ಗುಪ್ತಗಾಮಿನಿ

ನೆನಪಿದೆಯಾ ನಿನಗೆ
ನಾಳೆಗಳ ನೆಲದಲ್ಲಿ ಬಿತ್ತಿದ್ದ
ಅದೆಷ್ಟು ಕನಸುಗಳ ರಾಶಿ
ಮಾಡಿದ್ದೆವು ನಾವಿಬ್ಬರೂ ಕೂಡಿ

ನೆಳಲು ಬೆಳಕಿನ ಕ್ಯಾನ್ವಾಸಿನ ಮೇಲೆ
ನಮ್ಮ ಬದುಕಿನ ಚಿತ್ರ ಮೂಡಿಸಿದ್ದೆ
ನಿನ್ನ ಕುಂಚದಲ್ಲಿ ನನ್ನ ತಿದ್ದಿ ತೀಡಿ
ಬರೆದು ಚಂದ ಮಾಡಿ
ನೋಡಿಕೊಳ್ಳುವೆ ಎಂದು ಮಾತು ಕೊಟ್ಟಿದ್ದಿ
ತಿಳಿದಿರಲಿಲ್ಲ ನೋಡು ಇದಕೆಲ್ಲ
ಈ ನನ್ನ ಗುಂಡಿಗೆಯ
ಈಡುಗಾಯಿ ಒಡೆದು
ಮೊದಲು ಮಾಡುವಿಯೆಂದು

ನನ್ನ ಬಗ್ಗೆ ಏನಾದರು
ಆಲೋಚನೆ ಇದ್ದರೆ...
ಊಹೂಂ ಬೇಡ ಖಂಡಿತವಾಗಿ
ಯಾವುದೇ ಕಹಿಯಿಲ್ಲ ನನಗೆ

ತಿಳಿದಿದೆ
ನೀನು ನಿನ್ನ ದಾರಿಯ ಹುಡುಕಾಟದಲಿ
ಮತ್ತೆ ಇದೆಲ್ಲ ಸಹಜ ಅಲ್ಲವೇ
ಯಾವುದೋ ಒಂದು ಪಡೆಯಬೇಕಾದಾಗ
ಏನೋ ಒಂದು ...!

ಒಂದಂತೂ ದಿಟ
ಪ್ರೇಮದ ಚಾಳೀಸು ಧರಿಸದ ಹೊರತು
ಈ ಲೋಗರ ಕಣ್ಣಿಗೆ ಕಾಣುವುದಿಲ್ಲ
ನಮ್ಮಿಬ್ಬರ ನಡುವೆ ಹರಿವ
ಈ ಗುಪ್ತಗಾಮಿನಿ

ಅನುಮಾನವೇ ಇಲ್ಲ
ನಾವಿಬ್ಬರೂ ಅಗದಿ
ಸರಿಯಾದ ಸಮಯದಲ್ಲೇ ಭೇಟಿ ಅಗೀವಿ
ಯಾವ ತಕರಾರಿಲ್ಲ ಬಿಡು
ಈ ಲೋಕದಲ್ಲಿ ಘಟಿಸುವುದೆಲ್ಲವೂ
ಆಯಾ ಕಾಲದ ಸತ್ಯ
ಅಷ್ಟೇ

ಚೈತ್ರಾ ಶಿವಯೋಗಿಮಠ