ಪೆರಮಾತಿನ ಶಿಕ್ಶಣ: ಕೆಲ ಸಮಸ್ಯೆಗಳು-ಶಿಕ್ಶಣದಲ್ಲಿ ಸೋಲು

Date: 02-02-2025

Location: ಬೆಂಗಳೂರು

"ಬಾರತದಾಗ ಇನ್ನೂ ಎಲ್ಲ ಮಕ್ಕಳು ಶಾಲೆಯ ಮೆಟ್ಟಿಲನ್ನು ಏರಿಲ್ಲ. ಶಾಲೆಗೆ ಬಂದ ಹೆಚ್ಚಾನುಹೆಚ್ಚು ಮಕ್ಕಳು ಪ್ರಾತಮಿಕ ಮತ್ತು ಇನ್ನೂ ಹೆಚ್ಚೆಂದರೆ ಪ್ರವುಡ ಶಾಲಾ ಹಂತದವರೆಗೆ ಮಾತ್ರ ಶಾಲೆಯಲ್ಲಿ ಉಳಿಯುತ್ತಾರೆ. ಪ್ರವುಡ ಶಾಲಾ ಹಂತದ ನಂತರ ಅರ‍್ದದಶ್ಟು ಮಕ್ಕಳು ಶಾಲೆಯನ್ನು ಬಿಟ್ಟುಬಿಡುತ್ತಾರೆ," ಎನ್ನುತ್ತಾರೆ ಬಸವರಾಜ ಕೋಡಗುಂಟಿ. ಅವರು ತಮ್ಮ ‘ತೊಡೆಯಬಾರದ ಲಿಪಿಯ ಬರೆಯಬಾರದು’ ಅಂಕಣದಲ್ಲಿ ‘ಪೆರಮಾತಿನ ಶಿಕ್ಶಣ: ಕೆಲ ಸಮಸ್ಯೆಗಳು-ಶಿಕ್ಶಣದಲ್ಲಿ ಸೋಲು’ ಕುರಿತು ಬರೆದಿದ್ದಾರೆ.

ಈ ಮೇಲೆ ಮಾತನಾಡಿದ ಶಾಲೆ ಮತ್ತು ಶಿಕ್ಶಣದಲ್ಲಿ ನಕಾರಾತ್ಮಕ ಮನೋಬಾವ ಬೆಳೆಸಿಕೊಳ್ಳುವುದು ಕ್ರಮೇಣ ಬೆಳೆದು ಮಕ್ಕಳು ಶಾಲೆ ಬಿಡುವ ಸ್ತಿತಿಗೆ ಬರುತ್ತದೆ. ಜಗತ್ತಿನಾದ್ಯಂತ ಶಾಲೆ ಬಿಟ್ಟ ಮಕ್ಕಳ ಅದ್ಯಯನ ಮಾಡಿದ ಸಂಶೋದನೆಗಳು ಹೆಚ್ಚಾನುಹೆಚ್ಚು ಶಾಲೆ ಬಿಟ್ಟ ಸಂದರ‍್ಬಗಳಲ್ಲಿ ಮಕ್ಕಳಿಗೆ ತಾಯ್ಮಾತಿನ ಶಿಕ್ಶಣ ಸಿಕ್ಕಿಲ್ಲ ಎಂಬುದನ್ನು ತೋರಿಸಿವೆ. ಅಂದರೆ ಮಕ್ಕಳು ಶಾಲೆ ಬಿಡುವುದಕ್ಕೆ ಮುಕ್ಯವಾದ ಒಂದು ಕಾರಣ ಪೆರಮಾತಿನ ಶಿಕ್ಶಣ. ಮಕ್ಕಳ ಮಾನಸಿಕತೆಯನ್ನು ಪೆರಮಾತಿನ ಶಿಕ್ಶಣ ಹೇಗೆ ನಕಾರಾತ್ಮಕ ಬೆಳವಣಿಗೆಗೆ ತಳ್ಳುತ್ತದೆ ಎಂಬುದನ್ನು ಈ ಮೊದಲು ಸಾಕಶ್ಟು ಮಾತನಾಡಿದೆ. ಇದರಿಂದಾಗಿ ಸಹಜವಾಗಿಯೆ ಮಕ್ಕಳು ಮಾನಸಿಕ ಉಲ್ಲಸಿತವಲ್ಲದ ವಾತಾವರಣದಿಂದ ಹೊರಬರಲು ಕಾತರಿಸುತ್ತಿರುತ್ತಾರೆ. ಹೀಗಾಗಿಯೆ ಬಹು ದೊಡ್ಡ ಸಂಕೆಯ ಮಕ್ಕಳು ಶಾಲೆ ಬಿಟ್ಟು ಹೋಗುತ್ತಾರೆ.

ಬಾರತದಾಗ ಇನ್ನೂ ಎಲ್ಲ ಮಕ್ಕಳು ಶಾಲೆಯ ಮೆಟ್ಟಿಲನ್ನು ಏರಿಲ್ಲ. ಶಾಲೆಗೆ ಬಂದ ಹೆಚ್ಚಾನುಹೆಚ್ಚು ಮಕ್ಕಳು ಪ್ರಾತಮಿಕ ಮತ್ತು ಇನ್ನೂ ಹೆಚ್ಚೆಂದರೆ ಪ್ರವುಡ ಶಾಲಾ ಹಂತದವರೆಗೆ ಮಾತ್ರ ಶಾಲೆಯಲ್ಲಿ ಉಳಿಯುತ್ತಾರೆ. ಪ್ರವುಡ ಶಾಲಾ ಹಂತದ ನಂತರ ಅರ‍್ದದಶ್ಟು ಮಕ್ಕಳು ಶಾಲೆಯನ್ನು ಬಿಟ್ಟುಬಿಡುತ್ತಾರೆ. ಉನ್ನತ ಹಂತದ ಶಿಕ್ಶಣಕ್ಕೆ ಬರುವವರ ಸಂಕೆ ತುಂಬಾ ಕಡಿಮೆ ಇದೆ. ಶಾಲೆಯನ್ನು ಬಿಡುವ ಮಕ್ಕಳ ಸಂಕೆ ದೊಡ್ಡ ಪ್ರಮಾಣದಲ್ಲಿ ಇದೆ. ಹೀಗೆ ಶಾಲೆಯನ್ನು ಬಿಟ್ಟು ಹೋಗುವ ಮಕ್ಕಳ ಸಂಕೆ ಹೆಚ್ಚಿರುವ ವಿವಿದ ಪ್ರದೇಶಗಳಲ್ಲಿ ಅದ್ಯಯನ ಮಾಡಿರುವ ಸಂಶೊದನೆಗಳು ಕಂಡುಕೊಂಡ ವಾಸ್ತವವೆಂದರೆ ಶಾಲೆ ಬಿಟ್ಟ ಮಕ್ಕಳಿಗೆ ಹೆಚ್ಚಾಗಿ ಪೆರಮಾತಿನ ಶಿಕ್ಶಣವನ್ನು ಕೊಡಲಾಗುತ್ತಿದೆ. ಮನೆಯಲ್ಲಿ, ಮನೆಯ ಸುತ್ತಲಿನ ಪರಿಸರದಲ್ಲಿ ಮಕ್ಕಳು ಅನುಬವಿಸುವ ಯಾವೂ ಶಾಲೆಯಲ್ಲಿ ದೊರೆಯುವುದಿಲ್ಲ. ಬದಲಿಗೆ ಒಂದು ಬಿನ್ನವಾದೊಂದು ಜಗತ್ತಿಗೆ ಮಕ್ಕಳನ್ನು ದೂಡಿದಂತಾಗುತ್ತದೆ.

ಇದರಿಂದ ಮಕ್ಕಳು ಮಾನಸಿಕವಾಗಿ ಸಹಜವಾಗಿಯೆ ವಿಚಲಿತರಾಗುತ್ತಾರೆ. ತಮ್ಮ ಸಾಮರ್‍ತ್ಯವನ್ನು ಕಳೆದುಕೊಂಡುಬಿಡುತ್ತಾರೆ. ಹೀಗಾಗಿ ಶಿಕ್ಶಣ, ಶಾಲೆ, ಪಟ್ಯ ಇವುಗಳಲ್ಲಿ ಆಸಕ್ತಿಯನ್ನೆ ಬೆಳೆಸಿಕೊಳ್ಳುವುದಿಲ್ಲ, ಇನ್ನು ಕೆಲವು ಸಂದರ‍್ಬಗಳಲ್ಲಿ ಆಸಕ್ತಿ ಕಡಿಮೆಯಾಗುತ್ತದೆ. ಶಿಕ್ಶಣದಲ್ಲಿ ಆಸಕ್ತಿ ಇಲ್ಲದ ಸ್ತಿತಿಯಲ್ಲಿ ಏನನ್ನೆ ಕೊಟ್ಟರೂ ಸಶಕ್ತವಾಗಿ ಮಕ್ಕಳು ಅದನ್ನು ಪಡೆದುಕೊಳ್ಳುವುದಿಲ್ಲ. ಹೀಗೆ ಮಕ್ಕಳು ಶಿಕ್ಶಣದಿಂದ ವಿಮುಕರಾಗುತ್ತಾರೆ. ಈ ಶಿಕ್ಶಣವಿಮುಕಿ ನಿಲುವು ನಿದಾನವಾಗಿ ಅವರ ಬದುಕನ್ನು ಇಡಿಯಾಗಿ ಆವರಿಸಿಕೊಳ್ಳುತ್ತದೆ. ಇದು ಬದುಕಿನ ಸೋತ ಸ್ತಿತಿಗೆ ಕಾರಣವಾಗುತ್ತದೆ, ಶಿಕ್ಶಣವನ್ನು ಸೂಕ್ತವಾಗಿ ಪಡೆದುಕೊಳ್ಳಲಾಗದ ಮಕ್ಕಳು ಇತರ ಮಕ್ಕಳೆದುರು ಸೋತವರಂತೆ ನಿಲ್ಲುವುದು ಮಕ್ಕಳ ಮನೊಸ್ತಯರ‍್ಯವನ್ನು ಕುಂಟಿತಗೊಳಿಸುತ್ತದೆ. ಇದು ಸಹಜವಾಗಿಯೆ ಅವರ ಇಡಿಯ ಬದುಕಿನ ಮೇಲೆ ಪ್ರಬಾವ ಬೀರುತ್ತದೆ. ಇದರಿಂದ ತಮ್ಮ ಸಹಜ ಸಾಮರ್‍ತ್ಯವನ್ನೂ ಮಕ್ಕಳು ಕಳೆದುಕೊಳ್ಳುವ ಸಾದ್ಯತೆ ಇರುತ್ತದೆ.

ಬಾರತದಲ್ಲಿ ಇಂಗ್ಲೀಶ್ ಮಾದ್ಯಮ ಮೋಹದಿಂದ ಮತ್ತು ಸಣ್ಣ ಸಣ್ಣ ಬಾಶೆಗಳಲ್ಲಿ ಶಿಕ್ಶಣ ಇಲ್ಲದಿರುವ ಸ್ತಿತಿಯಿಂದಾಗಿ ಹೆಚ್ಚಿನ ಮಕ್ಕಳು ಪೆರಮಾತಿನ ಶಿಕ್ಶಣವನ್ನು ಪಡೆದುಕೊಳ್ಳುತ್ತಿದ್ದಾರೆ. ಪ್ರಾತಮಿಕ ಶಾಲಾ ಹಂತದಲ್ಲಿಯೆ ಹೆಚ್ಚಿನ ಮಕ್ಕಳು ಶಾಲೆ ಬಿಡುತ್ತಾರೆ. ಅದರಲ್ಲಿಯೂ ಮುಕ್ಯವಾಗಿ ಸಾಮಾಜಿಕ ರಚನೆ ತುಂಬಾ ಬಿನ್ನವಾಗಿರುವ ಬುಡಕಟ್ಟು ಮಕ್ಕಳು ಹೆಚ್ಚಿನವರು ಶಾಲೆಯನ್ನು ಪ್ರಾತಮಿಕ ಶಾಲೆಯ ಆರಂಬದಲ್ಲಿಯೆ ಬಿಡುವುದು ಅತ್ಯಂತ ಸಾಮಾನ್ಯ. ಹಲವು ಬಾರಿ ಹೀಗೆ ಶಾಲೆ ಬಿಟ್ಟ ಮಕ್ಕಳು ಸಾಕಶ್ಟು ಚುರುಕುತನವನ್ನು ಹೊಂದಿರುವುದನ್ನು ಕಾಣಬಹುದು. ಆದರೆ, ಅವರ ಚುರುಕುತನವನ್ನು ಗುರುತಿಸುವ ಸಾಮರ್‍ತ್ಯ ಪೆರಮಾತಿನ ಶಿಕ್ಶಣಕ್ಕೆ ಇಲ್ಲವೆ ಪೆರಮಾತಿನ ಶಿಕ್ಶಣ ವ್ಯವಸ್ತೆಗೆ ಇರುವುದಿಲ್ಲ ಮತ್ತು ಆ ಚುರುಕುತನದಿಂದ ಶಿಕ್ಶಣದಲ್ಲಿ ಮುಂದುವರೆಯುವುದಕ್ಕೆ ಮಕ್ಕಳಿಗೆ ಸಾದ್ಯವಾಗಿರುವುದಿಲ್ಲ ಎಂಬುದನ್ನು ಸೂಕ್ಷ್ಮವಾಗಿ ಗಮನಿಸಬೇಕು. ಸಮಾಜದ ಹಲವರ ಬದುಕಿನಲ್ಲಿ ಬಿಕ್ಕಟ್ಟುಗಳನ್ನು ದಿನವೂ ಎದುರುಗೊಳ್ಳುವ ಸ್ತಿತಿ ಇದ್ದೆ ಇರುತ್ತದೆ. ಅವರಲ್ಲಿ ಚುರುಕುತನದ ಮಕ್ಕಳನ್ನೂ ಸಹಜವಾಗಿ ಎಲ್ಲರೂ ನೋಡಿರುತ್ತಾರೆ. ಆದರೆ ಈ ಮಕ್ಕಳೂ ಶಾಲೆಯಿಂದ ಶಿಕ್ಶಣವಿಮುಕಿಗಳಾಗಿ ಹೊರಬಿದ್ದವರು. ಇದಕ್ಕೆ ಕಾರಣ ಇಡಿಯಾಗಿ ತಮ್ಮದಲ್ಲದ ಇನ್ನಾವುದೊ ಒಂದು ಜಗತ್ತಿನಲ್ಲಿ ಬಂದು ಬಿದ್ದ ಅನುಬವಕ್ಕೆ ಮಕ್ಕಳು ಬರುತ್ತವೆ. ಇದು ಸಹಜವಾಗಿಯೆ ಮಕ್ಕಳಿಗೆ ಉಸಿರು ಬಿಗಿ ಹಿಡಿದ ಸ್ತಿತಿಗೆ ತಂದು ನಿಲ್ಲಿಸುತ್ತದೆ. ಉಸಿರಾಡುವ ಸಹಜ ಸ್ತಿತಿಗೆ ಮರಳುವ ತವಕ ವಯೋಸಹಜ ತವಕಗಳನ್ನು ಇಮ್ಮಡಿಸಿ ಶಾಲೆ ಬಿಡಲು ಕಾರಣಗಳಾಗುತ್ತವೆ.

ಪ್ರಾತಮಿಕ ಹಂತದ ಒಂದೆರಡು ವರುಶಗಳ ಶಾಲೆಯನ್ನು ಮುಂದುವರೆಸುವ ಮಕ್ಕಳು ಆನಂತರ ಪ್ರತಿವರುಶ ಒಬ್ಬೊಬ್ಬರಾಗಿ ಶಾಲೆ ಬಿಡುತ್ತಲೆ ಹೋಗುತ್ತಾರೆ. ದೊಡ್ಡ ನಗರಗಳ ಕತೆಯನ್ನು ಹೊರತುಪಡಿಸಿ ಓದು-ಬರಹ ಬಲ್ಲ ಬಹುತೇಕ ಬಾರತೀಯರು ತಮ್ಮ ಗೆಳೆಯರು ವಿವಿದ ಹಂತಗಳಲ್ಲಿ ಶಾಲೆ ಬಿಟ್ಟುಹೋಗಿರುವುದನ್ನು ನೆನಪಿಸಿಕೊಳ್ಳಬಹುದು. ಮಕ್ಕಳು ಶಾಲೆ ಬಿಡದಂತೆ ಒತ್ತಾಯದಿಂದ ಉಳಿಸಿಕೊಂಡು ಮುಂದುವರೆಸಿಕೊಂಡು ಬಂದಾಗಲೂ ಹೆಚ್ಚಿನ ಮಕ್ಕಳು ಮೊದಲ ಸಾಮಾನ್ಯ ಪರಿಕ್ಶೆಯವರೆಗೆ ಮುಂದುವರೆಯುತ್ತಾರೆ. ಪರಿಕ್ಶೆಯ ಪಲಿತಾಂಶವನ್ನೂ ನೋಡಲು ಹೋಗದೆ ಶಾಲೆಯಿಂದ ದೂರವಾಗುವವರೂ, ಪಾಸಾಗಿದ್ದರೂ ಶಿಕ್ಶಣ ಮುಂದುವರೆಸದ ಮಕ್ಕಳೂ ಹಲವರು ಸಿಗುತ್ತಾರೆ. ಶಾಲೆ ಬಿಡುವುದಕ್ಕೆ ಹಲವು ಕಾರಣಗಳಿರುವುದು ನಿಜವಾದರೂ ಅದಕ್ಕೆ ಶಾಲೆಯೂ ಕೂಡ ಒಂದು ಮಹತ್ವದ ಕಾರಣ ಎಂಬುದನ್ನು ಗಮನಿಸಬೇಕು. ಶಾಲೆಗೆ ಬಂದ ಅರ‍್ದಕ್ಕೂ ಹೆಚ್ಚು ಮಕ್ಕಳು ಮೊದಲ ಸಾಮಾನ್ಯ ಪರಿಕ್ಶೆಯಿಂದ ಶಿಕ್ಶಣವನ್ನು ಬಿಟ್ಟುಬಿಡುತ್ತಾರೆ. ಈ ಮೇಲೆ ಹೇಳಿದಂತೆ ಹೀಗೆ ಶಾಲೆ ಬಿಟ್ಟ ಮಕ್ಕಳಲ್ಲಿ ಬದುಕಿನಲ್ಲಿ ಯಶಸ್ಸನ್ನು ಪಡೆದವರ ಸಂಕೆಯೂ ದೊಡ್ಡ ಪ್ರಮಾಣದಲ್ಲಿ ಇರುತ್ತದೆ. ಆದರೆ ಅವರ ಈ ಸಾಮರ್‍ತ್ಯ ಪೆರಮಾತಿನ ಶಿಕ್ಶಣ ವ್ಯವಸ್ತೆಯಲ್ಲಿ ಮಾನ್ಯತೆಯನ್ನು ಪಡೆದಿರುವುದಿಲ್ಲ. ಹೀಗಾಗಿ ಶಾಲೆಯಿಂದ ಅವರು ಹೊರಗುಳಿಯುತ್ತಾರೆ.