ಗದ್ದಲದ ಲೋಕದಲ್ಲಿ ಒಳಗಿನ ಪಿಸುಮಾತು- ನಿಯೊ ಆವ್

Date: 11-05-2021

Location: ಬೆಂಗಳೂರು

ಹಿರಿಯ ಪತ್ರಕರ್ತ-ಲೇಖಕ ರಾಜಾರಾಂ ತಲ್ಲೂರು ಅವರು ಜಾಗತಿಕ ಸಮಕಾಲೀನ ಕಲೆ ಮತ್ತು ಕಲಾವಿದರನ್ನು ಕುರಿತು ಬರೆಯುವ ಅಂಕಣ 'ಈಚೀಚೆ, ಇತ್ತೀಚೆ'. ಪ್ರತಿ ವಾರ ಪ್ರಕಟವಾಗುವ ಈ ಸರಣಿಯಲ್ಲಿ ಈ ಬಾರಿ ಜರ್ಮನಿಯ ಚಿತ್ರ ಕಲಾವಿದ ನಿಯೊ ಆವ್ ಅವರ ಕಲಾಬದುಕಿನ ಕುರಿತು ಬರೆದಿದ್ದಾರೆ.

ಕಲಾವಿದ: ನಿಯೊ ಆವ್ (Neo Rauch)
ಜನನ: 18 ಏಪ್ರಿಲ್, 1960
ಶಿಕ್ಷಣ: ಲೀಪ್‌ಜಿಗ್ ಗ್ರಾಫಿಕ್ಸ್ ಮತ್ತು ಕಲಾ ವಿಶ್ವವಿದ್ಯಾನಿಲಯ, ಲೀಪ್‌ಜಿಗ್, ಜರ್ಮನಿ
ವಾಸ: ಲೀಪ್‌ಜಿಗ್, ಜರ್ಮನಿ
ಕವಲು: ನ್ಯೂ ಲೀಪ್‌ಜಿಗ್ ಸ್ಕೂಲ್ ಆಫ್ ಆರ್ಟ್ (ಜರ್ಮನ ರೆನಿಸಾನ್ಸ್)
ವ್ಯವಸಾಯ: ಪೇಂಟಿಂಗ್‌ಗಳು

ನಿಯೊ ಆವ್ ಅವರ ಸಿ.ವಿ.ಗಾಗಿ ಇಲ್ಲಿ ಕ್ಲಿಕ್ ಮಾಡಿ:

ಅತ್ತ ಪೂರ್ವ ಜರ್ಮನಿಯ ಸಾಮಾಜಿಕ ವಾಸ್ತವವಾದಕ್ಕೂ ಹತ್ತಿರವಿರದ ಇತ್ತ ಪಶ್ಚಿಮದ ನವ ಅಭಿವ್ಯಕ್ತಿವಾದಕ್ಕಿಂತಲೂ ಭಿನ್ನವಾದ –ಶುದ್ಧ ಕಾವ್ಯಾತ್ಮಕವಾದ ಆವ್ ಅವರ ಕಲಾಕೃತಿಗಳು ಜರ್ಮನಿಯ ಎಲ್ಲ ಕಲಾ ಚಳುವಳಿಗಳು ಮತ್ತು ಚರಿತ್ರೆಗಳನ್ನು ಮೀರಿ ನಿಲ್ಲಬಲ್ಲವು. ಆವ್ ಕಲಾಕೃತಿಗಳೆಂದರೆ ರೆನಿಸಾನ್ಸ್, ಸರ್ರೆಯಲಿಸಂ ಮತ್ತು ರಿಯಲಿಸಂಗಳ ಹದವಾದ ಮಿಶ್ರಣ. ಅವರು ಪ್ರತಿನಿಧಿಸುವ ನ್ಯೂ ಲೀಪ್‌ಜಿಗ್ ಸ್ಕೂಲ್ ಕಲಾ ಚಳುವಳಿ ಫಿಗರೇಟಿವ್ ಕಲಾಕೃತಿಗಳನ್ನು ಮತ್ತೆ ಕಲಾಪ್ರಪಂಚದಲ್ಲಿ ಮುಂಚೂಣಿಗೆ ತಂದ ಚಳುವಳಿಯಾಗಿದ್ದು, ಆವ್ ಅದರ ದೃಷ್ಟಾರರೆಂದೇ ಹೆಸರಾಗಿದ್ದಾರೆ.

ಮನುಷ್ಯನ ಭಯ, ಹಿಂಜರಿಕೆ, ಆತ್ಮವಿಮರ್ಶೆಗಳನ್ನು ಒಬ್ಬ ಮಾಂತ್ರಿಕ ಕತೆಗಾರನಂತೆ ಕ್ಯಾನ್‌ವಾಸಿಗಿಳಿಸುವ ಆವ್, ತನ್ನ ಕಲಾಕೃತಿಗಳಿಗೆ ಅವುಗಳದೇ ಆದ ಬದುಕಿದೆ, ಅಲ್ಲಿನ ಪಾತ್ರಗಳು ಬೆಳೆಯುತ್ತವೆ ಎಂದು ನಂಬಿದ್ದಾರೆ. “The artist should not only paint what he sees before him, but also what he sees within him. If, however, he sees nothing within him, then he should also omit to paint that which he sees before him.” ಎನ್ನುತ್ತಾರವರು (ಕಾನ್ಸೆಪ್ಚುವಲ್ ಫೈನ್ ಆರ್ಟ್ ಮ್ಯಾಗಝೀನಿಗೆ ನೀಡಿದ ಸಂದರ್ಶನದಲ್ಲಿ ನವೆಂಬರ್, 2019).

ನಾಲ್ಕು ತಿಂಗಳ ಮಗುವಾಗಿದ್ದಾಗಲೇ ತನ್ನ ಕಲಾವಿದ ತಂದೆ ತಾಯಿಯರನ್ನು ಅವರ ಎಳವೆಯಲ್ಲೇ ರೈಲು ಅಪಘಾತವೊಂದರಲ್ಲಿ ಕಳೆದುಕೊಂಡ ಆವ್ ಬೆಳೆದದ್ದು ಅಜ್ಜನ ಮನೆಯಲ್ಲಿ. ಬಾಲ್ಯದಲ್ಲೇ ಚಿತ್ರಕಲೆಯಲ್ಲಿ ಆಸಕ್ತಿ ಹೊಂದಿದ ಆವ್, ತನ್ನ ಬಾಲ್ಯದ ಸಹಪಾಠಿಗಳು ಆಟದಲ್ಲಿ ತೊಡಗಿದ್ದಾಗ ಏಕಾಂಗಿಯಾಗಿ ಚಿತ್ರಗಳನ್ನು ಧ್ಯಾನಿಸುತ್ತಿದ್ದರು. 12ನೇ ವರ್ಷದಲ್ಲಿ ಅವರು ಅಜ್ಜನ ಮೇಜಿನ ಮೇಲೆ ಕಂಡ ಸಾಲ್ವದೋರ್ ಡಾಲಿಯ ಚಿತ್ರಗಳ ಪುಸ್ತಕವೊಂದು ಅವರ ಮೇಲೆ ಬಹಳ ಪ್ರಭಾವ ಬೀರಿತ್ತು.

ತನ್ನ ಕಲಾಕೃತಿಗಳಲ್ಲಿ ತಾನು ಮಾಧ್ಯಮ ಮಾತ್ರ. ನಾನೊಬ್ಬ ಮೆದುಳು ಮಾರ್ಗದರ್ಶನ ಮಾಡಿಸಿಕೊಳ್ಳುವ ಕಲಾವಿದ ಅಲ್ಲ ನನ್ನ ಕಲಾಕೃತಿಗಳು ಹೇಗೆ ಮೂಡುತ್ತವೆಂಬುದು ನನಗೇ ಅರಿವಿರುವುದಿಲ್ಲ. I’m a painter, not an artist. ಎನ್ನುತ್ತಾರವರು. 81-86ರ ನಡುವೆ ಲೀಪ್‌ಜಿಗ್ ವಿವಿಯಲ್ಲಿ ಕಲಿಯುವ ವೇಳೆ ತನ್ನ ಗುರು ಆರ್ನೊ ರಿಂಕ್ ಅವರಿಂದ ಪ್ರಭಾವಿತರಾದ ಆವ್, 1985ರಲ್ಲಿ ಸಹಕಲಾವಿದೆ ರೋಸಾ ಲಾಯ್ ಅವರನ್ನು ಮದುವೆ ಆಗುತ್ತಾರೆ. 1990ರ ಹೊತ್ತಿಗೆ ಕಲೆಯಲ್ಲಿ ಸ್ನಾತಕ ಪದವಿಯ ಬಳಿಕ, ಇಬ್ಬರೂ ಕಲಾ ವ್ಯವಸಾಯದಲ್ಲಿ ತೊಡಗಿಕೊಳ್ಳುತ್ತಾರೆ.

80ರಲ್ಲಿ ಗ್ಯಾಲರಿಸ್ಟ್ ಜುಡಿ ಲೈಕ್ ಅವರನ್ನು ಭೇಟಿ ಆದ ಬಳಿಕ, ಕಲಾ ಮಾರುಕಟ್ಟೆಯಲ್ಲೂ ಯಶಸ್ವೀ ಅನ್ನಿಸಿದ ಆವ್ 1999ರ ಆರ್ಮರಿ ಶೋ ಬಳಿಕ ಜಗತ್ತಿನಾದ್ಯಂತ ಹೆಸರು ಮಾಡುತ್ತಾರೆ. 2005-09ರ ನಡುವೆ ತಾನು ಕಲಿತ ಶಾಲೆಯಲ್ಲಿ ಉಪನ್ಯಾಸಕರಾಗಿಯೂ ಕೆಲಸ ಮಾಡಿದ ಆವ್‌ಗೆ ಆ ಬಂಧನ ಹಿಡಿಸಲಿಲ್ಲ. ಲೀಪ್‌ಜಿಗ್ ಹೊರವಲಯದ ಪುಟ್ಟ ಊರಿನಲ್ಲಿ ಸ್ಟುಡಿಯೋ ಸ್ತಾಪಿಸಿ, ಅಲ್ಲಿಂದ ದಂಪತಿ ಕಲಾಕೃಷಿ ಆರಂಭಿಸುತ್ತಾರೆ.

2012ರಲ್ಲಿ ತನ್ನ der Grafikstiftung Neo Rauch ಪ್ರತಿಷ್ಠಾನವನ್ನು ಆರಂಭಿಸಿದ ಆವ್ ದಂಪತಿ ಈಗ ಅಲ್ಲಿ ಕಲಾಕೃಷಿ ಮಾಡುತ್ತಿದ್ದಾರೆ. Unbearable Naturalism (1998), Waiting for the Barbarians (2007), The Blue Fish (2014), The Offering, Guardian of the night (2014) The Catch (2016) ಅವರ ಕೆಲವು ಕಲಾಕೃತಿಗಳು. ತನ್ನ ಕನಸಿನಂತಹ ವಿಚಿತ್ರ ಕಲಾಕೃತಿಗಳ ಬಗ್ಗೆ ಆವ್ ಹೇಳುವುದು – ನನ್ನ ತಲೆಯಂತೆಯೇ ನನ್ನ ಕ್ಯಾನ್‌ವಾಸ್ ಕೂಡ ಹುಚ್ಚುಕುದುರೆ, ಅಲ್ಲಿ ಎಲ್ಲವೂ ಸಾಧ್ಯ!

ನಿಯೊ ಆವ್ ಅವರ ಕುರಿತ ಡಾಕ್ಯುಮೆಂಟರಿ: