ಮನೆಯಾಕೆ

ನಾಲ್ಕು ಗೋಡೆಗಳಿಗೆ
ಒಡತಿಯಾದಾಕೆ
ಮನೆಕೆಲಸಗಳಲ್ಲಿ ನನ್ನನೇ
ಕಳೆದುಕೊಂಡಾಕೆ

ಹೊರಗಡಿಯಿಟ್ಟರೆ, 
ಮೂದಲಿಕೆಗಳ ಬರೆ
ಕೆಲಸವಿಲ್ಲದವಳೆಂಬ ಬಿರುದು ಬೇರೆ
ಬೇಜಾರೇನಿಲ್ಲ, ಬದುಕ ಸವೆಸಿದ್ದೇನೆ
ನನ್ನ ನಂಬಿದವರಿಗಾಗಿ

ಆದರೂ ಹೀಗೆ ಒಮ್ಮೊಮ್ಮೆ
ಮನದ ಮೂಲೆಯಲೆಲ್ಲೋ
ಎಚ್ಚೆತ್ತುಕೊಳ್ಳುತ್ತೇನೆ
ಕೊರಗುತ್ತೇನೆ
ನನಗಿದೆಲ್ಲ ಬೇಕಿತ್ತೆ? 
ಪ್ರಶ್ನಿಸಿಕೊಳ್ಳುತ್ತೇನೆ
ಒತ್ತಡ ಸಹಿಸದ ಉಸಿರು
ದೀರ್ಘ ಹೊರಡುತ್ತದೆ

ಏಣಿ ಏರಿ, ಬದುಕ ತುದಿ
ತಲುಪಿದವರೆಲ್ಲ, ತಕರಾರೇ ಇಲ್ಲದೆ
ದೂರ ಬಹುದೂರ ಹೊರಟಾಗಿದೆ

ಈಗ ಅಂದುಕೊಳ್ಳುತ್ತೇನೆ
 "ನನಗಾಗಿ ಬದುಕಬೇಕಿತ್ತು
ನನಗಾಗಿ ಬದುಕಬೇಕಿತ್ತು"