ಈಗ ಆಕೆಯೇ

ನಯವಾದ ಹಣೆಯ ಮೇಲೆ
ಯಾರೊ ಸಂಕುಚಿಸಿದ ನೆರಿಗೆಗಳಿದ್ದವು
ಅಗಲ ಕಣ್ಣುಗಳು ಬೆರಗಾಗಿ
ಯಾವುದೊ ಭಯದಲ್ಲಿ ಕೊಳಗಳಾಗಿದ್ದವು
ತುಂಬುಗೆನ್ನೆಯ ತುಂಬ ನೀಟಾಗಿ
ಜೋಡಿಸಿದಂತಿದ್ದ ಕೆಂಪು ಬೆರಳುಗಳ ಕುರುಹು

ಚಿಗುರು ಸಂಪಿಗೆಯ ಮೂಗುಶಿಖರದ
ತುದಿಗೆ ಮೆಣಸು ಹಚ್ಚಿದ ಉರಿ
ಕಚ್ಚುವಂತೆ ಕೆಂಪಗಿದ್ದ ತುಟಿಗಳು
ಏನೋ ಒದರುವ ಕಾತುರದಲ್ಲಿ ಕಂಪಿಸುತ್ತಿದ್ದವು
ಶಂಖುಕಿವಿಗಳು ಅದಾವುದೊ
ಭೀತಿ ಭರಿತ ಉನ್ಮಾದದ
ಘರ್ಜನೆಗೆ ಅದುರುತಿದ್ದವು

ನೀಳ ಬಳ್ಳಿದೇಹದ ಥರ ಥರ
ಚಿಗುರು ಬೆರಳುಗಳ ತಹತಹ
ಬಾಳೆದಿಂಡಿನ ಕಾಲುಗಳ ನಡುಕ

ಎದುರು ನಿಂತವಳ ಸೊಬಗನ್ನು
ಅಚ್ಚುಕಟ್ಟಾಗಿ
ಕವಿಯೊಬ್ಬ ವರ್ಣಿಸುತ್ತಿದ್ದ
ಕಲಾವಿದನೊಬ್ಬ ಚಿತ್ರಿಸುತ್ತಿದ್ದ
ವಿಮರ್ಶಕನೊಬ್ಬ ಹೊಗಳುತ್ತಿದ್ದ

ನೃತ್ಯಕ್ಕೆ ಕುಣಿಸುವ ಉಮೇದು
ಕಾಮಿಗೆ ಚಿಗುಟುವ ತವಕ
ಕರುಣೆಗೆ ಮಾತ್ರ ಕಾವಿಲ್ಲ

ಕಾದಂಬರಿಯ ವಸ್ತು
ಕತೆಯ ಆಶಯ
ಪ್ರಬಂಧದ ಮೂಲಧಾತು
ಜಾಗತಿಕ ಜಗತ್ತಿನ ಬಂಡವಾಳ
ಈಗ ಆಕೆಯೇ