About the Author

ಚಾಮರಾಜನಗರ ಜಿಲ್ಲೆ ಮತ್ತು ತಾಲೂಕಿನ ಸಿದ್ದಯ್ಯನಪುರ ಗ್ರಾಮದವರಾದ ಕಿರಣ್ ಗಿರ್ಗಿ(1992) ಸೃಜನಶೀಲ ರಂಗ ನಿರ್ದೇಶಕ, ನಟ, ಸಂಗೀತ ಸಂಯೋಜಕ ಹಾಗೂ ಕವಿ. ‘ನ್ಯಾಣ’ ಕವಿತೆಗಳು ಇವರ ಚೊಚ್ಚಲ ಸಾಹಿತ್ಯ ಕೃತಿ. ಕಿರಣ್‌ ಕುಮಾರ್ ಎಸ್.ಕೆ. ಎಂಬುದು ಇವರ ಮೂಲ ಹೆಸರಾಗಿದ್ದರೂ ಕಿರಣ್ ಗಿರ್ಗಿ ಅಂತಲೇ ಚಿರಪರಿಚಿತರು. ಶಿಕ್ಷಣದಲ್ಲಿ ಡಿಪ್ಲೊಮಾ(ಡಿ.ಎಡ್.) ವಿದ್ಯಾರ್ಹತೆ ಹೊಂದಿದ ಇವರು ಮೈಸೂರಿನ “ಭಾರತೀಯ ರಂಗಶಿಕ್ಷಣ ಕೇಂದ್ರ-ರಂಗಾಯಣ”ದಲ್ಲಿ 2012-13ನೇ ಸಾಲಿನ ರಂಗಾಭ್ಯಾಸಿಯಾಗಿ ‘ಡಿಪ್ಲೊಮಾ ಇನ್ ಥಿಯೇಟರ್ ಎಜುಕೇಷನ್’ ಕೋರ್ಸ್ ಮುಗಿಸಿ ರಂಗಾಯಣದ ಕಿರಿಯ ಕಲಾವಿದರಾಗಿ, ತಂತ್ರಜ್ಞರಾಗಿಯೂ ಕೆಲಸ ನಿರ್ವಹಿಸಿದ್ದಾರೆ. ‘ರಂಗಶಂಕರ, ಬೆಂಗಳೂರು’ 2018ರಲ್ಲಿ ಆಯೋಜಿಸಲಾಗಿದ್ದ ‘ರಂಗ ನಿರ್ದೇಶನ ತರಬೇತಿ’ಯನ್ನು ಪಡೆದಿದ್ದಾರೆ. ಚಾಮರಾಜನಗರದ ಎಂ.ಸಿ.ಎಸ್. ಪಬ್ಲಿಕ್ ಶಾಲೆ ಹಾಗೂ ಮೈಸೂರಿನ ‘ಅರಿವು’ ಕನ್ನಡ ಶಾಲೆಯಲ್ಲಿ ನಾಟಕ ಶಿಕ್ಷಕ ಮತ್ತು ಪ್ರಾಥಮಿಕ ತರಗತಿ ಶಿಕ್ಷಕರಾಗಿ ಕರ್ತವ್ಯ ನಿರ್ವಹಿಸಿದ್ದಾರೆ.

ಸಂಕ್ರಾಂತಿ, ಭಗವದಜ್ಜುಕೀಯಂ, ಚಿಕ್ಕದೇವ ಭೂಪ, ವಸಂತಯಾಮಿನೀ ಸ್ವಪ್ನ ಚಮತ್ಕಾರ(ಎ ಮಿಡ್ ಸಮ್ಮರ್ ನೈಟ್ಸ್ ಡ್ರೀಮ್), ಹ್ಹ...!!!, ಷೈಲಾಕ್(ವೆನಿಸ್ಸಿನ ವ್ಯಾಪಾರ), ಮಧ್ಯಮ ವ್ಯಾಯೋಗ, ಗೊಂಬೆ, ಸದ್ಯಕ್ಕಿದು ಹುಚ್ಚರ ಸಂತೆ, ಕಂಸಾಯಣ, ಮುಂತಾದ ನಾಟಕಗಳಲ್ಲಿ ಅಭಿನಯಿಸಿದ್ದಾರೆ. ಮೈಸೂರು, ಚಾಮರಾಜನಗರ ಮತ್ತು ರಾಜ್ಯದ ಅನೇಕ ರಂಗತಂಡಗಳು, ಮಕ್ಕಳ ರಂಗಶಾಲೆಗಳ ಜೊತೆಗೆ ಒಡನಾಟವಿದ್ದು, ಹಲವು ಶಿಬಿರಗಳಲ್ಲಿ ಸಂಪನ್ಮೂಲ ವ್ಯಕ್ತಿಯಾಗಿ, ರಂಗಶಿಕ್ಷಕರಾಗಿ ಕೆಲಸ ಮಾಡಿದ್ದಾರೆ. ಕತ್ತೆ ಮತ್ತು ಧರ್ಮ, ಜೋಕುಮಾರಸ್ವಾಮಿ, ಮಲ್ಲಮ್ಮನ ಮನೆ ಹೋಟ್ಲು, ಕಂಡಾಯದ ಕೋಳಿ, ದ ಪೇಯಿಂಗ್ ಗೆಸ್ಟ್, ವಿದೂಷಕ, ಕುದುರೆ ಮೊಟ್ಟೆ, ನಾಳೆ ಬನ್ನಿ, ಶ್ರೀ ಕೃಷ್ಣ ಗಾರುಡಿ, ಒಗಟಿನ ರಾಣಿ, ಗಿಡ್ಡೂ ಟೇಲರನ ಸಾಹಸಗಳು, ಸ್ನೇಹದ ಬಲ, ಪುಣ್ಯಕೋಟಿ, ಪ್ಲಾಸ್ಟಿಕ್ ರಾಕ್ಷಸ, ಬೆಟ್ಟಕ್ಕೆ ಚಳಿಯಾದರೆ, ಬಾ ಬಾ ಮಳೆರಾಯ, ಮುಂತಾದ ನಾಟಕಗಳು ಇವರ ನಿರ್ದೇಶನದಲ್ಲಿ ರಂಗಪ್ರಯೋಗಗೊಂಡಿವೆ. ಮೈಸೂರಿನ ‘ನಿನಾದ ಸಂಗೀತ ಶಾಲೆ’ಯಲ್ಲಿ ಸಂಗೀತ ನಿರ್ದೇಶಕರಾದ ಎ.ಎಸ್. ಪ್ರಸನ್ನಕುಮಾರ್ ಅವರಿಂದ ‘ಕೀಬೋರ್ಡ್ ವಾದನ’ ತರಬೇತಿ ಪಡೆದಿದ್ದು, ತಾವು ನಿರ್ದೇಶಿಸಿದ ನಾಟಕಗಳಿಗೂ ಮತ್ತು ಚಾಮರಾಜನಗರ ಜಿಲ್ಲೆಯ ಕವಿಗಳ ಆಯ್ದ ಕವಿತೆಗಳಿಗೆ ಸಂಗೀತ ಸಂಯೋಜಿಸಿದ್ದಾರೆ.

ಚಾಮರಾಜನಗರದಲ್ಲಿ ‘ಆತ್ಮೀಯ ರಂಗ ಪ್ರಯೋಗಾಲಯ ಟ್ರಸ್ಟ್’ ಸಂಸ್ಥೆವೊಂದನ್ನು ಸಮಾನ ಅಭಿರುಚಿ ಹಾಗೂ ಕಾಳಜಿಯ ಗೆಳೆಯರೊಡಗೂಡಿ ಸ್ಥಾಪಿಸಿ(2019) ರಂಗಚಟುವಟಿಕೆಗಳಲ್ಲಿ ಕ್ರಿಯಾಶೀಲರಾಗಿ ತಮ್ಮನ್ನು ನಿರಂತರವಾಗಿ ತೊಡಗಿಸಿಕೊಂಡಿದ್ದಾರೆ. ರಂಗಭೂಮಿ ಕ್ಷೇತ್ರದಲ್ಲಿ “ಚಾಮರಾಜನಗರ ಜಿಲ್ಲೆಯ ಹೆಮ್ಮೆಯ ಕನ್ನಡಿಗರು” ಎಂದು ವಿಜಯ ಕರ್ನಾಟಕ ದಿನಪತ್ರಿಕೆಯು 2020 ನವೆಂಬರ್ ತಿಂಗಳಿನಲ್ಲಿ ಕಿರಣ್ ಗಿರ್ಗಿ ಅವರನ್ನು ಗುರುತಿಸಿ ಗೌರವಿಸಿದೆ.

ಕಿರಣ್ ಗಿರ್ಗಿ