ಸಾಗಬೇಕಿದೆ

ಚಂಚಲತೆಯ ತೊರೆದು
ಬಿಗುಮಾನವ ಒರೆದು
ಅಹಂಕಾರವ ಅರೆದು
ಸಾಗಬೇಕಿದೆ ಛಲದಿಂದ

ಆತ್ಮಸ್ಥೈರ್ಯದಿ ಅಡಿಯಿಟ್ಟು
ಸೃಜನಾತ್ಮಕತೆಯಲ್ಲಿ ಚಿತ್ತವಿಟ್ಟು
ಪ್ರತಿಕಾರ್ಯದಲ್ಲಿ ಲಕ್ಷ್ಯವಿಟ್ಟು
ಸಾಗಬೇಕಿದೆ ಜಾಗರೂಕತೆಯಿಂದ

ಟೀಕೆಗಳ ಕೇಳಿ ಕಿವುಡನಂತೆ
ಅವಮಾನಗಳಿಗೆ ಮೂಕನಂತೆ
ಕೆಡುಕುಗಳಿಗೆ ಗಾಂಪನಂತೆ
ಸಾಗಬೇಕಿದೆ ಸಂಯಮದಿಂದ

ಅಡ್ಡಿ ಆತಂಕಗಳ ದಾಟಿ
ಮೂಢ ಆಚರಣೆಗಳ ಮೆಟ್ಟಿ
ವ್ಯಯ ವಿಕೋಪಗಳ ಅಟ್ಟಿ
ಸಾಗಬೇಕಿದೆ ಕೆಚ್ಚೆದೆಯಿಂದ

ಸಕಾರಾತ್ಮಕ ಭಾವದೊಂದಿಗೆ
ಪ್ರಾಮಾಣಿಕ ಪ್ರಯತ್ನದೊಳಗೆ
ನಾಳೆಯ ನಂಬಿಕೆ ಜೊತೆಗೆ
ಸಾಗಬೇಕಿದೆ ನಿಷ್ಠೆಯಿಂದ

ನೆನ್ನೆ ನಾಳೆಗಳ ಚಿಂತೆಯಿಲ್ಲದೆ
ಏರು ಪೇರುಗಳ ಬಂಧವಿರದೆ
ಸೋಲು ಗೆಲುವುಗಳ ಭೀತಿಯಿರದೆ
ಸಾಗಬೇಕಿದೆ ಮುಗುಳ್ನಗೆಯೊಂದಿಗೆ.

-ಪೂಜಾ ಎಂ ಪಿ