ಒಣಮರ

ಕಾಡ ಬಯಲೋಳು ನೀರವ ಮೌನದಲಿ
ಭಾವಗಳುದುರಿಸಿ ಧ್ರುಢ ಚಿತ್ತದಿ ನಿಂತಿದೆ
ಸಾವಿರ ಸಂವತ್ಸರಕೆ ಸಾಕ್ಷಿಯಾಗುತಲಿ
ಹಸಿರಿಲ್ಲದೆಯು ಕಂಗೊಳಿಸುತಿದೆ ಒಣಮರವೊಂದು

ಚಿಗುರೆಲೆಯ ನಗುವಿಲ್ಲ ತರಗೆಲೆಯ ಸದ್ದಿಲ್ಲ 
ಹೂವ ಅರಳಿಸಿ ಹಣ್ಣಾಗಿಸುವ ಬಯಕೆಯು ಇಲ್ಲ
ಒಡಲ ಬಾಯಾರಿಕೆಗೆ ಮಳೆ ಹನಿಯ ಬೇಡಿಲ್ಲ
ಸಮಚಿತ್ತದಿ ನಿಂತಿದೆ ಒಣಮರವೊಂದು

ಬಳಲಿ ಬಂದ ಜೀವಕ್ಕೆ ಆಸರೆಯ ನೀಡಿಲ್ಲ
ನೆರೆ ಮರದ ಗೋಳನ್ನು ಕಿವಿಗೊಟ್ಟು ಕೇಳಿಲ್ಲ
ಹರಿಯುವ ಬಳ್ಳಿಯನು ಬರಸೆಳೆದು ಅಪ್ಪಿಲ್ಲ
ಬಾಗದೆಯೆ ಬೀಗುತಿದೆ ಒಣಮರವೊಂದು

ನೋವು ನಲಿವುಗಳೆನೇಂಬುದೇ ಅರಿತಿಲ್ಲ
ಸಾವನ್ನು ಆಹ್ವಾನಿಸಲಿಲ್ಲ ಬದುಕನ್ನು ಪ್ರೀತಿಸಲೂ ಇಲ್ಲ
ತನ್ನದೊಂದು ಬಾಳೆಂದು ಮರುಗಿ ಒಣಗಿದ್ದಲ್ಲ
ಬೇರೂರದೆಯೇ ಭದ್ರವಾಗಿದೆ ಒಣಮರವೊಂದು......