ಬೆತ್ತಲೆ ಪೂಜೆ ಯಾಕೆ ಕೂಡದು?

ಅನಂತಮೂರ್ತಿ ಅವರ ವಿವಾದಾತ್ಮಕ ಮತ್ತು ಸೂಕ್ಷ್ಮ ಒಳನೋಟಗಳಿರುವ ಪುಸ್ತಕ. ಈ ಗ್ರಂಥದಲ್ಲಿ ಒಟ್ಟು 17 ಲೇಖನಗಳಿವೆ. ಈ ಸಂಕಲನದ ಬರಹಗಳ ಕುರಿತು ಹಿರಿಯ ಚಿಂತಕ ಜಿ. ರಾಜಶೇಖರ ಅವರು ’ಕೆ.ವಿ. ಸುಬ್ಬಣ್ಣ, ರಾಜೀವ ತಾರಾನಾಥ, ಆರ್.ಕೆ. ನಾರಾಯಣ್, ಗೋಪಾಲಕೃಷ್ಣ ಅಡಿಗ, ಮಾಸ್ತಿ, ಜಿ.ಎಸ್.ಎಸ್, ಗಿರೀಶ್ ಕಾರ್ನಾಡ್, ಆರ್.ಕೆ. ಲಕ್ಷ್ಮಣ್, ಫೀಲ್ಡ್ ಮಾರ್ಷಲ್ ಕಾರಿಯಪ್ಪ, ಚಿನುವಾ ಅಚಿಬೆ, ಶಿವರಾಮ ಕಾರಂತ, ಎಸ್.ಎಂ. ಕೃಷ್ಣ, ಜೆ.ಹೆಚ್. ಪಟೇಲ್- ಈ ಮಹನೀಯರ ಜೊತೆ ಅನಂತಮೂರ್ತಿ ನಡೆಸಿರುವ ಸಂದರ್ಶನಗಳಲ್ಲಿ ನಮ್ಮ ಕಾಲದ ಮಹತ್ವದ ವಿದ್ಯಮಾನಗಳು ಕಣ್ಣಮುಂದೆ ಹಾದುಹೋಗುತ್ತವೆ.

ಈ ಪುಸ್ತಕದಲ್ಲಿ ಒಡಮೂಡುವ ಸಮಕಾಲೀನ ನಾಗರಿಕತೆಯ ಚಿತ್ರಕ್ಕೆ ನಾವು ಕೇವಲ ಪ್ರೇಕ್ಷಕರಲ್ಲ- ಅದು ನಮ್ಮನ್ನೂ ಒಳಗೊಂಡಿರುವಂಥದ್ದು ಎಂಬ ಸಹಭಾಗಿತ್ವದ ಅರಿವನ್ನು ಓದುಗರಲ್ಲಿ ಉದ್ದೀಪಿಸುವುದು ಈ ಸಂದರ್ಶನಗಳ ಹೆಚ್ಚುಗಾರಿಕೆಯಾಗಿದೆ. ಸಹಭಾಗಿತ್ವ ಸಹಾನುಭೂತಿಯೂ ಆಗಬೇಕು ಎಂಬ ಸಂದರ್ಶಕನ ಆತಂಕ ಇಲ್ಲಿ ನಿಚ್ಚಳವಾಗಿ ವ್ಯಕ್ತವಾಗಿದೆ. ಪರಂಪರೆಯು ಭೂತ ಸಾಹಿತ್ಯಕ್ಕೆ ಇರುವ ಸಂಬಂಧದ ಬಿಕ್ಕಟ್ಟುಗಳು, ಗಣಿಯಲ್ಲಿ ಸೌಂದರ್ಯಾಭಿವ್ಯಕ್ತಿಯ ಸಮಸ್ಯೆ, ಭಾಷೆ ಮತ್ತು ಸಂಸ್ಕೃತಿ, ಸ್ಥಳೀಯ ಸಮುದಾಯಗಳು ಮತ್ತು ವಸಾಹತುಶಾಹಿ ಕರ್ನಾಟಕದ ಈ ಹೊತ್ತಿನ ಕಷ್ಟಗಳುಇವೇ ಮುಂತಾದ ವಿಷಯಗಳ ಕುರಿತು ಅಭ್ಯಾಸ ನಡೆಸುವವರಿಗೆ ಈ ಪುಸ್ತಕ ಒಂದು ಅಮೂಲ್ಯ ಆಕರವಾಗಬಲ್ಲದು’ ಎಂದು ಅಭಿಪ್ರಾಯಪಟ್ಟಿದ್ದಾರೆ.