ಭೀಮನ ನಿರೀಕ್ಷೆಯಲಿ 

ಅಂಟು ಮೈಲಿಗೆಯ
ಸೂತಕದ ಕೇರಿಯ
ಪಾಪದ ಕೆಸರು ಕಾಯ
ಹೊತ್ತ ದಲಿತ ಹಣೆಪಟ್ಟಿಯ
ಧ್ರುವ ತಾರೆಯ ಉದಯ

ಬಯಸದೆ ಜನ್ಮ ತಳೆದ ಜಾತಿಯಲಿ
ಕಿತ್ತು ತಿನ್ನುವ ಬಡತನದ ಕೂಪದಲಿ
ಮಡಿವಂತಿಕೆ ಮತಾಂಧತೆಯಲಿ
ಮನುಷ್ಯತ್ವಕ್ಕೆ ಕೊಳ್ಳಿ ಇಟ್ಟವರ ಮಧ್ಯದಲಿ
ನಲುಗಿತೊಂದು ಪುಣ್ಯ ಜೀವ ಕಣ್ಣೀರಲಿ

ಸಮಾಜವಿತ್ತ ಎಷ್ಟೆಲ್ಲ ಉಳಿ ಪೆಟ್ಟು
ಸಹಿಸಿ ದಹಿಸಿ ರೋಧಿಸಿ ಕಂಗೆಟ್ಟು
ಆಯ್ತು ಮಾನವತೆ ಮೂರ್ತಿಯ ಹುಟ್ಟು
ಅವ ಬಿಡಲಿಲ್ಲ ಬದುಕುವ ಹಕ್ಕಿನ ಪಟ್ಟು
ಕೇಡು ಮಾಡಿದವರಿಗೂ ಬದುಕು ಕೊಟ್ಟು

ಬೆಳೆದನವ ಜ್ಞಾನ ಸಂಪನ್ನ ಭೀಮನಾಗಿ
ಕಂದೀಲು ಬೆಳಕಿನಲಿ ಮಾಣಿಕ್ಯವಾಗಿ
ದಲಿತರ ಪಾಲಿನ ಆಶಾಕಿರಣವಾಗಿ
ಸಮಾನತೆಯ ಸಾರುವ ಹರಿಕಾರನಾಗಿ
ಭಾರತ ಬೆಳಗಿದ ಸಂವಿಧಾನ ಶಿಲ್ಪಿಯಾಗಿ

ಸಮಾಜ ಭೀಮಗೆ ಕೊಟ್ಟಿದ್ದು ಬರೀ ನೋವು
ಜ್ಞಾನ ಭೀಮ ಹಂಚಿದ್ದು ನಲಿವು
ನೊಂದ ಜೀವಕೆ ಬೋಧಿ ತತ್ವದ ಒಲವು
ಮೇಣದಂತೆ ಕರಗಿ ಬೆಳಕಾಯ್ತು ಜೀವವು
ಭೀಮನಿತ್ತ ಸಂವಿಧಾನ ಬದುಕಿಗಾಧಾರವು

ಮತ್ತೆ ಆಗಲಿ ಈ ಮಣ್ಣಲಿ ಭೀಮಾಂಕುರ
ತಡೆಯಲು ಸಂವಿಧಾನ ರಂಗೋಲಿ ಚೋರರ
ಜನಿಸಲಿ ಮನೆ ಮನೆಯಲೊಬ್ಬ ಕ್ರಾಂತಿಕಾರ
ಬದುಕಿಸಲಿ ಜೀವಿಸುವ ಭ್ರಮೆಯಲಿಹ ಸತ್ತವರ
ಮತ್ತೆ ಬನ್ನಿ, ಬರುತ್ತಲೇ ಇರಿ ಓ ಅಂಬೇಡ್ಕರ

✍️ ರವಿನಾಗ್ ತಾಳ್ಯ