ಈ ರಾತ್ರಿ ಬುದ್ಧನಿಗಾಗಿ

ಈ ರಾತ್ರಿ ಬುದ್ಧನಿಗಾಗಿ ಕಾಯುತ್ತ ಕೂತೆ
ಬುದ್ಧ ಬರಲಿಲ್ಲ ನೀನು ಬಂದೆ
ಎಲೆಗಳು ಉದುರಿವೆ ಹಳದಿ ಚಿಟ್ಟೆಗಳಾಗಿ

ದೀಪ ಹೊತ್ತಿದ ಒಂಟಿಮನೆ ನಿನ್ನ ಡೇರೆಯಂತಲ್ಲ
ಕಾಡುಜೇನು ಕಾಡುಮೊಲ ಇಲ್ಲಿಲ್ಲ
ರಕ್ತ ಹಕ್ಕಳೆಗಟ್ಟಿದ ಸಮವಸ್ತ್ರ ಇನ್ನೂ ಸುಂದರವಾಗಿದೆ
ಹೆದರಬೇಡ ಔಷಧಿ ಕಟ್ಟುತ್ತೇನೆ ಗಾಯಕ್ಕೆ

ಕೈ ಬಿಟ್ಟರೆ ಹಿಡಿದುಕೊಳ್ಳಲು
ಇನ್ನೊಂದು ಕೈ ಇಲ್ಲ ನನಗೆ

ಒಂದು ಸಲ ಮಾತಾಡು ಒಂದೇ ನಿಮಿಷ ಮಾತಾಡು
ಎಂತಹ ಮುಳ್ಳಿಡಿದ ಮರಕ್ಕೂ
ಒಂದು ಕಾಲಕ್ಕೆ ಹೂ ಅರಳುತ್ತವೆ

ತೋಳದಿಂಬು ಮಡಿಲಹಾಸಿಗೆ ಹೆರಳಚಾದರ ಬೇಡ
ನಾನು ಬೇಡಿದ್ದು ಒಲವಿನ ಪಿಸುನುಡಿಗಳಿಗಾಗಿ
ಕೇವಲ ಒಂದು ನಿಮಿಷದ ಭಿಕ್ಷೆ
ಬೈಯಲ್ಲಿಕ್ಕಾದರೂ ಬಾಯಿ ತೆರಿ ಎಂದಿನಂತೆ

ಮಕ್ಕಳು ಕೇಳಿದರೆ
ಊರೂರಿಗೊಬ್ಬ ಚಂದ್ರ ಊರೂರಿಗೊಬ್ಬ ಸೂರ್ಯ ಎನ್ನುತ್ತಾರೆ
ನನ್ನ ಜೊತೆಗೊಬ್ಬ ಚಂದ್ರನಿದ್ದಾನೆಂದು ಯಾರಿಗೆ ಹೇಳಲಿ
ನನ್ನ ಜೊತೆಗೊಬ್ಬ ಸೂರ್ಯನಿದ್ದಾನೆಂದು ಹೇಗೆ ಹೇಳಲಿ

ಒಂದು ಮಂದಹಾಸಕ್ಕಾಗಿ
ಒಂದು ರೂಪಾಯಿ ಹಾಕಿದ ಹಾಗೆ ಭಿಕ್ಷುವಿಗೆ
ಒಮ್ಮೆ ಮಾತಾಡು
ದೀಪದ ಸುತ್ತ ಚಲಿಸುವ ಬೆಳಕಿನ ಮಣಿಗಳು
ಮಿಣುಕು ಹುಳುಗಳಾಗಿ ಹಾರುವ ಬುದ್ಧನ ಕಣ್ಣುಗಳು

ಈ ದೇಹಕ್ಕೆ ಸಂಬಂಧ ಅರ್ಥಗಳಿರುವುದಿಲ್ಲ
ದೇಹಗಳು ಬೆತ್ತಲಾದರೂ
ಮನಸುಗಳು ಬೆತ್ತಲಾಗಲಿಲ್ಲ
ಇಡೀ ವಿಶ್ವದಲ್ಲಿ ನಾವೆಷ್ಟು ಕುಬ್ಜರು

ಈ ಜಗತ್ತಿನಲ್ಲಿ ನಿನಗಾಗಿ
ಒಂದು ಬಾಗಿಲು ರೆಪ್ಪೆ ತೆರೆದೇ ಇದೆ
ಒಂದು ಕೈಯಲ್ಲಿ ರೊಟ್ಟಿ ಇನ್ನೊಂದು ಕೈಯಲ್ಲಿ ಕೋವಿ ಹಿಡಿದು
ಹುಚ್ಚು ಪಿರಂಗಿಯಂತೆ ಕಣ್ಮರೆಯಾಗದಿರು ಕಾಡಿನಲಿ

ಢಮ್..... ಢಮಾರ್....
ಏನೋ ಸುಟ್ಟವಾಸನೆ ಗಾಳಿಯಲಿ