ಗಜಲ್

ಗಜಲ್
ನಿನ್ನ ಮೌನ ಬಿಟ್ಟುಬಿಡು ನಮ್ಮಿಬ್ಬರ ಮನಗಳೆರಡು ಮಾತಾಡಲಿ ಸಖಿ
ನಿನ್ನ ಮೌನದ ಭಾಷೆಯನು ಏನೆಂದು ನಾ ಹಗೆ ತಿಳಿದುಕೊಳ್ಳಲಿ ಸಖಿ

ಮೌನದೂರ ಬಾಗಿಲ ಎಷ್ಟಂತ ಬಡಿಯುತ್ತಿರುವೆ ಹೇಳು ನಾ ಬಂದ ಸದ್ದು ಕೇಳಿಸದೆ
ನಿನ್ನ ಮೌನವನು ಮುರಿದು ಮಾತಾಗಿ ಬಾ, ನೀನೊಮ್ಮೆ ನನ್ನ ಜೊತೆಯಲಿ ಸಖಿ

ಬಿಂಕು ಬಿಗುಮಾನ ಸಿಟ್ಟುಸೆಡವುಗಳೆಲ್ಲವನು ಮರೆತು ಬಿಡು ನನ್ನೊಳಗಿನ ಕನಸು ನೀನು
ನಿನ್ನ ಮೌನಕ್ಕೆ ಭಾವಕ್ಕೆ ರೆಕ್ಕೆ ಮೂಡಿ ಇಂದೆ ನನ್ನೆದೆಗೆ ಹಾರಿಬಿಡಲಿ ಸಖಿ

ಈ ರಾತ್ರಿಗೆ ದೀಪ ಹಚ್ಚುವುದ ಮರೆತು ಕಾದು ಕೂತಿದ್ದೇನೆ ನಿನ್ನ ಬರುವಿಗಾಗಿ
ನಿನ್ನ ಮೌನದ ಬೊಗಸೆಯೊಳಗೆ ಬೆಳಕ ಬೀಜವಿಡಿದು ಬಂದು ಬಿಡು ಜೀವ ಕಾಯಲಿ ಸಖಿ

ನನ್ನ ಮನದ ಬಯಲ ತುಂಬ ನಿನ್ನ ಕಾಲಕಿರುಗೆಜ್ಜೆಯೇ ಮಾತತಂತೆ ಪಿಸುಗುಡುತಿವೆ
ನಗುವ ಚಂದಿರನ ಮುಂದೆ ಮೌನ ಸರಿಸಿ ಬಿಡು ‘ಪ್ರಕಾಶ’ನೊಳಗೆ ಹೂಗಳೆಲ್ಲ ಅರಳಲಿ ಸಖಿ