Poem

ಸತ್ತ ಭಾಷೆ.. 

ಮರಕ್ಕೂ ಒಂದು ಭಾಷೆ ಇದೆ
ಅದು ತನ್ನ ವರ್ಣಮಾಲೆಯನು ಇಷ್ಟಿಷ್ಟೆ ಎಲೆ‌ ಮೇಲೆ
ತಿದ್ದಿ ತಿದ್ದಿ ಕಲಿತಿದೆ
ನೀವು ಹೂ ಹಣ್ಣು ಚಿಗುರುಗಳಲಿ ಅದರ
ಕವಿತೆಗಳನ್ನೂ ಓದಬಹುದು..

ಗಾಳಿಗೂ ಗೊತ್ತು ಮರದ ಎದೆಯ ಭಾಷೆ
ಆಗಾಗ ತಡವಿ ತಡವಿ ಮಾತಾಡಿಸಿ
ಹೂವಿನ ಕವಿತೆ ಓದುತ್ತದೆ
ಚಿಗುರಿನ ಹಾಡು
ಹಣ್ಣಿನ ಮೋಹಕ ಕತೆಗಳನು ಕೇಳುತ್ತದೆ..

ಕಳಚುವ ಎಲೆಯನು ತಬ್ಬಿ
ಲಾಲಿ ಹಾಡಿ‌ ಮೆಲ್ಲಗೆ ನೆಲಕ್ಕಿಳಿಸಿ
ಸಮಾಧಾನಿಸುತ್ತದೆ..

ಹೋಗುವುದಿಲ್ಲ ಮರಗಳು ಎಲ್ಲಿಗೂ
ಅವುಗಳ ಮಾತು ಬಯಸಿ ಹಕ್ಕಿಗಳೆ
ಓಡಿ ಬರುತ್ತವೆ
ಕವಿತೆಯಾಸೆಗೆ, ಕತೆ ಅಸೆಗೆ
ಕಚಗುಳಿಯಿಟ್ಟು ಮರವನು ನಗಿಸುತ್ತವೆ
ಹೇಳಿ ಹೇಳಿ ಮರುಗುತ್ತವೆ ಲೋಕದ ಸುದ್ದಿಯನು
ಹಾಡು ಕೇಳಿ ಕೇಳಿ ಸಂಕಟ ಮರೆಯುತ್ತವೆ..

ಮಳೆಗೂ ಬಿಸಿಲಿಗೂ ಮತ್ತೇಕೆ
ಹಸಿ ಇಬ್ಬನಿಗೂ ಗೊತ್ತು ಮರದ ಭಾಷೆ
ಅವು ಕೂಡಿಕೊಂಡು
ಮಾತಾಡಿಕೊಂಡು
ಸದಾ ನಗುತ್ತವೆ, ಬೆರೆಯುತ್ತವೆ..

ಅತೀ ಸರಳ‌ ಮರದ ಭಾಷೆ,
ಇಲ್ಲಿ ಈ ಮನುಷ್ಯನಿಗೆ ಅರ್ಥವಾಗುವುದಿಲ್ಲ
ಅವನೆದೆಯಲ್ಲಿ ಹೂವಿಲ್ಲ ಚಿಗುರಿಲ್ಲ
ಮಳೆ, ಹದ ಮಣ್ಣು ಯಾವುದಿಲ್ಲ!
ಇಲ್ಲಿ ಅವನದೇ ಒಂದು ಭಾಷೆ ಇದೆ
ಪ್ರೀತಿಯಿಲ್ಲದ
ಹೃದಯವಿಲ್ಲದ
ಜೀವವಿಲ್ಲದ
ಸತ್ತ ಭಾಷೆ...

ಪಾಪ ಪದಗಳ ಕಳೇಬರವನ್ನು ಸಿಂಗರಿಸಿಕೊಂಡು
ಹೆಗಲ ಮೇಲೆ
ಹೊತ್ತು ಹೊತ್ತು ಸುಸ್ತಾಗಿದ್ದಾನೆ

ಅವನ ಎದೆಯೊಳಗೂ ಒಂದು ಭಾಷೆ
ಇರಬಹುದೇನೊ
ಅವನಿಗವನೇ
ಪಾಪ ಕಿವುಡಾಗಿದ್ದಾನೆ..
ಮೂಕನೂ!

-ಸದಾಶಿವ್ ಸೊರಟೂರು.

ಸದಾಶಿವ್ ಸೊರಟೂರು

ಸದಾಶಿವ್ ಸೊರಟೂರು ಅವರು ಜನಿಸಿದ್ದು 1983 ಜೂನ್ 18ರಂದು. ದಾವಣಗೆರೆ ಜಿಲ್ಲೆ ಹೊನ್ನಾಳಿ ತಾಲ್ಲೂಕಿನ ಸೊರಟೂರಿನವರಾದ ಸದಾಶಿವ ಪ್ರಸ್ತುತ ಚಿಂತಾಮಣಿ ತಾಲ್ಲೂಕಿನ ದೊಡ್ಡಬೊಮ್ಮನಹಳ್ಳಿ ಪ್ರೌಢಶಾಲೆಯಲ್ಲಿ ಕನ್ನಡ ಶಿಕ್ಷಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಬರವಣಿಗೆಯಲ್ಲಿ ಅಪಾರ ಆಸಕ್ತಿಯುಳ್ಳ ಸದಾಶಿವ್ ಅವರು ಕನ್ನಡ ದಿನಪತ್ರಿಕೆಗಳಿಗೆ ಹಲವಾರು ಲೇಖನ ಹಾಗೂ ಅಂಕಣಗಳನ್ನು ಬರೆದಿದ್ದಾರೆ. 

ಇವರ ಪ್ರಮುಖ ಕೃತಿಗಳೆಂದರೆ ಕನಸುಗಳಿವೆ ಕೊಳ್ಳುವವರಿಲ್ಲ, ಹೆಸರಿಲ್ಲದ ಬಯಲು, ಕನಸುಗಳಿವೆ ಕೊಳ್ಳುವವರಿಲ್ಲ, ಹೊಸ್ತಿಲಾಚೆ ಬೆತ್ತಲೆ, ತೂತು ಬಿದ್ದ ಚಂದಿರ ಮುಂತಾದವು.

More About Author