ನ್ಯೂಯಾರ್ಕಿಗೆ ನೆಗಡಿಯಾದರೆ

ನ್ಯೂಯಾರ್ಕಿಗೆ ನೆಗಡಿಯಾದರೆ
     (1)
ಮೈಯೆಲ್ಲ ಮಾರಿಜ್ವರ
ಪಿತ್ತನೆತ್ತಿಗೆರುವಂತೆ ತೈಲಸಮರ
ಒಣಮರಕ್ಕೆ ಜೋತಾಡುವ ಬಾವಲಿಯಂತೆ
ಜನಗಣ ಮನಗಳ ಜೀವಜಗತ್ತು.

ಜನರಲ್ ವಾರ್ಡಿಗೆ ಸೇರಿಸಿ
ನರದ ತುಂಬಾ ಹರಿಯುವ ಸಿರಂಜಿನ ಝರಿ
ಬತ್ತಿಹೋದ ಗಂಗೆ, ಯುಮನೆ ಕಾವೇರಿ...

      (2)
ಬೀಜಿಂಗಿಗೆ ಭೇದಿಯಾದರೆ
ಜನಗಣ ಮನಗಳ ಮೂಗಿಗೆ ಸುಗಂಧ ದ್ರವ್ಯ
ವಿಳಾಸರಹಿತ ವಾಸನೆಗಳ ಸಾಲು
ಬಂಜೆಗಳಿಗೆ ಜಪಾನಿ ತೈಲು
ಹರಿದ ಕರುಳ ಕಟ್ಟಲು ಲಂಡನಿನ ನೂಲು

ಮಕ್ಕಳ ಮೈಮೇಲೆಲ್ಲ
ಲಂಡನ್, ಬೀಜಿಂಗ್, ನ್ಯೂಯಾರ್ಕಿನ ಬಣ್ಣ
ಈಗ ಮಣ್ಣಿನ ವಾಸನೆಗೂ 
ಸೇಂಟೂ, ಪಪ್ಯೂಮುಗಳೇ ಬೇಕು !

ಈಗ ಮೂತ್ರವೆಲ್ಲವು ತೀರ್ಥ
ಸಕಲ ಮಲಕ್ಕೂ ಮದ್ದಿನರ್ಥ

       (3).
ಮೂಗುಕಟ್ಟಿದರೆ ಹಣದ ಪರಿಮಳ 
ಹೊಟ್ಟೆಯುಬ್ಬರಕ್ಕೆ ಡಾಲರಿನ ದೋಸೆ
ತಲೆಬೇನೆಗೆ ತುಕ್ಕಿಹಿಡಿದ ರೂಪಾಯಿ ನೋಟು
ಎಲ್ಲರು ಸುಖವಾಗಿದ್ದಾರೆ
ಸಾವಿನ ಮನೆಯಲ್ಲಿ...!

ಹೀಗೆ ರೋಗಬಿದ್ದ  ಕನಸುಗಳಿಗೆ
ಎಲ್ಲಿಂದ ತರುವುದು ತುಳಸಿ, ಶುಂಟಿ,
ಅಶ್ವಗಂಧ, ಅರಿಶಿನ ದಂಟು ?
ಈ ಕುಲಾಂತರಿ ಲೋಕಕ್ಕೆ
ಏನಾದರೂ ಹೇಳು ಧನ್ವಂತರಿ !