ಹೆಣ್ಣುಸಿರ ತಲ್ಲಣಗಳು 

ಅವಳು ಈಗಲೂ ತಲ್ಲಣಿಸುವಳು
ಮನೆಯೊಳಗಿನ ಕಿಚ್ಚು ನಂದಿಸಲಾಗದೆ
ಒಪ್ಪದಿರುವ ಸಂಬಂದಗಳ ಬಂದಿಯಾಗಿ
ಹೊರ ಬಂದು ಜೀವಿಸಲಾಗದೆ
ಮಾನ ಅಪಮಾನಗಳ ಸಹಿಸಲಾಗದೆ

ಮಾತಿನ ಮರ್ಮತೆಯಲಿ
ಗೊಂದಲಕ್ಕೆ ನಡುಗಿ ನೀರಾಗುತಲಿ
ಮತ್ತೆ ಮತ್ತೆ ಸತ್ತು ಜೀವಿಸುತಲಿ
ಬೆನ್ನಿಗಂಟಿದಂತೆ ಸಹಿಸಲಾರದ ನೋವಿನಲಿ
ತಳಮಳಗೊಂಡು ಉಸಿರ ಗಟ್ಟಿ ಹಿಡಿಯುತ
ಒಳ ಒಳಗೆ ಒಬ್ಬಳೇ ತಲ್ಲಣಿಸುವಳು

ಅಸಮಾಧಾನದ ಸ್ಥಿತಿಯಲಿ
ಪ್ರೀತಿ ಪ್ರೇಮ ನಂಬಿಕೆಯ ಊರಿನಲಿ
ಮೋಸ ವಂಚನೆ ದುಗುಡಗಳಿಗೆ ಒಳಗಾಗುತಲಿ
ಬಿಡದೆ ಜೀವವ ಹಿಡಿದು ಕೈಯಲ್ಲಿ
ಮನದೊಳಗೆ ಕಷ್ಟ ನೋವ ನುಂಗುತ
ಸದಾ ಹಸನ್ಮುಖಿಯಂತೆ ತಲ್ಲಣಿಸುವಳು

- ಕಿರಣ ಡಿ ಕಳಸಾ, ಗುಡೂರ.