ನೆನಪಾಗಿ ಕಾಡಬಹುದು

ಕೂದಲು ನೆರೆತಾಗ,
ಕಣ್ಣುಗಳಲ್ಲಿ ಗುಳಿ ಬಿದ್ದಾಗ,
ಕಿವಿ ಕೇಳದಂತಾದಾಗ,
ಮುಖದಲ್ಲಿ ಸುಕ್ಕುಗಳು ಕಾಣಿಸಿದಾಗ,
ಎದೆ ಜೋತು ಬಿದ್ದಾಗ,
ಬೆನ್ನು ಬಾಗಿದಾಗ,
ಮೈ ನಡುಗುವಾಗ,
ನಡೆಯಲಾರದೆ ನಡೆಯುವಾಗ
ನೆನಪಾಗಿ ಕಾಡಬಹುದು.

ಬಣ್ಣಿಸುವವರ
ಬಣ್ಣ ಕಳಚಿದಾಗ,
ಆಷಾಡಭೂತಿಗಳ
ಸಂಚಿಗೆ ಬಲಿಯಾದಾಗ,
ಆಶ್ರಯದ ಆಮಿಷ ಒಡ್ಡಿದವರು
ಬೆನ್ನು ತೋರಿಸಿದಾಗ
ನೆನಪಾಗಿ ಕಾಡಬಹುದು.

ಕೂಡಿ ಬಾಳುವವರ,
ಬೇರಾಗಿ ಮತ್ತೆ ಬೆರೆತವರ,
ಜೊತೆಯಾಗಿ ಸಂತೆ ಮುಗಿಸಿದವರ
ನೋಡಿದಾಗಲೆಲ್ಲ
ನೆನಪಾಗಿ ಕಾಡಬಹುದು.

ಕ್ಷಣಗಳ ಎಣಿಸುತ್ತಿರುವಾಗ,
ಏದುಸಿರು ಬಿಡುತ್ತಿರುವಾಗ,
ಬಾಯಿ ಪಸೆಯಿಲ್ಲದಂತಾದಾಗ
ನೆನಪಾಗಿ ಕಾಡಬಹುದು.

- ರೇವಣಸಿದ್ದಪ್ಪ ಜಿ.ಆರ್.