ಸಾಮರಸ್ಯದ ನೇತಾರ 

ಮಹಾಲಿಂಗಪುರವಾಸಿ ಕನ್ನಡದ ವಾಕ್ಚತುರ
ಸೂಫಿ ಸಂತರನು ನೆನೆಯಬೇಕು
ಭಾವೈಕ್ಯ ಬೆಸೆವಂಥ ಸಾಮರಸ್ಯದ ಹರಿಕಾರ
ಇಬ್ರಾಹಿಂ ಸುತಾರಗೆ ನಮಿಸಬೇಕು

ಅಲ್ಪವಿದ್ಯಾಭ್ಯಾಸ ಮೇರು ಜ್ಞಾನದ ಶಿಖರ
ಕರುನಾಡ ಕಬೀರರೆಮ್ಮ ಹೆಮ್ಮೆ
ಧರ್ಮ ಸೂಕ್ಷ್ಮವನರಿತು ಪ್ರವಚನದಿ ಹೊಸೆದು
ಮಾನವತೆ ಬೋಧಿಸಿದ ಕೇಳಿರೊಮ್ಮೆ

ನೇಕಾರ ವೃತ್ತಿಯಲಿ ಬಾಳ ಪಯಣವ ಗೈದು
ಸರ್ವಧರ್ಮಗಳಲ್ಲಿ ಬಂಧ ಬೆಸೆದು
ತತ್ವಪದಗಳ ಪಾಡಿ ಬಾಳ ಸತ್ಯವನೊರೆದ
ಮರ್ಮವೊಂದೇ ಕೇಳಿ ಮನವ ತೆರೆದು

ಭಜನೆ ಪ್ರವಚನವಿರಲಿ ಸಂವಾದವೇ ಇರಲಿ
ವೇದ ಶಾಸ್ತ್ರದ ಶ್ಲೋಕ ನಾಲಿಗೆಯಲಿ
ವಚನಗಳ ಉಚ್ಚರಿಸಿ ಸಚ್ಚರಿತ ಸಂಸ್ಕಾರ
ಬಿತ್ತುವರು ಕೇಳುಗರ ಹೃದಯದಲ್ಲಿ..

ಸಾಮರಸ್ಯದ ಕೊಂಡಿ ಸೌಹಾರ್ದತೆಯ ದೂತ
ಕೃಷ್ಣೆಯ ನಾಡಿನ ಪದ್ಮಶ್ರೀ ಪುರಸ್ಕೃತ
ಮಾತಿನ ಮುತ್ತನು ಉದುರಿಸಿ ಪೋಣಿಸಿ
ಒಂದೆಂಬ ನೀತಿಯ ಬೋಧಿಸಿದರೀತ..

- ಹರಿನರಸಿಂಹ ಉಪಾಧ್ಯಾಯ