ಬಾ ಬೆಳಕೆ ಬಾಳಿಗೆ

ಕೆಂಡದ ಕೇರಿ ನಮ್ಮ
ಕರುಳ ಕಿತ್ತು ಸುಡುತಿರಲು
ತಮದ ತಮಟೆ ಸದ್ದು
ನಿತ್ಯ ತೆರ್ಪ ಬಿಡುತಿರಲು
ಆರ್ತನಾದ ಅಳುತಲಿದೆ
ಬಾ ಬೆಳಕೆ ಬಾಳಿಗೆ

ಗಂಜಲುಗಳ ಗೋಡೆ ನಮ್ಮ
ಅಂಗಳಗಳ ಕೆಡುವುತಿರಲು
ಬೂದಿ ಹೊದ್ದ ಭವದ ಸೊಕ್ಕು
ಉಸಿರನಗಿದು ಮುಚ್ಚುತಿರಲು
ಆತ್ಮ ಕೂಗಿ ಕರೆಯುತಿದೆ
ಬಾ ಬೆಳಕೆ ಬಾಳಿಗೆ

ಎಂಜಲುಗಳ ಎಡೆ ನಮ್ಮ
ಗಂಗಳಗಳ ಒದೆಯುತಿರಲು
ಬೋಳು ಬಿದ್ದ ಬುರುಡೆ ಮೂಳೆ
ಕನಸುಗಳ ಕುಟ್ಟುತಿರಲು
ನೋವನಾಲೆ ತೊಟ್ಟಿಕ್ಕುತಿದೆ
ಬಾ ಬೆಳಕೆ ಬಾಳಿಗೆ

ದಂಡುಕೋರ ದವಡೆ ನಮ್ಮ
ಕೊರಳುಗಳ ಕಡಿಯುತಿರಲು
ಮಂಕುಕೊಳದ ಕೆಂಪು ಕೊಕ್ಕು
ನೆಲದನಿಯ ಕುಕ್ಕುತಿರಲು
ಬಂಧಿಕೋಣೆ ಬುಸುಗುಟ್ಟುತಿದೆ
ಬಾ ಬೆಳಕೆ ಬಾಳಿಗೆ

- ಕ.ಗಂ.ಶಶಿಕುಮಾರ್(ಕವಿವರ್ಮ)