ಗುರುವಿಗೆ

ಅರ್ಧ ಶತಮಾನದಾಚೆಯ ಮಾತು
ಸಾಹಿತ್ಯ ಸಂಸ್ಕೃತಿ ಪರಿವೆ
ಇರುವೆ ಹೆಜ್ಜೆಯಲಿ
ನನ್ನೊಳಗೆ ಹರಿವ ಮುಲುಕು
ಕಿರು ಸದ್ದು
ಕೇಳಿಸುತ್ತಿರುವಾಗಲೇ
ಒದಗಿ ಬಂದಿರಿ ನನಗೆ
ಝಗ ಝಗಿಸುತ್ತ
ಪ್ರತಿಭೆ ಪ್ರಭೆ ಪಸರಿಸುತ್ತ
ಅಚಾನಕ್ಕಾಗಿ
ಅನರ್ಥ್ಯ ಗುರು ನಿಧಿ
ದೊರೆತ ವಿಸ್ಮಯದಂತೆ.

ಗುರುವೆ,
ಅನಂತ ಕೃತಜ್ಞತೆ ನಿಮಗೆ.

ನಾನೆ ನಾನಾಗಿ
ಶ್ರುತಿ ಹಿಡಿವ ಪರಿಯರಿವ
ಮುನ್ನವೇ
ಹಿರಿಯ ಕವಿ ಅಡಿಗರೆಡೆ ಕೈತೋರಿ
ಬಿಟ್ಟು ಹೊರಟಿರಿ
ನಿಮ್ಮ ದಾರಿ ಹುಡುಕಿ.

ತಿರುಗಿ ಬಂದಾಗ
ಧರ್ಮಾಂತರ ವಿವಾಹ

ಬದುಕ ಬೆಡಗಿಗುತ್ತರವ
ಹುಡುಕುವುದರಲ್ಲಿ
ಮಗ್ನವಾದಿರಿ
ಲಗ್ನವಾದಿರಿ ಕೊನೆಗು
ಧೈರ್ಯದೈತ್ಯನಾಗಿ ಕಂಡಿರಿ ನನಗೆ
ಗುರುವಿಗೆ ನಮೋ ಎಂದೆ.

-ಎರಡು-

ಷಟ್ಟಂಡ ದೊರೆ ಪರಾಕ್ರಮಿಗಳನು
ಬಾಯ್ಕಳಿಸಿ
ವೃಷಭಾಚಲದಲ್ಲಿ
ದಿಗ್ವಿಜಯ ಶಾಸನ ಬರೆಸಿ
ಮರಳಿ ಬಂದಿದ್ದೀರಿ
ಜ್ಞಾನಪೀಠ ಕಿರೀಟ
ನವರತ್ನ ಮಣಿಮಾಲೆಯಲಂಕಾರ.

ʻ...ಗರ್ವರಸಂ ಸೋರಿ'
ಎಂದಾದರೂ?
ಗೊತ್ತಾಗಲಿಲ್ಲ.

ಅರಮನೆಯ ಮಹಾದ್ವಾರದಲ್ಲಿ
ಚಕ್ರರತ್ನ ನಿಂತಿದೆ
ಒಳಪುಗುತ್ತಿಲ್ಲ.
ನೀವೂ ನಿಂತಿದ್ದೀರಿ
ಭವ, ದಿವ್ಯದಾಲೋಚನೆಯಲ್ಲಿ.

ಅಂದು, ಕಣ್ಣು ಕೋರೈಸಿದ್ದ
ಆ ಗುರು ಬೆಳಕು
ಇಂದೇಕೊ
ಕುಂದಿದಂತೆನಿಸುತಿದೆ ನನಗೆ.

-ಮೂರು-

ನಿಮ್ಮದೊ
ಅದ್ಭುತ ಪ್ರತಿಭೆ
ವಿಶ್ವ ವಿಸ್ತಾರದನುಭವ
ಸೂಕ್ಷ್ಮಾತಿಸೂಕ್ಷ್ಮಗಳನರಿವ
ವ್ಯಾಖ್ಯಾನಿಸುವ
ಸಂವೇದನೆಯ ಸೌಭಾಗ್ಯ.

ಪಂಪನ ಭರತ ನೀವಲ್ಲ
ಕೊನೆಗಾದರೂ
ಸರ್ವ ತ್ಯಾಗವಗೈದು
ತಪಕೆ,
ಪಶ್ಚಾತ್ತಾಪಕ್ಕೆ ಮನತೆರೆವ ಜನವಲ್ಲ.

'ಭರತೇಶ ವೈಭವ'ದ
ಭೋಗ ಯೋಗ ಸಮನ್ವಯದ ಭರತ
'ಮುರಿದು ಕಣ್ಣಿಟ್ಟರೆ
ಕ್ಷಣಕೆ ಮುಕ್ತಿಯ ಕಾಂಬ' ಸಿದ್ಧ.

ನಿಮಗು ಗೊತ್ತುಂಟು
ಕ್ಷಣಕೆ ಮುಕ್ತಿಯ ಕಾಂಬ
ಸದ್ಯೋಜಾತ ಅಧ್ಯಾತ್ಮ ವಿದ್ಯೆ.
ಕ್ಷಣ ಮಾತ್ರ,
ಒಂದೇ ಒಂದು ಕ್ಷಣ ಮಾತ್ರ.
ವೇದಿಕೆಯ ಭಾಷಣದ ಪಾಕ
ಕೊಚಗುಟ್ಟಿ
ಕುದಿ ಬಂದ
ಸ್ಫೂರ್ತ ರಸದರಗಳಿಗೆ ಮಾತ್ರ.

ಕೆಳಗಿಳಿದು ಬಂದ ಮರುಕ್ಷಣದಲ್ಲೆ
ಕುದಿಯುಕ್ಕು ಇಳಿದಂತೆ
ಲೌಕಿಕ ಬದ್ಧ ಸಿದ್ಧಾಂತದ
ನಿಷ್ಠಾವಂತ ಅನುಷ್ಠಾನ.
ಮನಂಬುಗುವಂತೆ
ಸುರೋಚಕ ಸಮರ್ಥನೆ.

-ನಾಲ್ಕು-

ಚಕಮಕಿ ಕಲ್ಲನುಜ್ಜುತ್ತ
ಸ್ಫೋಟಕ್ಕೆ ಕಾದು
ಕಿವಿ ಕಂಪಿಸುತ್ತ
ಕೂತು
'ಹುತ್ತಗಟ್ಟದೆ ಮತ್ತೆ ಚಿತ್ತ ಕೆತ್ತೀತೇನು
ಪುರುಷೋತ್ತಮನ ಆ ಅಂಥ ರೂಪ-ರೇಖೆ'?
ಎಂದ,
ನೋನುತ್ತ ಸಂದ
ಆ ಗುರುಕವಿಯ
ಮರೆತಿರೇ?

ಸುಪ್ತ ಸುಷುಪ್ತಿಯಾಳದಲ್ಲಿ
ಧ್ಯಾನಸ್ಥವಾಗಿರುವ
ಆದಿದೇವ ಕವಿವಾಣಿ
ಸರಸ್ವತಿಯ
ನಿತ್ಯ
ಪ್ರಜ್ಞಾ ವಿವೇಕಕ್ಕೆ
ಆಹ್ವಾನಿಸುವ
ಕವಿಗುರು ಚಿರಪರಂಪರೆಯ
ಮರೆವಿರೇ?

ಆ ಅವರುಗಳ
ನಿಮ್ಮೊಳಕ್ಕೆ ಕರದುಕೊಳ್ಳಿರೇ
ಮತ್ತೆ
ಋಜುನಿಷ್ಠೆಯಿಂದ?