವರು ಬಾಲ್ಯದಿಂದಲೇ ಹನುಮಂತ ದೇವರಲ್ಲಿ ತುಂಬಾ ಪ್ರಭಾವಿತನಾದವನು. ದೇವಾಲಯದ ಆಚರಣೆಗಳ ಕುರಿತು ಕೇವಲ ಪತ್ರಿಕೆಗಳಿಗೆ ಲೇಖನ ಬರೆಯುತ್ತಲಿದ್ದ ಜಗದೀಶ ಹದ್ದಿಯವರು ಹತ್ತು ಹಲವು ಮೂಲಗಳಿಂದ ಮಾಹಿತಿ ಸಂಗ್ರಹಿಸಿ “ಶ್ರೀಮಾರುತೇಶ್ವರ ಮಹಿಮೆ” ಕೃತಿಯೊಂದನ್ನು ಪ್ರಕಟಿಸುವ ಎತ್ತರಕ್ಕೆ ಬೆಳೆದಿರುವುದು ಹೆಮ್ಮೆಯ ಸಂಗತಿ. ಯುವಕರು ಸತತ ಅಧ್ಯಯನ, ಕುತೂಹಲ ಪ್ರವೃತ್ತಿ, ಸಾಧಿಸುವ ಛಲವನ್ನು ಇಟ್ಟುಕೊಂಡು ಆತ್ಮವಿಶ್ವಾಸದಿಂದ ಮುನ್ನಡೆದರೆ ನಮ್ಮ ಸುತ್ತಲು ಇನ್ನೂ ಕತ್ತಲೆಯಲ್ಲಿಯೇ ಇರುವ ಹಲವಾರು ದೇವಾಲಯಗಳ ವಾಸ್ತುಶಿಲ್ಪ, ಶಾಸನಗಳು, ಸ್ಥಳ ಐತಿಹ್ಯ, ಸ್ಥಳ ಪುರಾಣ, ಪ್ರಾಚೀನ ವಸ್ತು ವಿಷಯಗಳ ಮೇಲೆ ಬೆಳಕನ್ನು ಚೆಲ್ಲಬಹುದೆಂಬುದಕ್ಕೆ ಕುತೂಹಲ ಹಾಗೂ ಪರಿಶ್ರಮ ಗುಣವುಳ್ಳ ಜಗದೀಶ ಹದ್ದಿಯವರು ಮಾದರಿಯಾಗಿದ್ದಾರೆ.ಸಾಹಿತಿ ಎನ್.ಪಿ ನಾಡಗೌಡರ ಪುಸ್ತಕದ ಬೆನ್ನುಡಿಯಲ್ಲಿ ತಿಳಿಸಿದ್ದಾರೆ.