ಬಣ್ಣಗಳಾಟ

ಮುಗಿಲ ಮಳೆಬಿಲ್ಲೊಮ್ಮೆ ನಾನಾಗಿದ್ದೆ
ನಿನ್ನ ಹೊಂಗಿರಣಗಳಲಿ ಮಿನುಗುತಲಿದ್ದೆ 
ರವಿಯ ಎಳೆ ಕಿರಣಗಳ ಸೋಂಕಿನಲಿ
ಏಳೇಳು ವರ್ಣಗಳಲಿ ಗರಿಗೆದರಿದ್ದೆ

ನೇರಳೆ! ನೀಲ ಹಸಿರು! ಹಳದಿ! ಕಿತ್ತಳೆ ಕೆಂಪಿನ ಆಕಾರ!
ಸಮ್ಮಿಲನದ ಕ್ಷಣ ಮೂಡಿತ್ತು ಬಿಳಿಯ ಚಿತ್ತಾರ 
ನಿನ್ನ ಮೃದು ವಚನಗಳ ಹನಿಹನಿಯಿಂದ 
ನಭದಲಿ ಸ್ಫುರಿಸಿತೆನ್ನ ರಂಗೇರಿದ ಹೂಹಾರ

ನಾ ನವಿಲಾಗಿ ನಲಿನಲಿದು ಮೈಮರೆತಾಗ
ಮಳೆ ನಿಂತು ಮೋಡಗಳೆಲ್ಲ ಹನಿ ಕಳೆದುಕೊಂಡಾಗ
ಎನ್ನ ಹೊಳಪಿನ ಸೂರ್ಯನು ಅಸ್ತಮಿಸುತ್ತಾ 
ಹೊಳೆವ ನನ್ನ ಬಣ್ಣಗಳಾಟವ ಮರೆಯಾಗಿಸಿದನಾಗ

ನಾನಿಲ್ಲವಾದೆ. 
ಮತ್ತೆ ಮಳೆಯಾಗುವ ತವಕ.