ಹೊಸ ಅವತಾರ

ಕಣ್ಣೀರ ಪ್ರವಾಹ ಹರಿಯುತಿದೆ
ಬಡತನದ ಕಹಿಘಮ ಎಲ್ಲೆಲ್ಲೂ ಬೀರುತಿದೆ 
ತುತ್ತಿನ ಚೀಲಕಾಗಿ ಯುದ್ಧವೇ ಮೊಳಗುತಿದೆ
ಬಿಸಿಲಿನ ಬೇಗೆ ಬೆಳುದಿಂಗಳೆನೆ ಕಳೆಯುತಿದೆ
ಬೆಳಕಿದ್ದೂ ಕತ್ತಲೆಯು ತುಂಬುತಿದೆ 
ಶಬ್ಧದ ಹಿಂದಿನ ನಿಶ್ಶಬ್ಧ ಗೌಣವಾಗುತಿದೆ

ಹೆಮ್ಮಾರಿಯು ಊದುತಿದೆ ರಣಕಹಳೆ
ಬೃಹತ್ನಗರಗಳ ಕಾವಬೇಗೆಯಲಿ ಬೆಂದವರು ಹೊರಟೇ ಹೊರಟಿದ್ದಾರೆ ಗುಳೆ 
ಆದರೂ ಚತುರ್ಮುಖ ಬ್ರಹ್ಮನು ತಲ್ಲೀನ 
ಶಾರದೆ ನುಡಿಸುವ ಇಂಚರದ ಪ್ರಾಣತಂತುವಿನಲೆ
ಶಿವೆಯಿಲ್ಲದೆ ಇರದ ಶಿವನಂತೂ ಮಗ್ನ 
ಅರ್ಧಾಂಗಿಯ ಕೂಡೆ ಸಲ್ಲಾಪದಲೆ 
ಹೃದಯಕಮಲದಲ್ಲೇ ಲಕ್ಷ್ಮಿಯನ್ನಿರಿಸಿಕೊಂಡ ಪದ್ಮನಾಭನು ನಗುತಿಹನು ಸುಖ ನಿದ್ರೆಯಲೆ

ಶಂಖ-ಚಕ್ರ, ತ್ರಿಶೂಲಗಳು ಸಾಲುತಿಲ್ಲ 
ಅಸುರನ ಸಂಹಾರಕೆ 
ಯಾವ ವಿರಾಟ್ ಸ್ವರೂಪದವತಾರ ತಾಳುವನೋ ಕಾಣೆ 
ಈ ದೈತ್ಯನ ನಿರ್ನಾಮಕೆ 
ಕಾದೇ ಕಾಯಬೇಕಿದೆ ಆ ಕ್ಷಣಕೆ......