ನಿಲ್ಲದ ಘಳಿಗೆ

ಆಕೆಯ ಹೊಟ್ಟೆ ಸಿಡಿದಿತ್ತು
ಜ್ವಾಲಾಮುಖಿಯ ಲಾವಾದಂತೆ
ಕಣ್ಣೀರ ಹನಿ ಅಂಬುಧಿಗೆ
ಸವಾಲೊಡ್ಡಿದ ದುಃಖ
ಪಾತಾಳಕ್ಕೂ ತಲುಪಿದ ನಿಟ್ಟುಸಿರು
ಕೇಳಿಸಿತು ದೇವ ದೇವತೆಗಳಿಗೂ

ಬಂದ ಬಹುಸಂಖ್ಯಾತ ಆತ್ಮೀಯರೂ
ಕೈ ಚೆಲ್ಲಿ ಸಮಾಧಾನಿಸಲು ಸೋತು
ಕಣ್ಣೀರೊಂದಿಗೆ ತಮ್ಮ ಕಣ್ಣೀರ ಸೇರಿಸಿ
ದಿಗಿಲುಗೊಂಡು ನೋಡುವುದು
ಉಳಿದ ಏಕೈಕ ಸಂಭವ
ಸಾಧ್ಯತೆಗಳು ಅಸಾಧ್ಯ ಆದ ಘಳಿಗೆ

ಇನನ ಸುಪ್ರಭಾತದೊಂದಿಗೆ
ಕಣ್ಣ ಬಿಟ್ಟ ಮಗು, ಮುಗಿಸಿ
ನಿತ್ಯಕರ್ಮ, ಅರ್ಧ ಗ್ಲಾಸ್ ಕ್ಷೀರ
ಕಣ್ಣು ಮಿಟುಕಿಸುತ್ತ ಅವಸರದಿ ಕುಡಿದು
ಡಬ್ಬಿ, ನೀರು ಬ್ಯಾಗ್ ಹೊತ್ತು
ಇಷ್ಟಗಲದ ಕುಸುಮ ನಗೆ ಅಂಗಳದಲ್ಲಿ ಚೆಲ್ಲಿ
ಅಪ್ಪನ ಜೊತೆ ಗಾಡಿಯ ಮೇಲೆ

ದಿನವೂ ಕರೆಯಲು ಬರುವ ಅಪ್ಪ
ಅದ್ಹೇಗೆ ಬೇರೆ ಕಂಡ ಶಾಲಾ ನಂತರ
ಆಚೆ ಇದ್ದ ಅಪ್ಪನನ್ನು ಕಂಡಿದ್ದೆ
ಒಮ್ಮೆಲೇ ಓಡಿ ವ್ಯಸ್ತ ರಸ್ತೆ
ಯಮರೂಪಿ ಕಾರ್ ಗಾಲಿಯ ಕೆಳಗೆ
ಹೌಹಾರಿ ಸ್ತಬ್ಧ ನಿಂತ ಅಪ್ಪ

ಈಗ ಬರುವ ಪುಟ್ಟ ಮಗ
ಕಾದ ತಾಯಿಗೆ ಕಳೇಬರದ ದರುಶನ
ಗುಂಡು ಹೊಕ್ಕ ಸ್ಥಿತಿಯ ಆಕೆ
ಎವೆಯಿಕ್ಕದೇ ಎರಡೂ ಕೈಯಲ್ಲಿ
ಹಿಡಿದು, ಮಗು ಹುಟ್ಟಿದ ಕ್ಷಣ
ಸಂಭ್ರಮ ಅರೆಗಳಿಗೆ ನೆನಪಿಸಿಕೊಂಡು

- ಮಾಲಾ.ಮ.ಅಕ್ಕಿಶೆಟ್ಟಿ, ಬೆಳಗಾವಿ.