ಮೋಡ ಮತ್ತು ಮಳೆ

ಬಿಸಿಲಿನ ತಾಪಕೆ ಮರೆಯಾಗಿಹ ಮೋಡವೇ 
ಸ್ವಚ್ಛಂದ ಆಗಸವ ಆವರಿಸುತ ಬನ್ನಿ 
ಹನಿಗಾಗಿ ಕಾದಿಹ ಭುವಿಯ ತಂಪೆರೆಸಲು ಬನ್ನಿ
ಬಿರುಸಾಗಿ ಬನ್ನಿ ನವಚೈತನ್ಯವ ಹರಸುತ ತನ್ನಿ!!

ಗಾಳಿಯ ಸೂಸುತ ತಂಪನು ಚೆಲ್ಲುತ 
ಹಸಿರ ಕಾಂತಿಗೆ ಹೊಳಪನು ತನ್ನಿ
ಕೃಷಿಕನ ಬಾಳಲ್ಲಿ ಸಂತೃಪ್ತಿ ತರಲು 
ಮೋಡದಿ ಹನಿಯಾಗಿ ಇಳೆಗೆ ಬನ್ನಿ!!

ಮೇವಿಗಾಗಿ ಕಾದಿಹ ಮೂಕಪ್ರಾಣಿಗಳಿಗೆ 
ಅವುಗಳ ಒಡಲನು ತೃಪ್ತಿಪಡಿಸಲು  ಬನ್ನಿ
ಆಕಾಶದಿ ನಿನ್ನನೇ ದಿಟ್ಟಿಸಿ ನೋಡುತ ಕುಳಿತ 
ರೈತನ ಮೊಗದಿ ಸಂತಸ ತರಲು ಬನ್ನಿ!!

ಪ್ರಕೃತಿ ಸೌಂದರ್ಯ ಸೊಬಗ ಹೆಚ್ಚಿಸಲು 
ಬತ್ತಿದ ಕೆರೆ ಕಟ್ಟೆಗಳು ತುಂಬಲು ಬನ್ನಿ
ಖಗ ಮೃಗಗಳಿಗೆ ದಾಹ ತೀರಿಸಲು 
ಬನ್ನಿ ಬನ್ನಿ ಮಳೆಹನಿಹನಿಯಾಗಿ ಬನ್ನಿ!!