ವೀರ ಯೋಧರು

ನಡುಕಟ್ಟಿ ನಿಂತಿಹರು ಗಡಿ ಹೊಣೆಯ ಹೊತ್ತು
ಧೃಡ ಯೋಧರಿವರು ನಮ್ಮ ತಾಕತ್ತು

ತಡವಿದರೆ ತಡವಿರದೆ ಬಿಡದೆಲೇ ಬಡಿವರು
ಸುಡು ಬಿಸಿಲು ಸಿಡಿಲು ಮಳೆ ಲಕ್ಕಿಸದೆ ದುಡಿವರು
ಹುಡು-ಹುಡುಕಿ ವೈರಿಗಳ ಗಡಿದಾಟಿ ಹೊಡೆದರು
ಕಡಲ ಹಿರಿಯಲೆಯಂತೆ ಮುನ್ನುಗ್ಗಿ ನಡೆದರು

ಉತ್ತರದ ಕೃತ್ಯಕೆ ಉತ್ತರವನಿತ್ತಿಹರು
ಉತ್ತಮ ರಾಷ್ಟ್ರಕೆ ಪ್ರಾಣವನೆ ಕೊಟ್ಟಿಹರು
ಸತ್ತಿಲ್ಲ ಸೈನಿಕರು ಅತ್ತಿಲ್ಲ ಹೆತ್ತವರು
ಮತ್ತಷ್ಟು ವೀರರಿಗೆ ನೆತ್ತರವ ಬಿತ್ತಿಹರು

ಎದುರಿರುವ ಗುರಿಯದುವು ಎಂದೆಂದು ತಪ್ಪಿಲ್ಲ
ಬೆದರಿರುವ ಅರಿ ತಾನು ಗೆರೆಯನ್ನು ಮೀರಿಲ್ಲ
ಹೆದರಿಕೆಯು ಹೊರಗಿರುವ ವೈರಿಯದು ಇನ್ನಿಲ್ಲ
ವಿಧಿಬರಹವಿದು ಏನೋ ಬೆನ್ನಿಗೆ ಕಣ್ಣಿಲ್ಲ

ತನುದಾನ ಗೈದರಿಗೆ ಮನದಿಂದ ನಮನ
ನೆನೆಬೇಕು ಅನುದಿನವು ಈ ತ್ಯಾಗ ಬಲಿದಾನ
ಜನನಿಯು ತಾನೇ ಹರಸಿಹಳು ತುಂಬಿ ಮನ
ಜನುಮದ ಪಾವನಕೆ ಬೇಕೇನು ಕಾರಣ