ತುಂಬು ಬಸಿರಿಗೂ ಬಂಜೆತನ ಬಂದಂತಿದೆ

ಒಲುಮೆಯ ಅಕ್ಷಯಪಾತ್ರೆಗೆ ಪ್ರೀತಿಯ ಬರಬಂದಿದೆ
ಸಾಗರದ ಅಲೆಗೂ ಒಂಟಿತನ ಕಾಡಿದೆ
ಶುರುವೇ ಆಗದಂತ ಕಥೆಗೆ ಪೂರ್ಣವಿರಾಮ ಬಿದ್ದಂತಿದೆ
ಕಚಗುಳಿ ಇಟ್ಟ ಕೈಗಳೇಕೋ ಮರಗಟ್ಟಿದಂತಾಗಿದೆ

ಕಾರಣವೇ ಇಲ್ಲದೇ ನಿರ್ಗಮಿಸಿದ್ದಕ್ಕೆ ಕಾರಣ ಬೇಕಿದೆ
ಮತ್ತೆ ಮತ್ತೆ ಮರುಕಳಿಸುವ ನೆನಪಿಗೆ ಮರೆವಾಗಬೇಕಿದೆ
ಕಣ್ಣ ಮುಂದಿನ ಕನಸುಗಳಿಗೆ ಜೊಂಪು ಬಂದಂತಿದೆ
ತಿರುಗಿ ಬರುವೆ ಎಂಬ ಭ್ರಮೆ ಜೋರಾಗಿದೆ

ಅಳಿದು ಉಳಿದ ನೆನಪುಗಳ ಮೂಟೆ ಕಟ್ಟುತ್ತಿದ್ದೇನೆ
ಕೈಗಳೇಕೋ ಶಕ್ತಿ ಇಲ್ಲದೇ ಕುಸಿಯುತ್ತಿವೆ
ಭಾರವಾದ ಮೂಟೆಯನ್ನೇನೋ ಹೊತ್ತುಬಿಡುವೆ
ನೀನೇ ತುಂಬಿರುವ ಹೃದಯದ ಕಥೆಯೇ ಕಷ್ಟವಾಗಿದೆ

ನೀ ಬಿಟ್ಟು ಹೋದ ಕಾರಣಕ್ಕೋ ಏನೋ
ತುಂಬು ಬಸಿರಿಗೂ ಬಂಜೆತನ ಆವರಿಸಿದೆ
ನನ್ನ ಸ್ಥಿತಿಯ ನಾನೇ ನೆನೆದು ಕರುಣೆ ಉಕ್ಕಿದಂತಿದೆ
ಕಣ್ಣೀರ ಕಡಲಿಗೂ ಕೊನೆ ಮೊದಲು ಬೇಕಿದೆ