ರಾಧಾ-ಮಾಧವ

ತೀರ್ಥಹಳ್ಳಿ ಮೂಲದ ಅನಂತ್ ಹರಿತ್ಸ ಅವರು ಬರೆದ 'ರಾಧಾ-ಮಾಧವ' ಕವಿತೆಯ ಸಾಲುಗಳು ಹೀಗಿವೆ...

ಮಾಧವ ನುಡಿಸಿದ ಮುರಲಿಯ ರವಕೆ
ತಲೆಯಾಡುತ ಕುಣಿದವು ಗೋವುಗಳು..
ಮೇಘಶ್ಯಾಮನ ಕೊಳಲಿನ ಗಾನಕೆ
ನಲಿದವು ಚಿಗರೆ, ನವಿಲುಗಳು
// ಮಾಧವ ನುಡಿಸಿದ ಮುರಲಿಯ ರವಕೆ //

ದೂರದಿ ಎಲ್ಲೋ ವಿರಹದ ಹೃದಯದಿ
ಕನಸುತ ರಾಧೆಯು ಕೃಷ್ಣನನು
ನಾದದ ಕರ್ಣಾನಂದ ತರಂಗದಿ
ಹುಡುಕಲು, ಬರುವನೆ.. ಪ್ರಿಯತಮನು?
// ಮಾಧವ ನುಡಿಸಿದ ಮುರಲಿಯ ರವಕೆ //

ಮರೆತನೆ ತನ್ನನು ನಂದಕಿಶೋರನು?
ಸೋಲುತ ಮನದಲೆ ಮುನಿದಿಹಳು
ಕಾಣದೆ ಕೇಳುವ ವೇಣುನಿನಾದಕೆ
ಸಿಡುಕುತ ಪಿಣಿಲನು ಕೊಡವಿದಳು.
// ಮಾಧವ ನುಡಿಸಿದ ಮುರಲಿಯ ರವಕೆ //

ಸೆರಗನು ಹಿಡಿದು ಕಾಯುತ ಕಾದಲೆ,
ಒರೆಸುತ ಕಂಗಳ ಹನಿಗಳನು
ಮುಕುರದ ಎದುರು ಉಲಿದಳು ಒಲವಲಿ
ಉರದಲೆ ಮಾಧವ ನೆಲೆಸಿಹನು..!!

ಮಾಧವ ನುಡಿಸಿದ ಮುರಲಿಯ ರವಕೆ
ತಲೆಯಾಡುತ ಕುಣಿದವು ಗೋವುಗಳು..
ಮೇಘಶ್ಯಾಮನ ಕೊಳಲಿನ ಗಾನಕೆ
ಗೋಪಿಕೆಯರು ತಲೆದೂಗಿದರು..
// ಮಾಧವ ನುಡಿಸಿದ ಮುರಲಿಯ ರವಕೆ //