ಕೂಗಲೊಂದು ಹೆಸರು ಕೊಡು

ಇರುವೆಲ್ಲ ಕಷ್ಟವಲ್ಲದಿದ್ದರೂ 
ಕೊಡು ಎನಗೆ ತಡೆಯುವಷ್ಟಾದರು
ತಡೆಯಲಾಗದಿರೆ ಕೂಗಿಡುವೆ ಹೆಗಲು ಕೊಡು 
ಕೂಗಲೊಂದು ಹೆಸರು ಕೊಡು

ಮೂಗನಾಗಿಬಿಡು ನನ್ನ ಕಷ್ಟ ಕಾಲದಲಿ
ಕಿವುಡನಾಗಿಬಿಡು ಕೆಲಕಾಲ ಕಷ್ಟ ಹೊಸದಿದ್ದಾಗ
ಕಷ್ಟಗತಿಸಲಿ ಸ್ವಲ್ಪವಾದರೂ ಹೇಗೋ
ಗತಿಸುವವ ನೀನೇ ನನ್ನ ಕೊನೆಗಾಲದಲಿ

ಹದಕೆ ಬರುವವರೆಗು ಹದದಲ್ಲೆ ಕಾಯಿಸು
ಸೀದು ಹೋಗುವ ಮುನ್ನ ಮಗುಚಿ ಮತ್ತೊಮ್ಮೆ ಬಾರಿಸು
ನೋಡಲು ಹೊರಗಿಂದ ಸುಡಲೂ ಯೋಚಿಸದಿರು
ಒಳಗಿಂದ ಅರೆಬೆಂದ ಹಿಟ್ಟಿನಂತೆ ಉಳಿಸದಿರು

ಕಷ್ಟ ನೀಡುವುದಕೆಲ್ಲ ನೀ ಜುಗ್ಗನಾಗದಿರು
ತಡೆದು ಬದುಕಕಾಗದಷ್ಟು ನಾ ಜೊಳ್ಳೇನಲ್ಲ
ಆಗೊಮ್ಮೆ ಈಗೊಮ್ಮೆ ಕಣ್ಣು ಮೇಲ್ ನೋಡಬಹುದು
ಆದರೆ ಕಷ್ಟಕೆ ಹೆದರುವವನಲ್ಲ ನೀನಿದ್ದರೂ ಇರದಿದ್ದರೂ