ಅವ್ವ ಅವ್ವ

ತಟ್ಟಿದ ರೊಟ್ಟಿಯ ಮೇಲೆಲ್ಲಾ
ಅವ್ವನದೇ ಬೆರಳುಗಳು
ಹೆಂಚಿನಲಿ ಕಾಯಿಸಿ ತಿರುವಿ ಹಾಕಿ
ನಿಗಿನಿಗಿ ಕೆಂಡದಲ್ಲಿ ಸುಟ್ಟ ರೊಟ್ಟಿ
ಥೇಟ್ ಅವ್ವನ ಹಾಗೆ

ವರುಷ ಹನ್ನೆರಡಕೆ ಮದುವೆ
ಹುಚ್ಚೆದ್ದು ಊರು ತಿರುಗುವ ಅತ್ತೆ
ಪಾಳು ಬಿದ್ದ ಅಜ್ಜನ ಕಾಲದ ಮನೆ
ಹಸಿವು ಸುರುಳಿ ಸುತ್ತಿದ ಕ್ಷಣ
ಊರೆಲ್ಲಾ ಮುಳುಗಡೆ ಸೂತಕ

ಅವ್ವ ಅಪ್ಪನ ವಿವೇಕದ ಹಾದಿ
ಉತ್ತಿದಳು ಬಿತ್ತಿದಳು ಜತೆಯಾಗಿ
ಹಕ್ಕೆಮನೆಯಲಿ ಗದ್ದೆ ಕಾದಳು
ತೂರಿದಳು ಬೀಸುಗಾಳಿಗೆ ಒಡ್ಡಿ
ಒಂಟಿಯಾದಾಗಲ್ಲೆಲ್ಲ ಒಬ್ಬಳೇ ಬಿಕ್ಕಿದಳು
ಬುಟ್ಟಿ ಹೆಣೆದಳು ಸೊಲೊಪ್ಪಿಕೊಳ್ಳದೆ
ನೋವನ್ನೆಲ್ಲ ಗುನುಗಿದಳು
ಅವಳ ಸೊಲ್ಲೋಳಗೆ ಅವಳದೆ ಪಾಡು
ಹೆತ್ತಳು ಹೊತ್ತಳು ಮಕ್ಕಳೆಂಟು
ಹಾದಿ ನಡೆಸಿದಳು ವಿವೇಕ ತುಂಬಿ

ಈ ನಡುವೆ
ಮನೆ ವಾಜಾವಗತನ ಅವ್ವನದೇ
ಅಪ್ಪ ದುಡ್ಡಿದ್ದರೆ ಒಮ್ಮೊಮ್ಮೆ ದರಬಾರಿ
ಅಮ್ಮ ಅದೆಂಥ ಪಕ್ವ ಲೆಕ್ಕಾಚಾರಿ
ತಪ್ಪಬಹುದು ಅಪ್ಪ ಲೆಕ್ಕ ಅವ್ವನದಲ್ಲ
ಮಡಚಿಟ್ಟ ಸೀರೆ ಅಡಿಯಲ್ಲಿ
ನೂರರಿಂದ ಸಾವಿರ ಉಳಿತಾಯ
ಇಷ್ಟಿದ್ದರೂ ಅವ್ವ ಒಬ್ಬಜ್ಜಿ ಮಾಡಲಿಲ್ಲ
ಅದು ಇದು ಚಿನ್ನ ಮತ್ತೊಂದಕೆ ಜಗಳವಿಲ್ಲ
ಸಮಚಿತ್ತವ ಕಂಡಿದ್ದೆ ಅವ್ವನಲ್ಲಿ
ಈ ಡಿಗ್ರಿ ಓದು ಎಲ್ಲವೂ
ಹೆಬ್ಬೆಟ್ಟಿನ ಅವ್ವನೆದುರು ಮಂಡಿಯೂರಿವೆ
ಅವ್ವನಂತಾಗಲಾರದೆ ಸೋತಿವೆ

ಅವ್ವ
ವಾಟೆಹುಳಿ ಆರಿಸಿ ಇಡುವುದ ಮರೆಯಲ್ಲ
ಮೀನು ಸಾರಲ್ಲಿ ಅವ್ವನೆ ನೆಚ್ಚು
ಬೀಸುಗಲ್ಲಲಿ ತಿರುವಿ ತಂಬಿಟ್ಟು
ಅವ್ವ ಅವಳ ರೊಟ್ಟಿಯಂತೆ
ಹಿಟ್ಟು ನುಪ್ಪಿದಂತೆ ಗಟ್ಟಿಯಾಗಿ
ಮಾಗಿ ಹದವಾದಳು
ಬೆಂದಳು ಬದುಕಿನ ಹೆಂಚಿನಲಿ
ಸುಟ್ಟುಕೊಂಡಳು ಉರಿಯಲಿ
ಇಳಿವಯದ ಅವ್ವನೀಗ ಬದುಕಿಗೆ ಬುತ್ತಿ
ಮೊಣಕಾಲು ನೋವಲ್ಲೂ
ಆಗಾಗ ರೊಟ್ಟಿ ಸುಟ್ಟು ಬಡಿಸಿ
ಮುಖವನ್ನೇ ದಿಟ್ಟಿಸುತ್ತ ದೂರ ನಿಲ್ಲುತಾಳೆ
ಎನೋ ಮಾತು ಉಳಿಸಿಕೊಂಡಂತೆ

- ಜಿ. ಟಿ ತುಮರಿ