ಬೆಂಗಳೂರು: 'ಇಂದಿನ ಯವ ಬರಹಗಾರರು ಸಮಾಜಮುಖಿಯಾದ ಸಾಹಿತ್ಯ ಸೃಷ್ಟಿಗೆ ಒತ್ತುಕೊಡಬೇಕು ಇದು ಸಂಬಂಧಗಳನ್ನು ಬೆಸೆಯುವ ಕೆಲಸ ಮಾಡುವಂತಾಗಬೇಕು' ಎಂದು ಕನ್ನಡ ಮತ್ತು ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಹಾಗೂ ಸಕ್ಕರೆ ಇಲಾಖೆ ಸಚಿವ ಸಿ.ಟಿ. ರವಿ ಹೇಳಿದ್ದಾರೆ.

ನಯನ ಸಭಾಂಗಣದಲ್ಲಿ ಕನ್ನಡ ಪುಸ್ತಕ ಪ್ರಾಧಿಕಾರ ಆಯೋಜಿಸಿದ್ದ, ಯುವ ಲೇಖಕರ ಚೊಚ್ಚಲ ಕೃತಿ ಬಿಡುಗಡೆ ಹಾಗೂ ಉಚಿತ ಪುಸ್ತಕ ವಿತರಣೆ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು. ’ಸಾಹಿತ್ಯ ಬರಹಗಾರನ ಬದುಕಿನ ತಲ್ಲಣಗಳ ಅಭಿವ್ಯಕ್ತಿ ಹೇಗೆಯೋ ಹಾಗೆ ಅದು ಸಮಾಜಕ್ಕೆ ಉತ್ತಮ ಸಂದೇಶ ಕೊಡುವ ಅರಿವನ್ನೂ ಇಟ್ಟುಕೊಂಡು ಸೃಷ್ಟಿಯಾಗಬೇಕು’ ಎಂದು ಅವರು ತಿಳಿಸಿದರು.

ಕೃತಿಗಳನ್ನು ಬಿಡುಗಡೆ ಮಾಡಿ ಮಾತನಾಡಿದ ಹೆಚ್.ಎಸ್. ವೆಂಕಟೇಶಮೂರ್ತಿ ಸಾಹಿತ್ಯ ಮತ್ತು ಕಲೆ ಅಂತರಂಗದ ಅನುಭವವನ್ನು ಭಾಷೆಯ ಮೂಲಕ ಅಭಿವ್ಯಕ್ತಿಸುತ್ತದೆ. ಅದು ಸಿದ್ದಿಯಾಗಬೇಕಾದರೆ. ಬರಹಗಾರ ಸಾಧನೆ ಮಾಡಬೇಕು, ಹಾಗೆಯೇ ಏಕಾಂತದಲ್ಲಿ ಅದನ್ನು ಆಸ್ವಾದಿಸಿ ಬರೆಯಬೇಕು. ಆದರೆ ಇಂದಿನ ಯುವ ಬರಹಗಾರರು ದಿಢೀರನೇ ಪ್ರಸಿದ್ಧಿಗೆ ಬರಬೇಕು ಎಂಬ ಧಾವಂತದಲ್ಲಿ ಪ್ರಚಾರ ಪ್ರಿಯತೆಗಾಗಿ ಬರೆಯಲು ಹೊರಡುತ್ತಾರೆ. ಅದು ಸಾಹಿತ್ಯಕ್ಕೆ ಅತ್ಯಂತ ಅಪಾಯಕಾರಿ, ಗಟ್ಟಿಯಾದ ಸಾಹಿತ್ಯ ಸೃಷ್ಟಿಯಾಗಬೇಕಾದರೆ ಆತ ಬದುಕಿನ ನೋವುಗಳನ್ನ ಕಂಡಿರಬೇಕು, ಅನುಭವಿಸಿರಬೇಕು. ಹಾಗಾಗಿ ಇಂದಿನ ಬರಹಗಾರರು ಪ್ರಚಾರಕ್ಕೆ ಹಾತೊರೆಯದೆ ಬದುಕನ್ನು ಅನುಭವಿಸಿ ಶ್ರದ್ದೆಯಿಂದ ವಿನಯಪೂರ್ವಕವಾಗಿ ಬರೆಯುವುದನ್ನು ಕಲಿಯಬೇಕು ಎಂದು ಹೇಳಿದರು.

ಬಿಡುಗಡೆಯಾದ ಪುಸ್ತಕಗಳು ಹಾಗೂ ಲೇಖಕರು