ಇಷ್ಟೊಂದು ಸುಲಭ ಹೇಗೆ

ದ್ವೇಷಿಸುವುದು ಸುಲಭ
ಗೆಳೆಯಾ
ಹೆಚ್ಚೇನಿಲ್ಲ
ಒಬ್ಬರ ಫಲಗಳನ್ನು
ಮತ್ತೊಬ್ಬರು ಕೊಚ್ಚಿ
ಗುಂಡಿಗೆಗಳ
ಚುಚ್ಚಿದರೆ ಆಯಿತು

ಕತ್ತಿ ಗುರಾಣಿಗಳ ಲೆಕ್ಕ
ದಾಖಲೆಯಾಗುತ್ತಲೇ ಇದೆ
ಕಾಲದ ಸ್ಮೃತಿಯಲ್ಲಿ

ದ್ವೇಷಿಸುವುದೇನೋ ಬಹಳ ಸುಲಭ
ಹೊಲ ಹೊಕ್ಕು ಮೇಯುವ
ದನಗಳನ್ನು ಹೊಡೆದು
ಅಂಗಳ ಸೋಕಿದ
ನೆರೆಯವರ ಬಳ್ಳಿಬಾಹುಗಳ ಸವರಿ
ತೆನೆ ಮುರಿದರೆ ಮುಗಿಯಿತು

ಹದುಳವೇ ಎಂದು ಕೇಳುವಷ್ಟು
ಸಿರಿಯೂ ಈಗಿಲ್ಲ

ಅಕ್ಕ..
ದ್ವೇಷಿಸುವುದೆನೋ ಸುಲಭವೇ
ನೆತ್ತಿಯನು ಬರಿದು ಮಾಡಿ
ಹಣೆಯನ್ನು ಬೋಳು ಮಾಡಿ
ಮುಳ್ಳ ಚಪ್ಪಲಿಯನು
ಒಬ್ಬರಿಗೊಬ್ಬರು ತೊಡಿಸಿಕೊಂಡಮೇಲೆ

ಅಷ್ಟೇ!
ಮುಗಿಯುವುದು ಕಥೆ

ದ್ವೇಷದ ಕಿಡಿಯೇನೊ
ಬೇಗನೆ ಧಗಧಗಿಸುವುದು
‌ಸಾಮರಸ್ಯದ ಒಲೆಗೆ ಮಾತ್ರ
ಪುಪ್ಪುಸ ಬರಿದಾಗುವಂತೆ
ಉದುಗೊಳವಿಯಿಂದ ಊದಲೇಬೇಕು

ಈಗೆಲ್ಲಾ ಆಲಸಿಗಳಿಗೆ
ಪ್ರೀತಿಸುವುದೇ ಕಷ್ಟ ನೋಡು
ದ್ವೇಷಿಸುವುದು ಮಾತ್ರ ಹೇಗೆ
ಇಷ್ಟೊಂದು ಸುಲಭವಾಯಿತೋ?
ಆ ಭಗವಂತನೆ ಬಲ್ಲ

- ಚೈತ್ರಾ ಶಿವಯೋಗಿಮಠ