ತುಂಬಿದ ಮನೆ

ಮುಂಜಾನೆಯು ಮೂಡಿತ್ತು ಹೆಜ್ಜೆ ಗೆಜ್ಜೆ ಗಳ ಸದ್ದಲ್ಲಿ 
ಮನೆಯ ಮುಂದಿನ ಆವರಣವೆಲ್ಲ ಬಣ್ಣಗಳ ರಂಗೋಲಿ 
ಹಲವು ಕೈಗಳು ಸೇರಿ ಮೂಡಿದ ಗೆರೆಗಳಲ್ಲಿ 
ತುಂಬಿದ ಮನೆಯ ಕತೆಯು ಮೂಡಿತ್ತು ಸುಂದರ  ಸಾಲುಗಳಲ್ಲಿ 

ಅಡುಗೆಯ ಮನೆಯ ತುಂಬೆಲ್ಲ ಮಾತಾಡುವ ಕೈ ಬಳೆಗಳು 
ಅಡುಗೆಯ ನಡುವೆ ಮೂಡುವ ದಿನದೆಲ್ಲ ಮಾತುಗಳು 
ಕೋಪ ತಾಪ ಗಳಿಗೆ ಸ್ಥಳವಿಲ್ಲದ ಬಾಂಧವ್ಯದ ಮನಗಳು 
ತುಂಬಿದ ಮನೆಯ ಕೈ ತುತ್ತಲ್ಲಿ ಬೆರೆತಿತ್ತು ಎಲ್ಲರ ಹೃದಯಗಳು 

ಮನೆಗೆಲ್ಲ ಬೆಳಕಂತಿದ್ದ ಹಿರಿಯ ಎರಡು ಜೀವಗಳು 
ಅವರನ್ನೇ ಸೇರಿ ಹಬ್ಬಿದ್ದವು ಹಲವು ಬಳ್ಳಿಗಳು 
ಒಂದೊಂದು ಬಳ್ಳಿಯಲು ಬೇರೆ ಬಣ್ಣದ ಹೂಗಳು 
ಎಲ್ಲ ಸೇರಿ ತಂದಿದ್ದವು ತುಂಬಿದ ಮನೆಯೊಳಗೂ ಬೆಳದಿಂಗಳು 

ಮನೆಯ ತುಂಬಾ ಹರಿದಾಡುವ ಪುಟ್ಟ ಪುಟ್ಟ ಜೀವಗಳು 
ಮನೆಯ ತುಂಟಾಟಕೆಲ್ಲ ಇವರೇ ರಾಯಭಾರಿಗಳು 
ಆಗಾಗ ಕೇಳುವ ಇವರ ಮುನಿಸು,ನಗು ಅಳುವಿನ ಶಬ್ದಗಳು 
ತುಂಬಿದ ಮನೆಯ ಜೀವಗಳಿಗೆ ಇವರೇ ಕಣ್ಮಣಿಗಳು 

ಮನೆಯ ಆವರಣವೆಲ್ಲ ಪೂರ್ಣ ಎಲ್ಲರಿದ್ದೂ ಸಂಜೆಯಲಿ 
ಹಚ್ಚಿದ ದೀಪವು ನಗುವುದು ಆ ಪ್ರೀತಿಯ ಸಂತೆಯಲಿ 
ತೇಲಿದ್ದವು ಹಿರಿಯ ಮನಗಳು ಆ ಖುಷಿಯ ಭಾರದಲ್ಲಿ 
ತುಂಬಿದ ಮನೆಗೆ ಕಾಲಿಡಲು ನಿಂತಿದ್ದ ಚಂದ್ರನು ಸರತಿಯಲ್ಲಿ 

ಕೂಡಿ ಬಾಳಲು ಸಾಕು ಹೃದಯಗಳ ಒಪ್ಪಿಗೆ 
ತುಂಬಿದ ಮನಗಳೇ ಸಾಕ್ಷಿ ತುಂಬಿದ ಮನೆಗೆ…