ನನ್ನ ಅಂಬೇಡ್ಕರ್

ನನ್ನ ಅಂಬೇಡ್ಕರ

ಮನುಸ್ಮೃತಿಗೆ ಸೆಡ್ಡೊಡೆದ ಮಾನವತಾವಾದಿ
ಬಾಯಿಲ್ಲದ ಜನಗಳ ಪರ ನಿಂತ ಮೂಕನಾಯಕ
ಬಹಿಷ್ಕೃತ ಭಾರತದ ಹಿತ ಕಾಯ್ದ ಭಾರತೀಯ
ಜೈ ಭೀಮ ನಿನಗಿದೋ ಎನ್ನ ನಮನ

ವೇದ ಕೇಳಿದ ಅಸ್ಪ್ರಶ್ಯ ಕಿವಿಗೆ ಸೀಸ ಹುಯ್
ಎಂದವರ ಮುಂದೆ ಪಾಶ್ಚಿಮಾತ್ಯಕೆ ಹೋಗಿ
ಸಾಲು ಸಾಲು ಡಿಗ್ರಿ ಪಡೆದ ಅಸಾಮಾನ್ಯ ಡಾಕ್ಟರ್
ಜೈ ಭೀಮ ನಿನಗಿದೋ ಎನ್ನ ನಮನ

ಮುಟ್ಟಬೇಡ, ದಾರಿಯಲಿ ನಡೆಯಬೇಡ, ನೀರು ಕೊಡೆವು
ಗಾಡಿಯಲಿ ಕೂರಬೇಡ, ಓದಬೇಡ, ಬರೆಯಬೇಡ, ನೋಡಬೇಡ
ಇಂತಹ ನೂರಾರು ಬೇಡಗಳನು ಸ್ವಾಭಿಮಾನದಿಂ ಮೆಟ್ಟಿದ
ಜೈ ಭೀಮ ನಿನಗಿದೋ ಎನ್ನ ನಮನ

ಭರತ ಹಿಂದೂ ಧರ್ಮ ವೈದಿಕರ ಅಡಿ ನರಳೆ
ಪಂಡಿತ ತಾನಾದರೂ ಜಾತಿ ಹಿಡಿದು ಮೂದಲಿಸೆ
ಹಿಂದೂ ಕವಲಕುಡಿ ಹಿಡಿದು ಮೇಲೆದ್ದ ದಮ್ಮ ಮೂರ್ತಿ
ಬುದ್ಧಂ ಶರಣಂ ಗಚ್ಛಾಮಿ ಎಂದ
ಜೈ ಭೀಮ ನಿನಗಿದೋ ಎನ್ನ ನಮನ

ನನ್ನ ಅಂಬೇಡ್ಕರನೇ ಇಲ್ಲಿ ಕೇಳು
ಬಹುದೂರ ಸಾಗಬೇಕಿದೆ ಇನ್ನೂ ನಾವು
ಎಲ್ಲ ಶೂದ್ರರಿಗೂ ನ್ಯಾಯ ಸಿಕ್ಕಿಲ್ಲ
ಎಲ್ಲ ಮಹಿಳೆಯರು ಸ್ವತಂತ್ರರಾಗಿಲ್ಲ
ಭೀಮಶಕ್ತಿಯನು ನಮ್ಮೊಳು ತುಂಬು
ಜೈ ಭೀಮ ಕೈ ಹಿಡಿದು ಎಮ್ಮ ನಡೆಸು