ನಗರದಲ್ಲಿ ಭಾನುವಾರ ನಡೆದ ಗೌರಿ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸ್ವಾತಂತ್ಯ್ರ ಹೋರಾಟಗಾರ ಎಚ್.ಎಸ್. ದೊರೆಸ್ವಾಮಿ ಅವರು ದಿಟ್ಟ ಪತ್ರಕರ್ತ ರವೀಶ್‌ ಕುಮಾರ್‌ ಅವರಿಗೆ ಪ್ರಶಸ್ತಿ ನೀಡಿ ಸನ್ಮಾನಿಸಿದರು. 

ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ರವೀಶ್‌ ಕುಮಾರ್‌ ’ರಾಷ್ಟ್ರೀಯತೆ, ಏಕ ಸಂಸ್ಕೃತಿ, ಏಕ ಭಾಷೆ, ಇಂತಹ ವಿಷಯಗಳನ್ನು ಮುನ್ನಲೆಗೆ ತಂದು ಪ್ರಜಾಪ್ರಭುತ್ವ ಮೌಲ್ಯಗಳನ್ನು ಕಗ್ಗೊಲೆ ಮಾಡಲಾಗುತ್ತಿದೆ. ಪ್ರಜಾಪ್ರಭುತ್ವ ನಾಶದ ಅಂಚಿಗೆ ಸರಿದಿದ್ದು ಇದರಲ್ಲಿ ಮಾಧ್ಯಮದ ಹೊಣೆಗಾರಿಕೆಯು ಇದೆ. ವ್ಯವಸ್ಥೆ ವಿರುದ್ದ ಮಾತನಾಡುವ ಪತ್ರಕರ್ತರ ಕೊಲೆ ನಡೆಯುತ್ತಿದೆ ಎಂದರೆ ಇದು ಪ್ರಜಾಪ್ರಭುತ್ವದ ಕಗ್ಗೊಲೆ ಅಲ್ಲದೆ ಮತ್ತೇನು? ಎಂದರು. 

ದೇಶದೆಲ್ಲೆಡೆ ಚರ್ಚೆಯಾಗುತ್ತಿರುವ ಏಕ ಭಾಷಾ ವಿಷಯದ ಕುರಿತು ಮಾತನಾಡಿದ ಅವರು ’ಹಿಂದಿ ಪ್ರಭಾವದ ಭಾಷೆ ಅಲ್ಲ ಅಭಾವದ ಭಾಷೆಯಾಗಿದೆ. ಹಿಂದಿ ಭಾಷಿಕರು ಕೂಡ ಪ್ರಾದೇಶಿಕ ಭಾಷಿಕರಂತೆ ಶೋಷಿತರು. ಭಾಷೆಗಳ ನಡುವೆ ಸೌಹಾರ್ದಯುತ ಅನುಸಂಧಾನ ಬೆಳೆಸಬೇಕೇ ಹೊರತು, ವೈರತ್ವವನ್ನಲ್ಲ’ ಎಂದು ಅಭಿಪ್ರಾಯಪಟ್ಟರು. 

ಈ ಕಾರ್ಯಕ್ರಮದಲ್ಲಿ ಗೌರಿ ಲಂಕೇಶ್‌ ನ್ಯೂಸ್‌ ವೆಬ್‌ (www.gaurilankeshnews.com) ಉದ್ಘಾಟನೆಯಾಯಿತು.