ಬ್ರಿಟಿಷರ ವಿರುದ್ಧ ಹೋರಾಡಿದ ಸುರಪುರದ ರಾಣಿ ಈಶ್ವರಮ್ಮನವರ ವ್ಯಕ್ತಿತ್ವ ಹಾಗೂ ಹೋರಾಟದ ಕುರಿತು ಇತಿಹಾಸದಲ್ಲಿ ಹೆಚ್ಚಿನ ವಿವರಗಳಿಲ್ಲ. ಈ ಬಗ್ಗೆ ಸಂಶೋಧನೆ ಅಗತ್ಯ ಎಂದು ಹಂಪಿಯ ಕನ್ನಡ ವಿಶ್ವವಿದ್ಯಾಲಯದ ಶಾಸನ ವಿಭಾಗದ ಡಾ. ಅಮರೇಶ ಯತಗಲ್ ಹೇಳಿದರು.

ಭೀಮರಾಯನಗುಡಿಯ ಸುರಪುರ ಇತಿಹಾಸ ಸಂಶೋಧನಾ ಕೇಂದ್ರ ಹಾಗೂ ಸುರಪುರದ ಓಕುಳಿ ಪ್ರಕಾಶನ ಸಂಯುಕ್ತವಾಗಿ ನಗರದ ಲಕ್ಷ್ಮಿನಗರದಲ್ಲಿಯ ದಿ. ಚಂದ್ರಕಾಂತ ಕರದಳ್ಳಿ ಅವರ ಮನೆಯಲ್ಲಿ ಭಾನುವಾರ ಖ್ಯಾತ ನಾಟಕಕಾರ ಎಲ್.ಬಿ.ಕೆ. ಆಲ್ದಾಳ್ ಅವರ ‘ಸುರಪುರದ ವೀರವನಿತೆ ರಾಣಿ ಈಶ್ವರಮ್ಮ’ ನಾಟಕ ಕೃತಿಯನ್ನು ಬಿಡುಗಡೆ ಮಾಡಿ ಅವರು ಮಾತನಾಡಿದರು.

ಸುರಪುರದ ರಾಣಿ ಈಶ್ವರಮ್ಮ ಅವರ ಕುರಿತು ಮೆಡೋಸ್ ಟೇಲರ್ ಅವರು ತಮ್ಮ ಆತ್ಮಕತೆಯಲ್ಲಿ ಅತ್ಯಂತ ಕೆಟ್ಟದಾಗಿ ಬಿಂಬಿಸಿದ್ದಾರೆ. ರಾಣಿ ಈಶ್ವರಮ್ಮ ಅವರು ಮೆಡೋಸ್ ಟೇಲರನ್ನು ವಿರೋಧಿಸುತ್ತಿದ್ದಳು, ಬ್ರಿಟಿಷ್ ಸರ್ಕಾರದ ವಿರುದ್ಧವೇ ಹೋರಾಡಿದ್ದಳು. ಆದ್ದರಿಂದ, ಟೇಲರ್ ಅವರು ಈಶ್ವರಮ್ಮ ಅವರ ವ್ಯಕ್ತಿತ್ವವನ್ನು ಕೆಟ್ಟದ್ದಾಗಿ ಬಿಂಬಿಸಲು ಕಾರಣವಿರಬಹುದು. ಆದರೆ, ಈಶ್ವರಮ್ಮ ಸ್ವಾಭಿಮಾನಿ ರಾಣಿ. ಉತ್ತಮ ಆಡಳಿತಗಾರ್ತಿ. ಮೆಡೋಸ್ ಟೇಲರ್ ಹೀಗೆ ಬರೆದಿದ್ದಾರೆ ಎಂಬುದೇ ಅಂತಿಮವಲ್ಲ. ರಾಣಿ ಈಶ್ವರಮ್ಮ ಅವರ ಕುರಿತು ಸಂಶೋಧನೆ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟರು.

ಬ್ರಿಟಿಷರ ವಿರುದ್ಧ ದಿಟ್ಟವಾಗಿ ಹೋರಾಡಿದ ಸಂಸ್ಥಾನಗಳ ಪೈಕಿ ಸುರಪುರವೂ ಒಂದು. ರಾಣಿ ಈಶ್ವರಮ್ಮ ಅವರ ವ್ಯಕ್ತಿತ್ವವನ್ನು ಮರೆ ಮಾಚುವ ಕುತಂತ್ರ ಬ್ರಿಟಿಷ್ ಅಧಿಕಾರಿಗಳದ್ದಾಗಿರಲೂಬಹುದು. ಯಾವುದಕ್ಕೂ ಸಂಶೋಧನೆ ಅಗತ್ಯ ಎಂದು ಪ್ರತಿಪಾದಿಸಿದರು.

ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದ ಹಾಗೂ ಸುರಪುರ ಇತಿಹಾಸ ಸಂಶೋಧನಾ ಕೇಂದ್ರ ಮುಖ್ಯಸ್ಥರಾದ ಭಾಸ್ಕರರಾವ್ ಮುಡಬೂಳ ಮಾತನಾಡಿ ‘ಸ್ಥಳೀಯ ಇತಿಹಾಸವನ್ನು ಸಂಶೋಧಿಸಿ ಗೌರವಿಸಬೇಕು. ದೊಡ್ಡ ದೊಡ್ಡ ಸಂಸ್ಥಾನಗಳದ್ದೇ ಇತಿಹಾಸವಲ್ಲ. ಸುರಪುರದ ಐತಿಹಾಸಿಕ ಸಂಗತಿಗಳ ಮೇಲೆ ಸಂಶೋಧನೆ ಬೆಳಕು ಚೆಲ್ಲಬೇಕು ಎಂದು ಸಂಶೋಧಕರಿಗೆ ಸಲಹೆ ನೀಡಿದರು.

ಖ್ಯಾತ ನಾಟಕಕಾರ ಎಲ್ .ಬಿ.ಕೆ. ಆಲ್ದಾಳ್, ನಿಂಗನಗೌಡ ದೇಸಾಯಿ ಕೆಂಭಾವಿ, ಸಂಶೋಧಕ ಡಾ. ಎಂ.ಎಸ್. ಶಿರವಾಳ, ಕೃಷ್ಣ ಸುಬೇದಾರ ಸೇರಿದಂತೆ ಸಾಹಿತ್ಯಾಸಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡಿದ್ದರು.