ಹೊಸರಾಗ

ಹರೆಸುರಿದು ತೊರೆಯುಕ್ಕಿ ಸಂಗಮಕೆ ಹಪಹಪಿಸಿ
ಮುಖದೊಳಗೆ ಹೊಸಕಾವ್ಯ ಮೂಡುತ್ತಿದೆ
ವ್ಯಾಪಿಸುತ ದೇಹವಿಡಿ ಹಬ್ಬುತ್ತಿದೆ ॥ಪ॥

ಬಾಯಿಲ್ಲಿ ಬಂದುಬಿಡು ಅರೆಘಳಿಗೆ ಬಂಧಿಸುವೆ
ತೊಡಿಸುವೆನು ಮೇಲೆತ್ತಿ ತೋಳಬಂಧಿ
ಮೃದುಗಲ್ಲ ಎದೆಗಾತು ಒರಗಿಬಿಡು ಅರ್ಪಿಸುತ
ಮರವಪ್ಪಿ ಹೂಬಳ್ಳಿ ಘಮಲುಗಂಧಿ ೧

ತುದಿಬಾಗಿಲೊಳು ನಿಂತು ಮೈಮರೆತು ಬಿಡುಗಣ್ಣು
ಮುಕ್ಕುತ್ತ ಗಬಗಬನೆ ಹಸಿದಕಣ್ಣು
ನೆಪನೂರು ತಿರುಗಾಡಿ ಮನೆಯೆದುರು ಸುಳಿದಾಡಿ
ರುಚಿದುಂಬಿ ಕಾಯುತಿದೆ ಮಾಗಿಹಣ್ಣು ೨

ನಿದ್ದೆ ನೀರಡಿಕೆಗಳು ಹಸಿವಿಲ್ಲ ರುಚಿಯಿಲ್ಲ
ಹೊಸರಾಗ ಅನುಭೋಗ ಮನದಲ್ಲಿದೆ
ಕಾಯಗುಣ ಹದವೆದ್ದು ಹರೆಜಿನುಗಿ ಹೊಸಕಾವ್ಯ
ಚೈತ್ರದಲಿ ಕುಕಿಲುಕ್ಕಿ ಬನದಲ್ಲಿದೆ ೩

ಕುಡಿನೋಟ ಒಳನಾಟಿ ಉಟ್ಟುಡುಗೆ ಬಿಗಿಯಾಗಿ
ಉದ್ವೇಗದ್ವಿದ್ಯುತ್ತು ಝಗಮಗಿಸಿದೆ
ನೋಟಗಳು ಮಾತುಗಳು ಭೇಟಿಗಳು ಸ್ಪರ್ಶಗಳು
ಬೇಳೆಗಳು ಕಾಳಾಗಿ ಮರುಹುಟ್ಟಿದೆ ೪

ತುಟಿಹಾಡಿ ಪಲ್ಲವಿಯ ಧರಣಿಯಲಿ ಚರಣಗಳು
ಹೆಜ್ಜೆ ಗುರುತುಗಳೀಗ ಸಾಕ್ಷಿಕರಿಸಿ
ಪದವಿಟ್ಟು ಪದತೆಗೆದು ಹದಮಾಡಿ ನಾದಿದರು
ಅಪಸ್ವರವ ಸುಸ್ವರದಿ ಇಂದಿಕರಿಸಿ ೫

- ಜೀವರಾಜ ಹ ಛತ್ರದ