ಆ ದಿನ ಭಾನುವಾರ

ಆ ದಿನ ಭಾನುವಾರ!
ಕಟುಕನೆಡೆಯಿಂದ
ಅಂಗಳು ತುಂಬಿ
ಹರಿವ ರಕ್ತದ ಕೋಡಿ
ಕಿನಾಲು ಸೇರುತ್ತಿತ್ತು

ಭೀಕರ ಪ್ರಶಾಂತ ಬೀದಿಯಲಿ ದಾರಿಹೋಕರು
ಗಮನಿಸದೆ ನಡೆದರು
ಹರಿವ ರಕ್ತದ ಕೋಡಿಯ

ಏನೂ ಅರಿಯದ
ನಾಯಿಗಳೆರಡು
ಬಾಲ ಮುದುರಿಕೊಂಡು
ನೆಕ್ಕುತ್ತಿದ್ದವು
ಸೂತಕದ ಆ ನೆತ್ತರನು

ಬಿಡುವಿರದ ಜನರ ಮುಖಗಳೆಲ್ಲ
ತಲೆಬುರುಡೆಯಂತೆ ಖಾಲಿ ಖಾಲಿ

ಸಾವಿನ ಕುಣಿಯಿಂದೇಳುವ ಅವನ ಕಿರುಚಾಟ ಮಾತ್ರ
ಟೆಲಿಫೋನ್ ವಯರಿನ
ಮೇಲೂ ಕೆಳಗೂ ಹುಯ್ದಾಡುತಿತ್ತು
ಅದೇ ವಯರಿನ ಮೇಲೆ
ಗುಬ್ಬಿಗಳೆರಡು ಹಾಯಾಗಿ ಕುಳಿತಿದ್ದವು

ಆ ದಿನ ಭಾನುವಾರ!
ಮಾರುಕಟ್ಟೆ
ಕಿತ್ತಳೆಯಿಂದ ತುಂಬಿ ತುಳುಕುತ್ತಿತ್ತು
ವ್ಯಾಪಾರ ಮುಗಿವ ಮೊದಲೇ ಆರಂಭಗೊಂಡಿತು
ಮತ್ತೊಂದು ಭಾನುವಾರ

ಮೂಲ:ನೀಲಮನಿ ಫೂಕನ್
ಅನುವಾದ: ಭುವನಾ ಹಿರೇಮಠ