ಅಂದರ್ ಬಾಹರ್

ಮೇಣದ ಬತ್ತಿಯ ವಾಲಾಡುವ 
ಮಬ್ಬು ಬೆಳಕು
ಒಂದು ಕಟ್ಟು ಇಸ್ಫೀಟ್ ಗರಿ
ಮಾಸಿದ ನೋಟಿನ ಕಂತು
ಉಕ್ಕುಮ್ ಮೇಲೆ 
ಸೋತ , ಗೆದ್ದ ಕಂಗಳ ಕಾತುರದ ನೋಟ

ಎಕ್ಕ ರಾಜ ರಾಣಿ
ಗುಲಾಮ ಗರಿಗಳ ನಡುವೆ
ಯಾವುದೊ ಹೆಸರು ಬರೆದು 
ಕಳೆದು ಹೋದ ನೋಟುಗಳ ಗುರುತು 

ಸರಿ ಬೆಸ ಸಂಖ್ಯೆಗಳ
ಹೊಯ್ದಾಟದಲಿ 
ಐಡೆಂಟಿಂಟಿ ಕಳೆದ 
ಬದುಕಿನ ಗೆರೆಗಳು 
ಛಾಪು ಮೂಡಿಸಿದ ಹೊಳಪುಗಳು

ಆಟದ ಹೊರಗೆ ಕೂತು
ಎಲ್ಲವು ಕಂಡು 
ಕೇಕೆ ಹಾಕುವ ಜೋಕರ್ ಕಾರ್ಡ್ ಗಳ ನಗುವು
ಕರಗುವ ಮೇಣದ ಬತ್ತಿಯ ತೋರಿಸಿ 
ಬದುಕು ಇಷ್ಟೇ ಎಂದು
ನೀತಿ ಪಾಠವ ಬೋಧಿಸುವಂತಿತ್ತು....  ....