Poem

ನನ್ನ ಕವಿತೆ

ರಾಗಿಯ ತೆನೆ ಹೀಚುವಾಗ 
ಜೋಳದ ತೆಲೆ ಸುಲಿಯುವಾಗ
ಸುಟ್ಟ ಕಾಳು ಜಗಿವಾಗ
ಹೊಮ್ಮುವ ಕಂಪು ನನ್ನ ಕವಿತೆ

ಹಿಟ್ಟಿನೆಸರು ಕುದಿಯುವಾಗ
ಮಳೆಯು ಹೊಯ್ದು ತೋಯ್ಸಿದಾಗ
ಹೊಮ್ಮುವ ಪರಿಮಳದಲ್ಲಿ ನನ್ನ ಕವಿತೆ

ಗಿಣ್ಣಾಲು ಕುದಿಯುವಾಗ
ಎಳೆಗರು ಚಂಗನೆ ನೆಗೆಯುವಾಗ
ಕರುವಿನ ಬಾಲದಂತೆ ಖುಷಿಯಿಂದ ಜಿಗಿಯುವುದು
ನನ್ನ ಕವಿತೆ

ಸೀಬೆ ಕಡಿದ ರುಚಿ
ನೆಲ್ಲಿಯ ಕಡಿದ ಹುಳಿ
ಹಲ್ಲಲ್ಲಿ ಝಮ್ ಎನುವ ಪದ 
ಮತ್ತೆ ನಾಲಗೆಯೊಳಗೆ ರಸವಾಡುವ ಆಸೆ
ನನ್ನ ಕವಿತೆ

ಹೊಂಬಾಳೆ ಬಿರಿದ ಘಮಲಿನ ತೋಟ
ಕೆಂದಳನೀರಿನ ಜೊತೆ
ಹಸುರಹೊದ್ದು ನಲಿಯುವಾಗ
ಬಿಮ್ಮನಸಿಯಂತುಲಿಯುವುದು 
ನನ್ನ ಕವಿತೆ

ಎಡಗೈಲಿ ಚಡ್ಡಿ ಇಡುಕೊಂಡು
ಬಲಗೈಲಿ ಟೈರು ಓಡಿಸಿ ನೆಗೆ ನಗೆದು ಓಡುವನು
ನಮ್ಮೂರ ಹುಡುಗ
ಅವಲ ಕಾಲಿನ ಹುಮ್ಮಸ್ಸು ನನ್ನ ಕವಿತೆ

ಮೈಯೆಲ್ಲ ಸೀಗೇಪುಡಿ
ಹೊತ್ತು ಮಾರುವ ಕೂಲಿ
ಅವನ ಬೆವರಲಿ ನನ್ನ ಅನ್ನದ ಕನಸು
ಅಪ್ಪ ಎನ್ನುವ ಅವನ ಛಲದೊಳಗೆ
ಮಗನಾಗಿ ಕರುಳ ನೇವರಿಸುತ್ತದೆ ನನ್ನ ಕವಿತೆ 

ಬಳೆ ಬೇಕೇನವ್ವ ಬಳೆ
ಬಟ್ಟೇ ಬೇಕೆನವ್ವ ಬಟ್ಟೆ ಕೂಗುವಾಗ 
ದಾರಿಯ ತುಂಬೆಲ್ಲಾ ಹಸಿವಿನದೇ ಹಬ್ಬ 
ಕೊಂಡವರ ಕೈ ತುಂಬ ಬಳೆಸದ್ದು ಕೇಳಿರಲು
ಹೊಟ್ಟೆ ತುಂಬಿದ್ದಷ್ಟೇ ಖುಷಿ

ಕಾಸಿಗೆ ಕಾಸು ಸೇರಿಸಿ
ಕಾಲಿನ ಬಲ ಸೇರಿಸಿ
ಮುಂದಿನೂರಿಗೆ ನಡೆವಾಗ
ಕನಸು ಕಟ್ಟಿದ್ದು,  ಮನಸು ಕಟ್ಟಿದ್ದು
ಅವ್ವಾ ಎನ್ನುವುದು ನನ್ನ ಕವಿತೆ..

ಆಡಿಯೋ
ವಿಡಿಯೋ

ಸತ್ಯಮಂಗಲ ಮಹಾದೇವ

ಕವಿ ಸತ್ಯಮಂಗಲ ಮಹಾದೇವ ಅವರು ಉಪನ್ಯಾಸಕರು. ತುಮಕೂರು ಜಯ ಸತ್ಯಮಂಗಲ ಗ್ರಾಮದ ದಲಿತ ಕುಟುಂಬದಲ್ಲಿ 1983ರಲ್ಲಿ ಜೂನ್ 12ರಂದು ಜನಿಸಿದರು. ತಂದೆ ರಾಜಣ್ಣ ಮತ್ತು ತಾಯಿ ಜಯಮ್ಮ. ಪದವಿ ವಿದ್ಯಾರ್ಥಿಯಾಗಿರುವಾಗಲೇ 2003ರಲ್ಲಿ ಕ್ರೈಸ್ಟ್ ಕಾಲೇಜು ಕನ್ನಡ ಸಂಘ ಏರ್ಪಡಿಸಿದ ಆಂತರಕಾಲೇಜು ಕವನ ಸ್ಪರ್ಧೆಯಲ್ಲಿ "ಡಾ. ದ.ರಾ ಬೇಂದ್ರೆ ಸ್ಮೃತಿ ಪ್ರಶಸ್ತಿ" ಹಾಗೂ 2015 ನೇ ಸಾಲಿನ 'ಸಂಚಯ ಸಾಹಿತ್ಯ ಪ್ರಶಸ್ತಿ' ಪಡೆದುಕೊಂಡ ಪ್ರತಿಭಾನ್ವಿತ ಕವಿ. 2005ರಲ್ಲಿ ವಿದ್ಯಾರ್ಥಿಯಾಗಿದ್ದಾಗಲೇ 'ಭಾವತೀರದ ಹಾದಿಯಲ್ಲಿ' ನಂತರ 2011ರಲ್ಲಿ 'ಹೆಜ್ಜೆ ಮೂಡಿದ ಮೇಲೆ' ಎಂಬ ಎರಡು ಕವನ ಸಂಕಲನಗಳಿಂದ ಗಮನ ಸೆಳೆದ ಕವಿ, ಕಾವ್ಯವೇ ತನ್ನ ಹಾದಿಯೆಂದು ಗುರುತಿಸಿಕೊಂಡವರು. ಕಾವ್ಯಕೃಷಿಯ ಜೊತೆಗೆ ವಿದ್ಯಾರ್ಥಿ ದಿಸೆಯಿಂದ ಎಡಪಂಥೀಯ ಚಳುವಳಿಗಳಲ್ಲಿ ಸಕ್ರಿಯರಾಗಿರುವ ಇವರು ಕಾವ್ಯ ಮತ್ತು ಸಾಮಾಜಿಕ ಬದ್ಧತೆಯ ಜೀವಪರ ಚಿಂತನೆಗಳಿಂದ ಪ್ರೇರಿತರಾಗಿ ಅದನ್ನು ತಮ್ಮ ಬರಹ ಮತ್ತು ಬದುಕಿನಲ್ಲಿ ಅಳವಡಿಸಿಕೊಂಡಿದ್ದಾರೆ. ನಾಡಿನ ಪ್ರಸಿದ್ದ ಪತ್ರಿಕೆಗಳಲ್ಲಿ ಗಮನಾರ್ಹ ಎನಿಸುವಂಥ ಹತ್ತಾರು ಕವನ ಮತ್ತು ಲೇಖನಗಳು ಪ್ರಕಟವಾಗಿವೆ. ಇವರು ಬೆಂಗಳೂರು ವಿಶ್ವವಿದ್ಯಾಲಯದಿಂದ ಎಂ.ಎಸ್ಸಿ ಮನೋವಿಜ್ಞಾನ ಮತ್ತು ಎಂ.ಎ. ಕನ್ನಡ ಪದವಿ ಪಡೆದ ಹಿರಿಮೆ ಇವರದು. ಪಿಹೆಚ್.ಡಿ ಸಂಶೋಧನಾ ವಿದ್ಯಾರ್ಥಿಯಾಗಿ ಸಂಶೋಧನಾ ಕಾರ್ಯ ಮುಂದುವರೆಸಿರುವ ಅವರು ಬೆಂಗಳೂರಿನ ಶೇಷಾದ್ರಿಪುರಂ ಕಾಲೇಜಿನಲ್ಲಿ ಕನ್ನಡ ಉಪನ್ಯಾಸಕರಾಗಿ ಕಾರ್ಯವನ್ನು ನಿರ್ವಹಿಸುತ್ತಿದ್ದಾರೆ.

More About Author

Comments

Magazine
With us

Top News
Exclusive
Top Events