ಒಡನಾಡಿ

ಒಡನಾಡಿ

೧
ಹೇ ಮಲೆನಾಡಗಿತ್ತಿ, ಓ ಸೌಂದರ್ಯಗಿತ್ತಿ
ನೀನೆಷ್ಟು ಮೋಹಕ
ನಿನ್ನ ಅಂದ ಚಂದದ ವಿಸ್ಮಯಕ್ಕೆ
ಸಿಕ್ಕ ಬಹುಚಿಕ್ಕ ಮಿಡಿತ ನಾನು
ಮೈ ಮನಗಳ ಮರೆತ  ಮಲೆನಾಡಿಗ ನಾನು !

೨
ಇಲ್ಲಿರುವ ಗಿಡ ಮರಗಳು
ಬರೀ ಹಚ್ಚ ಹಸಿರಲ್ಲ
ಬೀಳ್ವ ಮಳೆ ಬರೀ ನೀರಲ್ಲ
ನಮಗವೋ ಒಡನಾಡಿ,
ನಮ್ಮೊಂದಿಗೆ ಬದುಕೋ ಜೀವನಾಡಿ.
ಹೇ ಶಂಕರ  ನೀನೆಂಥ ಜಾದುಗಾರ !

೩
ನಮ್ಮೊಡಲ ಆಸೆಗಳ ಗರಿಬಿಚ್ಚಿ
ನಿನ್ನೊಡಲ ಬಗೆದು ಬಿತ್ತಿ
ಬೆಳೆದ ಬೆಳೆ ಶುಂಠಿ ಅಡಿಕೆ ಜೋಳ ಹತ್ತಿ
ನಮ್ಮೆಲ್ಲಾ ಅನಾಚಾರ ಸಹಿಸಿ
ಸಲಹುತ್ತಿರುವೇ ಓ ಮಲೆನಾಡಗಿತ್ತಿ
ಕರುಣೆಯಲಿ ನೀ ಸಹಸ್ರ ಹೃದಯಗಿತ್ತಿ !

೪
ಬದುಕ ಹೊರೆಗೆ ಬೆಂದು
ಬಾಡಲಿಲ್ಲ ನಾವು ಎಂದು
ನೀ ಚೆಲುವ ಚಿತ್ರಗಳ ರಚಿಸಿ
ನಮ್ಮ ಗಮನ ಮರೆಸಿ
ನಮ್ಮಂತೆ ನಾವು ಬಾಳುತ್ತಿರುವೆವು
ಓ ಮಲೆನಾಡಗಿತ್ತಿ ನೀ ಮೋಹಕತೆ ಬಿತ್ತಿ !

೫
ಬಿದ್ದ ಮಳೆಯು ಸರ್ವರನ್ನು ತೋಯಿಸಿ ನಡುಗಿಸುವುದಿಲ್ಲಿ
ಹಚ್ಚ ಹಸಿರು ನೀಡುವುದು ಒಂದೇ ಉಸಿರಿಲ್ಲಿ
ಗುಡಿಸಲು ಭಂಗಲೆಗೆ ಹರಿಯುವುದು ಒಂದೇ ಬೆಳಕಿಲ್ಲಿ
ಬಡವ ಶ್ರೀಮಂತ ಬೇಧವಿಲ್ಲ ನಿನ್ನಲ್ಲಿ 
ಓ ಮಲೆನಾಡಗಿತ್ತಿ ನೀ ಸಮನ್ವಯಗಿತ್ತಿ