ಬಿಕ್ಕಳಿಕೆ ಝರಿ

ಪ್ರೀತಿಯೋ ಕಾಳಜಿಯೋ
ಮಮತೆಯೋ ಕಿಟಕಿಟಿಯೋ
ಅವ್ವ ಮಾತ್ರ ಶುದ್ಧ ಜೇನು
ಮಾತುಗಳು ಕೆಲಸಗಳು
ಆಗಲೇಬೇಕು ಇನ್ಸ್ಟಂಟ್ ತಿಂಡಿಯಂತೆ
ಒಂದೇ ಒಂದು ಅರಸನ ಆಜ್ಞೆಯಂತೆ
ಹಿಟ್ಲರ್ ಮುಸೊಲಿನಿ ಲೆನಿನ್ ಯಾವ ಲೆಕ್ಕ

ಕೆಲಸದ ನಿರಂತರ ಒತ್ತಡದಲ್ಲಿ ರೈಲುಹಳಿ
ಹೋರಾಟ ಇರುವೆ ನಾನು ಲುಟುಪುಟು
ಕೆಲ ಕೆಲಸ ಮಾತು ಕಡೆಗಣಿಸಿ
ಕಿವಿಯಲ್ಲಿ ಹೊಕ್ಕದೇ ಬೆನ್ನ ಹಿಂದೆ ಅವ್ವನ
ಮಾತುಗಳು ಬೇತಾಳ ತಾಂಡವ

ಗಾಳಿಯ ಪಾದ ಹೊಸ್ತಿಲಲ್ಲಿ ದೂಡಿ
ಅವಸರದಲ್ಲಿ ಹೊರಗೆ ಹೋಗುವ
ಮೋಡಗಳ ನಿಲ್ಲಿಸುವ ಶಿಖರದಂತೆ
ನನ್ನ ತಡುವಿ ಅದೇನೋ
ತಿನ್ನು ಅಂದಳು ಮಮತೆಯ
ಸಾಗರದಲಿ ಅಕ್ಷಯ ಪಾತ್ರೆ ಹಿಡಿದು
ಒಂದು ಕ್ಷಣವೂ ಮುಖ್ಯ ಮುಖ್ಯ
ಭೂಮಿಯಿಂದ ಕಕ್ಷೆಗೆ ಬಿಟ್ಟ ರಾಕೆಟ್
ಹೊರಟೆ ಹಾಗೆ ತಿನ್ನದೇ

ಉದ್ದ ಉದ್ದ ಉಸಿರು ಬಿಡುತ್ತ
ತಲುಪಿ ಬಸ್ ಸ್ಟ್ಯಾಂಡ್
ಇಪ್ಪತ್ತು ನಿಮಿಷ ಕಳೆದರೂ
ಬರುತ್ತಿಲ್ಲ ಒಂದೂ ಬಸ್ ತೇಕುತ್ತ
ಅವ್ವ ಕೊಟ್ಟಿದ್ದು ತಿಂದಿದ್ದರೆ
ಆಗುತ್ತಿತ್ತೇನೋ ಜಾಸ್ತಿ ಎರಡು ನಿಮಿಷ
ಅಷ್ಟೇ ಏನೋ ಸಾಧಿಸಿದಂತೆ
ಬಂದು ನಿಂತರೆ ಸಂಪೂರ್ಣ ಕಾಲಹರಣ

ಕ್ಷಣದಲ್ಲಿ ಕಣ್ಣೀರ ಮೆರವಣಿಗೆ
ಓಲಾಡಿ ಅಕ್ಷ ತುಂಬಿ ಸುರಿದು
ಪಶ್ಚಾತಾಪ ತಿನ್ನದ್ದಕ್ಕೆ,
ಮಾತು ಕೇಳದ್ದಕ್ಕೆ, ಅವ್ವನ ನೋಯಿಸಿದ್ದಕ್ಕೆ
ಮತ್ತೆ ಮತ್ತೆ ಬಿಕ್ಕಳಿಕೆ ಝರಿ
ನನ್ನ ಹೊಟ್ಟೆ ತುಂಬಿಸುವಲ್ಲಿ
ನೀರು ತುಂಬಿದ ಹರಿವಾಣ
ಅವ್ವನದೆನು ಸ್ವಾರ್ಥ?
ಗುರುತಿಸಬೇಕು ಅಮೃತ ಸಿಂಚನ

- ಮಾಲಾ.ಮ.ಅಕ್ಕಿಶೆಟ್ಟಿ, ಬೆಳಗಾವಿ.