ಬಿಸಿಲ್ಗುದುರೆ

ಬಾಯಾರಿದ ಕುದುರೆ
ಬಳಲಿ ನೀರ ಅರಸಿದೆ
ಬಯಲಲಿ ನೀರ ಕಂಡು
ಭರದಲಿ ಓಡಿ, ಓಡಿ, ಓಡಿದೆ...
ಸನಿಹ ಸನಿಹ ಹೋದರೂ
ದೂರ ದೂರ ಸರಿದಿದೆ
ಆಸೆ ತೋರಿ ಕುದುರೆಯ
ಬಿಸಿಲ್ಗುದುರೆ ಸೆಳೆದಿದೆ...!

ಭಾನುವಿನ ತಾಪಕೆ
ಭೂಮಿಯ ಕಾವು ಏರಿದೆ!
ಭುವಿಯ ತಬ್ಬಿದ ಗಾಳಿಯು
ವಿರಳದಿಂದ ಸಾಂದ್ರವಾಗುತ
ಪದರ ರಚನೆ ಮಾಡಿದೆ!
ನಿರ್ಣಾಯಕ ಕೋನ ಮೀರಿ
ಭಾನುವಿನ ಬೆಳಕು ಸಾಗೆ
ಪೂರ್ಣಾಂತರಿಕ ಪ್ರತಿಫಲನಗೊಂಡಿದೆ!
ನೀರು ನಿಂತ ಭ್ರಮೆಯನು
ಈ ವಿದ್ಯಮಾನ ತಂದಿದೆ!
ಕುದುರೆಯನು ಬಿಸಿಲ್ಗುದುರೆ
ಸವಾರಿ ಮಾಡುತ ಸಾಗಿದೆ....!!

- ರಾಜಬಕ್ಷಿ ಕೆ.