ಚದುರಿದ ಕನಸು

ದಿನಂಪ್ರತಿ ಬರುವ ಈ ಹಾಳು ಕನಸುಗಳೇ ಹೀಗೆ,
ಅನುಕ್ಷಣ ವಿಶ್ವಾಮಿತ್ರ ನೇಮಿಸಿದ ನಕ್ಷತ್ರಿಕನ ಹಾಗೆ!

ಒಮ್ಮೊಮ್ಮೆ ಅತಿಕ್ರಮ ಪ್ರವೇಶದಿ ನಮ್ಮೊಳನುಸುಳಿ,
ನಡೆಸಿ ಬಿಡುವವು ಅನಿರೀಕ್ಷಿತ ಬಂಡುಕೋರ ದಾಳಿ!

ಸಮಯಾಸಮಯವಿಲ್ಲದೆ ಸಂದರ್ಭದ ಹಂಗಿಲ್ಲದೆ,
ಯುಗಾದಿ ಆಚರಿಸಿ ಬಿಡುವವು ಬೇವು-ಬೆಲ್ಲ ತಿನ್ನದೆ!

ಆದರೂ ಕನಸುಗಳಲ್ಲವೇ ಸುಪ್ತ ಮನಸಿನ ಗುಪ್ತಗಾಮಿನಿ,
ಮುನ್ಸೂಚನೆಯಿಲ್ಲದೆ ಭಾವಸಾಗರದಲ್ಲೇಳುವ ಸುನಾಮಿ!

ನಿರಂತರವಾಗಿ ಕಾಣುವ ಕನಸೆಲ್ಲವನ್ನೂ ನನಸಾಗಿಸಲು,
ಆಗಸದಿ ನಿಲ್ಲಲೇಬೇಕು ಮುಕ್ಕೋಟಿ ದೇವತೆಗಳ ಸಾಲು!

ಛಲಬಿಡದೆ ಬೇತಾಳನಂತೆ ಬೆನ್ನಟ್ಟಿ ಕಾಡಿಸುವ ಕನಸಿಗೆ,
ಅಲ್ಪಾಯುಷ್ಯ ನೀಡುವ ಆ ವಿಧಿಗೆ; ಯಾವುದೋ ಹಗೆ!

ಕೂಡಿಟ್ಟಮೊತ್ತ ಕಳೆದಾಗ ಚಿಲ್ಲರೆ ಆಯುವ ಗೋಳು,
ಬಾಳಲ್ಲಿ ಬಂದು ಚದುರಿ ಹೋಗುವ ಆ ಕನಸುಗಳು!

ಧಾರಾಕಾರ ಮಳೆಯ ನಿರೀಕ್ಷೆಯಿತ್ತ ಕಾರ್ಮೋಡಗಳು,
ಸರಿದು ಭಗ್ನವಾದ ನಂಬಿಕೆ ಈ ಚದುರಿದ ಕನಸುಗಳು!

ಮಂಜುಳಾ ಪ್ರಸಾದ್