ರಂಗೋಲಿ

ಮನೆಯಂಗಳದ ರಂಗವಲ್ಲಿ
ಸುಖ ಶಾಂತಿ ತೋರುವಲ್ಲಿ
ನಕಾರಾತ್ಮಕತೆ ಇಲ್ಲ ಇಲ್ಲಿ
ಸಕಾರಾತ್ಮಕತೆ ಎಲ್ಲವೂ ಇಲ್ಲಿ ||

ಬಣ್ಣ ಬಣ್ಣದ ಕಲ್ಲಿನ ಪುಡಿಯು
ಹೂವು ಕೆಮ್ಮಣ್ಣು ಉಪ್ಪು ಜೋಡಿಯು
ಪೂಜಾ ಸ್ಥಳದ ಅಲಂಕಾರದ ಮಡಿಯು
ಚಿತ್ತಾರದ ರಂಗವಲ್ಲಿಯ ಮೋಡಿಯು ||

ನೀಲಾಕಾಶದ ನಕ್ಷತ್ರದಂತೆ
ಧ್ಯಾನಕ್ಕಾಧಾರ ಬಿಂದುವಿದಂತೆ
ಬಿಳಿಚುಕ್ಕಿಯಿದು ಪುರುಷರಿಗಂತೆ
ಕೆಂಪುಚುಕ್ಕಿ ಸ್ತ್ರೀ ಪ್ರತೀಕವಂತೆ ||

ಭೂತಾರಾಧಕರು ನಾಟಿವೈದ್ಯರು
ದೈವಾರಾಧಕರು ತಂತ್ರಗಾರರು
ತ್ರಿಭುಜ ಷಡ್ಬುಜ ಸೂರ್ಯ ಚಂದಿರ
ವಿವಿಧ ಬಗೆಯ ರಂಗೋಲಿ ಸುಂದರ ||

ಸ್ವಸ್ತಿಕ ಚಕ್ರ ಸೂರ್ಯನ ಸಂಕೇತ
ಪದ್ಮದಿ ನೋಡು ಲಕ್ಷ್ಮೀಯ ಬಿಂಬಿತ
ವೃತ್ತಾಕಾರ ಶುಭಕಾರ್ಯದ ಶೋಭಿತ
ಚತುಸ್ರಾಕಾರ ಸ್ಥಿರತೆಗೆ ಸೂಚಿತ ||

ಬೆರಳ ಸಹಾಯದಿ ಮೂಡಿದ ಕಲೆಯಿದು
ಹುಡಿ ಮಣ್ಣಿನ ಧೂಳಿಚಿತ್ರವಿದು
ಬಿಂದುಜವೆಂಬ ಕಲೆಯ ಭಾಗವಿದು
ಬಣ್ಣ ಬಣ್ಣದ ರಂಗೋಲಿಯಿದು ||

ರಂಗನ ಒಲುಮೆಯ ಬಣ್ಣದಾವಳಿಯಿದು
ಭಗವಂತ -ಭಕ್ತನ ನಡು ಸೋಪಾನವಿದು
ಲೋಪಾಮುದ್ರೆ ಕಂಡ ಲಲಿತಕಲೆಯಿದು
ಸ್ವಚ್ಛಂದ ಸುಂದರ ರಂಗೋಲಿಯಿದು