ಊರೆಂಬುದು ಊರಾಗುತ್ತಿದ್ದ ಪರಿ

ಪ್ರತಿಯೊಬ್ಬರೂ ತಮ್ಮ ಮೂಲ ಹಳ್ಳಿಯೊಂದಿಗೆ ಭಾವನಾತ್ಮಕವಾಗಿ ಸ್ಪಂದಿಸುತ್ತಾರೆ. ಅಲ್ಲಿ ಕಳೆದ ಬಾಲ್ಯ, ಊರಿನ ಪರಿಸರ ಎಲ್ಲವೂ ಭಾವದ ಗೂಡಿನೊಳಗೆ ಬೆಚ್ಚನೆಯ ಹಾಗೂ ಹಿತವಾದ ಸ್ಪರ್ಶ ನೀಡುತ್ತವೆ. ಊರುಗಳು ಮನುಷ್ಯನ ಸೃಷ್ಟಿ ಎಂದರೂ ಪ್ರಜ್ಞಾಪೂರ್ವಕವಾಗಿಯೇ ಆ ಪ್ರದೇಶದ ಬಗ್ಗೆ ವ್ಯಕ್ತಿಯು ಅಭಿಮಾನ ಬೆಳೆಸಿಕೊಳ್ಳುತ್ತಾನೆ. ಒಂದೇ ಕಾಲಕ್ಕೆ ಎಲ್ಲ ಊರುಗಳು ಹುಟ್ಟಿಲ್ಲ. ಪ್ರತಿ ಊರಿನ ಹುಟ್ಟು ಹಿಂದೆ ಇತಿಹಾಸವೇ ಆಡಗಿರುತ್ತದೆ. ಕಾಡು ಊರಾಗುವ, ಊರು ಪಟ್ಟಣವಾಗುವ, ಪಟ್ಟಣ ನಗರವಾಗುವ ಪರಿ ಕುತೂಹಲಕಾರಿ ಸಂಗತಿ ಮಾತ್ರವಲ್ಲ; ಇತಿಹಾಸದ ಕೊಂಡಿಯೊಂದಿಗೆ ಬೆಸೆದಿರುತ್ತದೆ. ಕೃಷಿ, ಮಾರುಕಟ್ಟೆ, ಕೈಗಾರಿಕೆ, ಸಾರಿಗೆ ಹೀಗೆ ಸೌಲಭ್ಯಗಳು ಊರು ಪ್ರವೇಶಿಸುತ್ತಲೇ ಬದಲಾವಣೆಯ ಗಾಳಿ ಬೀಸುತ್ತದೆ. ಊರು ಎಂದೂ ಹಿಮ್ಮುಖವಾಗಿ ಚಲಿಸಿ ಈ ಮೊದಲಿನ ಸ್ಥಿತಿ ತಲುಪುವುದು ಅಸಾಧ್ದ. ಆದ್ದರಿಂದ, ಊರಿನ ಜನಜೀವನ, ಸೌಲಭ್ಯಗಳು, ಆಚಾರ-ವಿಚಾರಗಳು, ನಂಬಿಕೆ ಎಲ್ಲವನ್ನೂ ಅಧ್ಯಯನಕ್ಕೆ ಒಳಪಡಿಸಿ, ದಾಖಲಿಸಬೇಕಾಗುವುದು. ಬದಲಾವಣೆಯ ಗಾಳಿಗೆ ಊರು ತತ್ತರಿಸಿದ್ದರೂ ಸಾಂಸ್ಕೃತಿಕವಾಗಿ ಕೆಲ ಅಂಶಗಳನ್ನು ಕಾಪಾಡಿಕೊಂಡು ಬರುವ ವಿದ್ಯಮಾನವೂ ಅತ್ಯಂತ ಸೋಜಿಗವೇ ಆಗಿರುತ್ತದೆ. ಈ ನಿಟ್ಟಿನಲ್ಲಿ ಆದ ಪ್ರಯತ್ನವೇ ’ಊರೆಂಬುದು ಊರಾಗುತ್ತಿದ್ದ ಪರಿ’ ಕೃತಿ.