ಯಾರು?

ಯಾರು ಕದ್ದವರು ಬೆಳಕ ಚೆಲುವನು
ಕತ್ತಲೆಯನು ಹರಿಸಿ
ನಿನ್ನೆ ನೋಡಿದಾ ಹಕ್ಕಿ ಗೂಡಿನ
ನೆಮ್ಮದಿಯನು ಒರೆಸಿ

ಯಾರು ಪತಂಗದ ರೆಕ್ಕೆ ಮುರಿದವರು
ಹಾರುವುದನು ತಡೆದು
ಕನಸಿನರಮನೆಯ ಅಡಿಯ ತಪ್ಪಿಸುತ
ಉಂಡೆರಡು ಬಗೆದು

ಯಾರು ನದಿಯನು ತಿರುವಿಬಿಟ್ಟವರು
ತನ್ನುದಯದ ಸ್ವಾರ್ಥವ ಬಯಸಿ
ಬೆಂದೊಡಲುಗಳ ದಾಹ ತಣಿಸದೆ
ಬಾಳನು ಕಂಗೆಡಿಸಿ

ಯಾರು ತರಣಿಯ ಮಧ್ಯೆ ಧರಣಿ
ತೂರಿ ಶಶಿಯ ಮರೆಸಿದವರು
ಸವಿಯೆ ಕುಳಿತವರ ನಿರಾಸೆಗೊಳಿಸಿ
ಆಟ ಆಡಿದವರು

ಯಾಕೆ ಸುಮ್ಮನೆ ಗೋಳು ಹೊಯ್ಯುತ
ಪೂತನಿಯ ಹಾಲುಣುತಿಹರು
ಜೊತೆಗೆ ನಡೆಯದೆ ನಡೆಯಗೊಡದೆ
ವಿಕಟ ನುಡಿಯುತಿಹರು