ಬೆತ್ತಲೆ ಭಾವಕೆ

ಬೆತ್ತಲೆ ಭಾವಕೆ ಅಟ್ಟಾಡಿಸಿ
ಬಟ್ಟೆ ತೊಡಿಸುವುದದೆಂಥ ಶೌರ್ಯ
ಸಾಕ ಕವಿತೆ ಬರೆಯಲು ಪಾಂಡಿತ್ಯ,
ಶಬ್ಧ ಸಾಗರ, ಅಂದದಕ್ಷರ
ಬರೆದೇ ತೀರುವೆನೆಂಬ ಮೊಂಡು ಧೈರ್ಯ?
ಮುಂಗಾರು ಮಳೆಗೆ ಮೈದುಂಬಿ
ಹಿಗ್ಗಿ ಹರಿವ ಹಿರಿಹೊಳೆಗೆ ಪಾತ್ರ ಹಂಗೇಕೆ?
ಜೀವ ಜೀವದ ಕೊಂಡಿ ಕಳಚಿ
ಹಾಡಾಡಿಕೊಂಡಳುವುದಕೆ ಛಂದದ ಬೇಡಿಯಾಕೆ
ಪುಂಗಿ ನಾದಕೆ ಉಬ್ಬಿ ತಲೆಯೆತ್ತಿ
ತೂಗುವಾದಿಶೇಷನಿಗೆ ಸ್ಟ್ರಿಂಗು ಬೇಕೆ?
ಹಾಡೊ ಹಕ್ಕಿಗೆ, ನರ್ತಿಸೊ ನವಿಲಿಗೆ, ಬೀಸೊ ಗಾಳಿಗೆ
ತೇಕೊ ಹಂಸಕೆ, ಸಾಯುವಾಗಿನ ಮೌನಕೆ
ದೊಣ್ಣೆನಾಯಕನಪ್ಪಣೆ ಬೇಕೆ?
ನಿತ್ಯಮುಕ್ತ ಕವಿತೆಯ ನಡೆಗೆ
ಬಡಿಗೆಯಾಸರೆಯೇಕೆ!
ಆನಂದಮಯ ಈ ಜಗಹೃದಯ!!
ಮಿಳಿತವಾದರೆ ನಾದ-ಲಯ
ಕಾವ್ಯ ಶಿವಾಲಯ!
ಕುಂಠಿತವಾಯಿತೊ ಲಯ
ಬದುಕೆ ಶವಾಲಯ,
ಬರಬೇಕು ಕವಿತೆ ತೊರೆವಾಲಿನಂತೆ
ಹಸುಗೂಸ ನಸುನಗೆಯಂತೆ
ನೀಗೆ ಯುಗ ಯುಗದ ಚಿಂತೆ
ಶಬ್ಧ ಕವಿತೆಯ ದೇಹ, ಛಂದವದರ ಮೂಗು
ಭಾವ ಹೃದಯ, ಧ್ವನಿ ದರ್ಶನ
ಲಯವೆ ಕವಿತೆಯ ಆತ್ಮ
ಆದೀತೆ ಇದು ಕಾವ್ಯದ ಆತ್ಮಕತೆ?
ಭಾವಗರ್ಭಕೆ ದಿನ ತುಂಬಲು
ತಿಣುಕದೆ ಜನ್ಮತಳೆದುದೇ ಭಾವಗೀತೆ!

- ಬಿ.ಆರ್. ಪೊಲೀಸ್ ಪಾಟೀಲ