ಬಾರಾ ಕಮಾನು

ನಿನ್ನ ಭಗ್ನಾವಶೇಷಗಳ ನಡುವೆಯೇ
ನನ್ನ ಸಂಜೆಗಳು ರಂಗೇರುತ್ತಿದ್ದವು
ಹೇ ದೊರೆಯ ಕನಸಿನ ಸಿರಿಯೇ
ನೀನೊಂದು ಅಪೂರ್ಣ ಕವಿತೆಯಂತೆ
ತುಂತುರು ಹನಿಸಿದ ಮಳೆಯಂತೆ
ವಿರಹಿ ಹಕ್ಕಿಯ ಹಾಡಿನ ದನಿಯಂತೆ
ಛೋಟಾ ಖಯಾಲ್ ನಲ್ಲಿಯೇ
ಸಂಪನ್ನವಾದ ರಾಗದಂತೆ

ನಿನ್ನ ಹನ್ನೆರಡು ಕಮಾನುಗಳ ಒಳಗಿಂದ
ಸುರಿಯುವ ಸಂಜೆ ಹೊನ್ನ ಬಿಸಿಲು
ಎದೆಯ ತಂಪಾಗಿಸಿ
ಬೆಳದಿಂಗಳಿಗೆ ನನ್ನ ಸಜ್ಜು ಮಾಡುತ್ತಿತ್ತು
ಇಷ್ಟೆಲ್ಲ ಕಮಾನುಗಳ ನಡುವೆ
ದೊರೆ -
ನಿನ್ನಾಸೆ ಹೂತು ಹೋಗಿದ್ದ ನಾ ಬಲ್ಲೆ
ನಿನ್ನ ಹುಟ್ಟಿಸಿದಾತನೆ ನಿನ್ನ ಕೊನೆಗಾಣಿಸಿದ್ದು
ಈಗ ಇತಿಹಾಸ

"ಗೋಲ್ ಗುಂಬಜ್ ಕ್ಕೊಂದು ಪ್ರತಿಸ್ಪರ್ಧಿ!"
ಸಾಕಾಯಿತೆ ಇಷ್ಟು ಸಣ್ಣ ಕಾರಣ
ಮತ್ಸರದ ಬೆಂಕಿಯಲ್ಲಿ
ಬೂದಿಯಾಯಿತು ಎಲ್ಲ
ನಿನ್ನ ರಾಣಿಯರ ಕನಸಲ್ಲಿ ದೊರೆ
ಹನ್ನೆರಡು ಕಂಬಗಳೆದ್ದರೂ
ಕೇಳುತ್ತಲೆ ಇತ್ತು
ಗೋಡೆಗಳ ಆರ್ತನಾದ
ಒಂದೊಂದು ಕಲ್ಲಿನ ಗೋಳು
ಕೇಳದಾಯಿತೆ ನಿನ್ನಪ್ಪನಿಗೆ
ಪುತ್ರ ವ್ಯಾಮೋಹದಲ್ಲಿ
ಸಿಂಹಾಸನಗಳು ಉರುಳಿರುವ ಕತೆ ಗೊತ್ತು
ಆದರಿಲ್ಲಿ ನಡೆದದ್ದು
ದೊರೆ-
ಎಂಥ ವಿಪರ್ಯಾಸ

ಅರೆ ಬಿರಿದ ಮೊಗ್ಗಿನಂತೆ ನಿಂತಿರುವ
ಹೇ ಬಾರಾ ಕಮಾನು
ನಿನ್ನ ಚದುರಿದ ಚಿತ್ರದಲ್ಲೆ
ನೀನಿಂದು ಅಪೂರ್ವ
ನಿನಗೆ ನೀನೇ ಸಾಟಿ!